អ្នកដែលមិនទាន់បានធ្វើអត្តសញ្ញាណប័ណ្ណគំរូថ្មី សូមរួសរាន់ឡើង ប្រយ័ត្នដល់ពេលត្រូវការធ្វើឆ្លេឆ្លា !

តើអ្នកទាំងអស់គ្នាបានទៅធ្វើអត្តសញ្ញាណប័ណ្ណសញ្ជាតិខ្មែរគំរូថ្មីហើយ ឬនៅ? បើមិនទាន់សូមទៅធ្វើឱ្យបានគ្រប់គ្នាមុនដាច់ឆ្នាំនេះ ដើម្បីធានាបាននូវសិទ្ធិសេរីភាព និងផលប្រយោជន៍ស្របច្បាប់ផ្ទាល់ខ្លួន។
សូមរំលឹកថា កាលពីដើមខែវិច្ឆិកាកន្លងទៅ អគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃបានចេញសេចក្ដីប្រកាសរួចមកហើយថា អត្តសញ្ញាណប័ណ្ណសញ្ជាតិខ្មែរគំរូចាស់ទាំងអស់នឹងអស់សុពលភាពប្រើប្រាស់ត្រឹមថ្ងៃទី៣១ ធ្នូឆ្នាំ២០១៨ខាងមុខនេះហើយ។ នៅសល់តែ១០ថ្ងៃទៀតទេ រួសរាន់ឡើង !
បើតាមសេចក្តីជូនដំណឹងដដែល បងប្អូនអាចស្នើសុំផ្តល់អត្តសញ្ញាណប័ណ្ណសញ្ជាតិខ្មែរគំរូថ្មី នៅទីតាំងដូចខាងក្រោម៖

• ប៉ុស្តិ៍នគរបាលរដ្ឋបាលឃុំ សង្កាត់ ឬ
• អធិការដ្ឋាននគរបាលក្រុង ស្រុក ខណ្ឌ ឬ
• ស្នងការដ្ឋាននគរបាលរាជធានី-ខេត្ត ដែលខ្លួនរស់នៅ ឬ
• ស្នាក់ការផ្តល់អត្តសញ្ញាប័ណ្ណសញ្ជាតិខ្មែរនៅផ្សារទំនើបអ៊ីអនម៉ល២សែនសុខ។

ចំពោះឯកសារដែលត្រូវភ្ជាប់មកជាមួយគឺ៖ សំបុត្រកំណើត ឬសំបុត្របញ្ជាក់កំណើត និងសៀវភៅគ្រួសារ ឬសៀវភៅស្នាក់នៅ ឬលិខិតបញ្ជាក់ទីលំនៅ និងអត្តសញ្ញាណប័ណ្ណសញ្ជាតិខ្មែរគំរូចាស់៕