ការនាំចូលទំនិញពីចិន ចូលកាន់ទីផ្សារប្រទេសនីហ្សេរីយ៉ា កាន់តែមានទំហំធំឡើង

នីហ្សេរីយ៉ា ៖ ទំនាក់ទំនងពាណិជ្ជកម្មរវាងប្រទេសនីហ្សេរីយ៉ា និង ប្រទេសចិន បានកើនឡើងក្នុងមួយទសវត្សរ៍កន្លងមក ដោយសារតែភាពងាយស្រួលក្នុងការធ្វើពាណិជ្ជកម្មរវាងប្រទេសទាំងពីរ ។
ទីផ្សារគ្រឿងបន្លាស់បច្ចេកវិទ្យាព័ត៌មាន និងគមនាគមន៍ក្នុងទីក្រុងឡាង៊ូស (Lagos) នៃប្រទេសនីហ្សេរីយ៉ា គឺជាទីផ្សារបច្ចេកវិទ្យាព័ត៌មាន និងគមនាគមន៍ (ICT) ធំបំផុត នៅអាហ្វ្រិកខាងលិច។ ប្រសិនបើមានកន្លែងណាមួយដើម្បីវាស់ស្ទង់ឥទ្ធិពលនៃទំនាក់ទំនងពាណិជ្ជកម្មរវាងប្រទេសនីហ្សេរីយ៉ា និងប្រទេសចិន គឺកន្លែងនេះហើយ ដែលមានទំនិញជាង ៩០ ភាគរយ ដែលបាននាំចូលពីប្រទេសចិន ។

ពាណិជ្ជករនីហ្សេរីយ៉ាជាច្រើនដែលកំពុងរកស៊ីនៅទីនោះ ជាធម្មតាធ្វើដំណើរទៅប្រទេសចិន ដើម្បីទិញទំនិញ ។

លោក  Ziggy Ibeh គឺជាពាណិជ្ជករម្នាក់ក្នុងចំណោមនោះ បាននិយាយថា ទំនាក់ទំនងពាណិជ្ជកម្មជាមួយសមភាគីចិនរបស់គាត់ កាន់តែស៊ីជម្រៅយ៉ាងខ្លាំងក្នុងប៉ុន្មានឆ្នាំនេះ ។

ធនាគារកណ្តាលរបស់ចិន បានចុះហត្ថលេខាលើកិច្ចព្រមព្រៀងដោះដូររូបិយប័ណ្ណជាមួយសមភាគីនីហ្សេរីយ៉ារបស់ខ្លួននៅក្នុងខែឧសភា ។​ កិច្ចព្រមព្រៀងនេះ អនុញ្ញាតឱ្យភាគីទាំងពីរផ្លាស់ប្តូរទឹកប្រាក់សរុបចំនួន ២.៣៥ ពាន់លានដុល្លារ សម្រាប់ទឹកប្រាក់ ៧២០ ពាន់លានណៃរ៉ារបស់នីហ្សេរីយ៉ា ក្នុងរយៈពេល៣ ឆ្នាំខាងមុខនេះ ។

​មានផលិតផលចិនជាច្រើនទៀត នឹងនាំចូលទៅប្រទេសនីហ្សេរីយ៉ា។ ជាមួយនេះ ពិព័រណ៍ផលិតផលនាំចូលអន្ដរជាតិចិន (CIIE)ដំបូងបង្អស់ដែលប្រារព្ធធ្វើឡើងនៅទីក្រុងស៊ាងហៃប្រទេសចិនកាលពីខែវិច្ឆិកា ត្រូវបានរៀបចំឡើងដើម្បីដោះស្រាយបញ្ហាមួយចំនួន។ឥឡូវនេះវាអាស្រ័យទៅលើពាណិជ្ជករនីហ្សេរីយ៉ា ដើម្បីទាញយកផលប្រយោជន៍ពីឱកាសដែលបានផ្តល់ដើម្បីបង្កើនការនាំចេញរបស់ខ្លួនទៅកាន់ប្រទេសចិន៕