Connect with us

មន្រ្តីគយ និងវិស័យឯកជន ជួបគ្នា ដើម្បីស្វែងរកដំណោះស្រាយបញ្ហាប្រឈមពាក់ព័ន្ធនឹងការអនុវត្តបែបបទនីតិវិធីគយ

ភ្នំពេញ ៖ អគ្គនាយកដ្ឋានគយ និងរដ្ឋាករកម្ពុជា បានជួបប្រជុំជាលើកទី៧ សម្រាប់យន្តការភាពជាដៃគូគយ-ផ្នែកឯកជន ក្នុងគោលបំណងដោះស្រាយបញ្ហាប្រឈម និងសំណូមពរនានារបស់វិស័យឯកជនពាក់ព័ន្ធ នឹងការអនុវត្តនីតិវិធីគយ សំដៅធានាតុល្យភាព រវាងការអនុវត្តគោលនយោបាយ នៃកិច្ចសម្រួលពាណិជ្ជកម្ម របស់រាជរដ្ឋាភិបាលកម្ពុជា ជាមួយនិងការលើកកម្ពស់ អនុលោមភាពច្បាប់ក្នុងសង្គម។

កិច្ចប្រជុំនេះធ្វើឡើងក្រោមវត្តមានសហប្រធាននៃយន្តការភាពជាដៃគូគយផ្នែកឯកជន អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា។

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានបញ្ជាក់ថា យន្តការនេះ គឺជាការពិគ្រោះយោបល់ ដើម្បីស្វែងរកដំណោះស្រាយឈ្នះៗទាំងអស់គ្នា ដែលស្របទៅ និងគោលនយោបាយរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា ដែលបានដាក់ចេញដើម្បីឲ្យមានសុខុដុមជាមួយគ្នា និងធ្វើការជាមួយគ្នា ជាគ្រួសារតែមួយ។

យន្តការភាពជាដៃគូគយ-ផ្នែកឯកជន គឺជាយន្តការសម្របសម្រួលឲ្យមានកិច្ចសហការ និងការយោគយល់គ្នាទៅវិញទៅមក រវាងរដ្ឋបាលគយនិងផ្នែកឯកជនពាក់ព័ន្ធ ដើម្បីដោះស្រាយរាល់បញ្ហាពាក់ព័ន្ធនឹងគយឲ្យអស់លទ្ធភាពជាមុន មុននឹងឈានទៅដោះស្រាយកម្រិតអន្តរក្រសួង ឬដាក់ជូនវេទិការាជរដ្ឋាភិបាល-ផ្នែកឯកជន។  នេះគឺជាកត្តាមួយដ៏សំខាន់ក្នុងការធានានូវប្រសិទ្ធភាពនៃការអនុវត្តគោលនយោបាយនៃកិច្ចសម្រួលពាណិជ្ជកម្មរបស់រាជរដ្ឋាភិបាលកម្ពុជា។

លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានមានប្រសាសន៍ថា  រាជរដ្ឋាភិបាលកម្ពុជាបានចាត់ទុកវិស័យឯកជនគឺជាក្បាលម៉ាស៊ីននៃកំណើនសេដ្ឋកិច្ចជាតិ។ កិច្ចប្រជុំយន្តការភាពជាដៃគូគយនិងផ្នែកឯកជននេះ អគ្គនាយកដ្ឋានគយនិងរដ្ឋាករកម្ពុជា បានរៀបចំចំនួន ៦ លើក រួចមកហើយ។ លោក បានបន្តថា កន្លងមក ៩០%នៃបញ្ហាប្រឈមនានារបស់វិស័យឯកជនគឺត្រូវបានដោះស្រាយបានយ៉ាងល្អ។

គួរំលឹកថាបើតាមកិច្ចប្រជុំយន្តការភាពជាដៃគូគយ និងផ្នែកឯកជន ទាំង៦លើក ដែលបានធ្វើកន្លងមកបានរួមគ្នាដោះស្រាយនូវសំណូមពរ និងបញ្ហាពាក់ព័ន្ធនឹងគយ ព្រមទាំងបានចេញនូវបទប្បញ្ញត្តិចាំបាច់នានាសំដៅបន្តធ្វើសាមញ្ញកម្មនីតិវិធីគយ និងសម្រួលដល់វិនិយោគិននិងធុរជនពាក់ព័ន្ធបន្ថែមទៀត មានជាអាទិ នីតិវិធីដឹកជញ្ជូនទំនិញឆ្លងកាត់ កាតព្វកិច្ចបិទផ្សាយជាសាធារណៈនូវលំហូរនីតិវិធី និងស្តង់ដារការងារបញ្ចេញទំនិញពីគយការអនុវត្តតម្លៃគិតពន្ធគយសម្រាប់​ទំនិញតាមផ្លូវអាកាសនិងការសម្រួលនីតិវិធីចេញលិខិតអនុញ្ញាតគយ និងការផ្ទៀងផ្ទាត់វិញ្ញាបនបត្រប្រភពដើមទំនិញ៕

  • អត្ថបទទាក់ទង :
  • Featured
Loading...

ពេញនិយម