Connect with us

ក្នុងនាម​វិស័យ​ឯកជន​ ​អ្នកឧកញ៉ា​ ​គិត​ ​ម៉េ​ង​ ​គាំទ្រ​យ៉ាង​ពេញទំហឹង​ចំពោះ​កំណែទម្រង់​របស់​រាជរដ្ឋាភិបាល​ ​ដែល​ដាក់ចេញ​នា​ពេល​ថ្មី​ៗ​នេះ​

ភ្នំពេញ​ ​៖​ ​ដូច​ការ​រំពឹង​ទុក​ ​វេទិកា​រាជរដ្ឋាភិបាល​-​ផ្នែកឯកជន​ ​លើក​ទី១៨​ ​ត្រូវ​បាន​ប្រារព្ធ​ធ្វើឡើង​នៅ​ថ្ងៃទី​ ​២៩​ ​ខែមីនា​ ​ឆ្នាំ២០១៩នេះ​ ​ក្រោម​អធិបតីភាព​ដ៏​ខ្ពង់ខ្ពស់​របស់​សម្តេច​អគ្គមហាសេនា​បតី​តេជោ​ ​ហ៊ុន​ ​សែន​ ​នាយក​រដ្ឋមន្ត្រី​ ​នៃ​ព្រះរាជាណាចក្រ​កម្ពុជា​។​

​ក្នុងនាម​ជា​អ្នកសម្របសម្រួល​ផ្នែកឯកជន​នៃ​វេទិកា​រាជរដ្ឋាភិបាល​-​ផ្នែកឯកជន​ ​អ្នកឧកញ៉ា​ ​គិត​ ​ម៉េ​ង​ ​ប្រធាន​សភា​ពាណិជ្ជកម្ម​កម្ពុជា​ ​បាន​អះអាង​ថា​ ​វិស័យ​ឯកជន​ ​សូម​គាំទ្រ​យ៉ាង​ពេញទំហឹង​ចំពោះ​កំណែទម្រង់​របស់​រាជរដ្ឋាភិបាល​ ​ដែល​បាន​ដាក់ចេញ​នា​ពេល​ថ្មី​ៗ​នេះ​ ​សំដៅ​ធានា​ឲ្យបាន​នូវ​បរិយាកាស​វិនិយោគ​ល្អ​ប្រសើរ​ ​និង​ផ្តល់​នូវ​កំណើន​ថ្មី​ ​។​ ​

​អ្នកឧកញ៉ា​ ​គិត​ ​ម៉េ​ង​ ​បាន​បញ្ជាក់​ថា​ ​ធុរជន​ ​និង​វិនិយោគិន​ ​នឹង​បន្ត​ប្រកប​អាជីវកម្ម​ ​និង​វិនិយោគ​បន្ថែម​នៅ​កម្ពុជា​ ​ដើម្បី​បង្កើត​ការងារ​ជូន​ប្រជាពលរដ្ឋ​ ​និង​ចូលរួម​ចំណែក​សម្រេច​ឲ្យបាន​នូវ​ទស្សនវិស័យ​កម្ពុជា​ ​ឆ្នាំ២០៥០​ ​ក្លាយជា​ប្រទេស​មាន​ចំណូល​ខ្ពស់​ ​។​ ​​ទន្ទឹមគ្នា​នេះ​ ​អ្នកឧកញ៉ា​ ​គិត​ ​ម៉េ​ង​ ​ក៏បាន​ថ្លែងអំណរគុណ​យ៉ាង​ជ្រាលជ្រៅ​បំផុត​ជូនចំពោះ​សម្តេច​អគ្គមហាសេនា​បតី​តេជោ​ ​ហ៊ុន​ ​សែន​ ​ដែល​បានសម្រេច​អនុញ្ញាត​ឲ្យ​បង្កើត​ក្រុមការងារ​ថ្មី​ចំនួន​បី​បន្ថែម​ទៀត​ ​គឺ​ ​១​)​ក្រុមការងារ​វិស័យ​អប់រំ​ ​២​)​ក្រុមការងារ​វិស័យ​សុខាភិបាល​ ​និង៣​)​ក្រុមការងារ​វិស័យ​សំណង់​ ​និង​អចលនទ្រព្យ​ ​។​

​អ្នកឧកញ៉ា​ ​គិត​ ​ម៉េ​ង​ ​ក៏បាន​លើកឡើង​ថា​ ​វេទិកា​នេះ​ ​គឺជា​យន្តការ​ប្រឹក្សា​យោបល់​ដ៏​មានប្រសិទ្ធភាព​ ​ក្នុង​ការ​ប្រមូល​យក​ធាតុ​ចូល​ពី​វិស័យ​ឯកជន​ ​ទាក់ទិន​នឹង​គោលនយោបាយ​ ​ច្បាប់​ ​និង​បទប្បញ្ញត្តិ​នានា​ ​ហើយ​បាន​ចូលរួម​ចំណែក​លើកកម្ពស់​បរិយាកាស​វិនិយោគ​ ​និង​ធុរកិច្ច​នៅ​កម្ពុជា​។​

​បើ​តាម​អ្នកឧកញ៉ា​ ​គិត​ ​ម៉េ​ង​ ​កាលពី២០​ ​ឆ្នាំមុន​ ​គឺ​នៅ​ឆ្នាំ១៩៩៩​ ​វេទិកា​រាជរដ្ឋាភិបាល​-​ផ្នែកឯកជន​ ​ត្រូវ​បាន​បង្កើត​ឡើង​ក្រោម​គំនិត​ផ្តួចផ្តើម​ដ៏​ខ្ពង់ខ្ពស់​របស់​សម្តេច​អគ្គមហាសេនា​បតី​តេជោ​ ​ហ៊ុន​ ​សែន​ ​នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​។​ ​រហូតមកដល់​ថ្ងៃទី​ ​១២​ ​ខែតុលា​ ​ឆ្នាំ​ ​២០០៨​ ​ក្រោម​ចំណារ​ឯកភាព​ដ៏​ខ្ពង់ខ្ពស់​របស់​សម្តេច​អគ្គមហាសេនា​បតី​តេជោ​ ​ហ៊ុន​ ​សែន​ការិយាល័យ​សម្របសម្រួល​ផ្នែកឯកជន​របស់​វេទិកា​រាជរដ្ឋាភិបាល​-​ផ្នែកឯកជន​ ​ត្រូវ​បាន​ផ្ទេរ​ពីសា​ជីវកម្ម​ហិរញ្ញវត្ថុ​អន្តរជាតិ​ ​(​IFC​)​ ​ឲ្យ​មក​ស្ថិត​ក្រោម​សភា​ពាណិជ្ជកម្ម​កម្ពុជា​ ​៕​

 

  • អត្ថបទទាក់ទង :
  • Featured
Loading...

ពេញនិយម

© 2018 រក្សាសិទ្ធិគ្រប់យ៉ាង​ដោយ Cambodian Broadcasting Service Co., Ltd.