Connect with us

កម្ពុជា​ ស្នើរធនាគារអភិវឌ្ឍន៍អាស៊ី ជួយលើគម្រោងផែនការមេគ្រប់គ្រងទឹកកខ្វក់នៅតាមខេត្តក្រុង

ភ្នំពេញ​ ÷ ឯកឧត្ដម​ ទេសរដ្ឋមន្ត្រី ស៊ុន ចាន់ថុល​ រដ្ឋមន្រ្តីក្រសួងសាធារណៈការ និងដឹកជញ្ជូន បានជួបពិភាក្សាការងារជាមួយលោកស្រី Sunniya Durrani-Jamal នាយកធនាគារអភិវឌ្ឍន៍អាស៊ី (ADB) ប្រចាំនៅប្រទេសកម្ពុជា។

ក្នុងជំនួប ឯកឧត្តម​ ទេសរដ្ឋមន្រ្តី​ បានសម្តែងនូវការកោតសរសើរដល់ធនាគារអភិវឌ្ឍន៍អាស៊ី ដែលបានបន្តគាំទ្រ និងចូលរួមចំណែក ក្នុងការអភិវឌ្ឍហេដ្ឋារចនាសម្ព័ន្ធនៅប្រទេសកម្ពុជា។

ឯកឧត្ដម​ ទេសរដ្ឋមន្ត្រី បានពិភាក្សាលើគម្រោងកំពុងបន្តជាច្រើនរបស់ធនាគារអភិវឌ្ឍន៍អាស៊ី ដោយផ្តោតជាសំខាន់លើអាងគ្រប់គ្រងទឹកកខ្វក់នៅខេត្តព្រះសីហនុ និងខេត្តសៀមរាប។

ឯកឧត្ដម​ ទេសរដ្ឋមន្ត្រី បានកត់សម្គាល់បញ្ហាកង្វល់ បញ្ហាប្រឈម និងបទពិសោធន៍ទទួលបានពីការអនុវត្តគម្រោងផ្សេងៗដែលខ្វះការសិក្សា និងការរៀបចំផែនការគ្រប់ជ្រុងជ្រោយ ដើម្បីដោះស្រាយតម្រូវការនៃកំណើនសេដ្ឋកិច្ចយ៉ាងលឿនរបស់ប្រទេសផងដែរ។

ជាមួយគ្នានេះ​ ឯកឧត្តម​ ទេសរដ្ឋមន្ត្រី ក៏បានស្នើសុំឱ្យធនាគារអភិវឌ្ឍន៍អាស៊ី ពិនិត្យលើការគាំទ្រដល់គម្រោងសំខាន់ៗដទៃទៀត​ ដែលក្នុងនោះរួមមាន៖ គម្រោងទាក់ទងនឹងការថែទាំជួសជុលផ្លូវថ្នល់ គម្រោងផែនការមេពេញលេញស្ដីពីហេដ្ឋារចនាសម្ព័ន្ធគ្រប់គ្រងទឹកកខ្វក់នៅតាមបណ្ដាខេត្ត-ក្រុងមួយចំនួន គម្រោងផែនការមេដឹកជញ្ជូនសាធារណៈក្រុង ក៏ដូចជាចូលរួមគាំទ្រ និងសហការជាមួយនឹងគណៈកម្មាធិការសុវត្ថិភាពចរាចរណ៍ផ្លូវគោក ដើម្បីលើកកម្ពស់សុវត្ថិភាពចរាចរណ៍ និងកាត់បន្ថយអត្រាគ្រោះថ្នាក់ចរាចរណ៍នៅកម្ពុជា។

លោកស្រី Durrani-Jamal បានសម្តែងនូវឆន្ទៈរបស់ខ្លួន ក្នុងការបន្តសហការជាមួយក្រសួងសាធារណការ និងដឹកជញ្ជូន ព្រមទាំងបានកត់សម្គាល់លើសំណើរបស់ឯកឧត្តមទេសរដ្ឋមន្ត្រី ដែលសុំឱ្យពិនិត្យលើផែនការគម្រោងរបស់ ADB។

ក្នុងជំនួបនោះ លោកស្រី Durrani-Jamal បានជម្រាបជូនឯកឧត្តមទេសរដ្ឋមន្រ្តី​ ពីគម្រោង និងសកម្មភាពថ្មីៗបំផុតជាច្រើនរបស់ធនាគារអភិវឌ្ឍន៍អាស៊ី ដែលកំពុងធ្វើផែនការ និងអនុវត្តនៅក្នុងប្រទេសកម្ពុជា ដោយផ្តោតសំខាន់លើផែនការនគរូបនីយកម្ម​៕

  • អត្ថបទទាក់ទង :
  • Featured
Loading...

ពេញនិយម