គ្រូជម្រើសជាតិក្រូអាត ថា ក្រុមខ្លួននឹងមានថាមពលគ្រប់គ្រាន់សម្រាប់ជំនួបអង់គ្លេស

លោក Zlatko Dalic គ្រូបង្វឹកក្រុមបាល់ទាត់ជម្រើសក្រូអាត បង្ហើបថា កូនក្រុមខ្លួននឹងមានថាមពលគ្រប់គ្រាន់សម្រាប់ជំនួបជាមួយអង់គ្លេស វគ្គពាក់កណ្ដាលផ្ដាច់ព្រ័ត្រ FIFA World Cup 2018 ទោះបីត្រូវឆ្លងដល់ម៉ោងថែម១៥នាទី២ដង ឬ ប៉េណាល់ទី យ៉ាងណាក្ដី។

ក្រូអាត នឹងត្រូវប៉ះអង់គ្លេស នៅថ្ងៃពុធ ទី១១ កក្កដា ក្រោយទម្លាក់ម្ចាស់ផ្ទះរុស្ស៊ី ដោយបាល់កាត់សេចក្ដី។ លោក Dalic រៀបរាប់បែបនេះ “យើងនៅសល់ថាមពលខ្លះសម្រាប់ជំនួបអង់គ្លេស, បើទោះពួកគេ លេងនាទីមិនច្រើនដូចយើង តែយើងនៅតែមានការតាំងចិត្ត ដើម្បីឈ្នះពួកគេអោយបាន”។

អង់គ្លេសលេងអស់៤៨០នាទី និង ឆ្លងកាត់វគ្គប៉េណាល់ទីនៅរុស្ស៊ី ក្រូអាតលេងច្រើនជាង៣០នាទីពីការប្រកួត៣លើកមុន។ ដោយឡែក អ្នកចាំទីក្រូអាត Danijel Subasic លេចឮដំណឹងថា ទំនងមានបញ្ហាសសៃពួរ ដែលត្រូវចំណាយពេលច្រើនដើម្បីធ្វើឲ្យធូរស្បើយ តែរំពឹងថា នឹងអាចចូលលេងបានវិញ៕