ខ្មែរសញ្ជាតិបារាំងពីររូបចង់ឱ្យសិល្បៈសហសម័យមានការគាំទ្រកាន់តែច្រើនតាមរយៈវិចិត្រសាលរបស់គាត់

៣ ឆ្នាំមុន

ខែធ្នូ ១៩, ២០១៨ សង្គម

នៅសៀមរាប៖ វិចិត្រសាលមួយកន្លែងនៅខេត្តសៀមរាប ដែលឱ្យឈ្មោះថា Batia Sarem ត្រូវបានបើកឡើង ដោយវិចិត្រករខ្មែរសញ្ជាតិបារាំងពីររូបកាលពីចុងសប្ដាហ៍កន្លងមកនេះ។ ក្នុងការចាប់ផ្ដើមដំបូងវិចត្រករទាំងពីរូបបានរៀបចំឱ្យមានការតាំងពិព័រណ៍ ជារូបភាព ឬស្នាដៃសិល្បៈផ្សេងៗជាច្រើនរបស់វិចិត្រករខ្មែរ និងស្នាដៃរបស់សិល្បករសហសម័យល្បីៗផងដែរ។

ស្នាដៃមួយចំនួនដែលបានខំសំរិតសំរាំងឡើងពីសិល្បករ និងវិចិត្រករល្បីៗត្រូវបាន ស្ថាបនិកទាំងពីរគឺ លឹក លីវ៉ាន់ និង អ៊ីវ ហ្សូតូស្គី (Yves Zlotowski) រៀបចំឡើង ដើម្បីរំលឹកដល់ការបាត់បង់ ឬកាប្រឈមមុខក្នុងការបាត់បង់ ក៍ដូចជាការរំលឹកដល់អនុស្សារីយ៍មនុស្សសំខាន់ៗមួយកាលពីសម័យសង្រ្គាម។ ទាំងនេះជារលឹកមួយដល់មនុស្សជាច្រើនឱ្យចាប់អារម្មណ៍ក្នុងការជួយស្រោចស្រង់ និងថែរក្សាឡើងវិញនូវរបស់ទាំងនោះ។

ជាងនេះទៅទៀត វិចិត្រសាលនេះត្រូវបានបង្កើតឡើងក្នុងគោលបំណងលើកកំពស់ដល់វិស័យសិល្បៈសហសម័យខ្មែរឱ្យកាន់តែទទួលបាននូវការគាំទ្រនូវស្នាដៃថ្មីរបស់ពួកគេ ពីសំណាក់មហាជនជាតិក៍ដូចជាអន្តរជាតិ។

សូមរំលឹកថាវិចិត្រសាលនេះមានទីតាំងស្ថិតនៅក្នុងខេត្ដសៀមរាបក្នុងស្រុកវត្តដំណាក់ដោយដាក់ឈ្មោះថា Batia និង Sarem គឺជាជីដូនរបស់ Yves និង លីវ៉ាន់៕