Arsenal និង Tottenham អាចនឹងត្រូវ FA ពិន័យ ដោយសារប៉ះទង្គិចគ្នាថ្ងៃមុន

អង់គ្លេស៖ ក្លិបបាល់ទាត់ Arsenal និង Tottenham ត្រូវបានសហព័ន្ធកីឡាបាល់ទាត់អង់គ្លេសចោទប្រកាន់ បន្ទាប់ពីកីឡាកររបស់ក្រុមទាំង២មានការប៉ះទង្គិចគ្នា ក្រោយ Eric Dier តាមស្មើ ១-១ អំឡុងការប្រកួត derby នៅ Emirates Stadium កាលថ្ងៃអាទិត្យទី២ធ្នូឆ្នាំ២០១៨។
Dier បានអបអរការទាត់បញ្ចូលទីរបស់ខ្លួន ដោយបានដាក់ម្រាមដៃចូលក្នុងមាត់ បន្ទាប់ពីតាមស្មើ Spurs ក្នុងការប្រកួតដែលបញ្ចប់ដោយលទ្ធផល Arsenal យកឈ្នះ ៤-២ ។
កីឡាករជម្រើសជាតិអង់គ្លេសរូបនេះ ត្រូវបានអាជ្ញាកណ្ដាលពិន័យកាតលឿង ក្រោយការអបអរ ហើយកីឡាករ Spurs បានប៉ះទង្គិចជាមួយកីឡាករបម្រុងរបស់ Arsenal ផងដែរ ។ ក្លិបទាំងពីរត្រូវបានចោទពីបទបរាជ័យក្នុងការធានាថា កីឡាកររបស់ពួកគេប្រព្រឹត្តក្នុងរបៀបត្រឹមត្រូវ ហើយក្លិបទាំង២ មានពេលដល់ថ្ងៃព្រហស្បតិ៍ ដើម្បីឆ្លើយតបនឹងការចោទប្រកាន់នេះ ៕