ក្រសួងការងារស្នើឱ្យម្ចាស់រោងចក្រនិងថៅកែក្រុមហ៊ុនបើកប្រាក់ខែយ៉ាងតិច ៥០%ដល់កម្មករបុក្គលិកឱ្យបានមុនថ្ងៃបោះឆ្នោត

(ភ្នំពេញ)៖ ក្រសួងការងារនិងបណ្តុះបណ្តាលវិជា្ជជីវៈ បានប្រកាសប្រាប់ដល់ម្ចាស់រោងចក្រ និងនាយកសហគ្រាស គ្រឹះស្ថាន ទាំងអស់ដែលស្ថិតនៅ ក្នុងដែន អនុវត្តនៃច្បាប់ស្តីពីការងារ ថា ម្ចាស់រោងចក្រ និងនាយកសហគ្រាស គ្រឹះស្ថាន ទាំងអស់ ត្រូវអនុញ្ញាតឱ្យកម្មករនិងបុគ្គលិកបានឈប់សម្រាកដោយមានប្រាក់ឈ្នួលចំនួន ៣ថ្ងៃ ពោលគឺនៅថ្ងៃសៅរ៍ទី ២៨ ថ្ងៃអាទិត្យទី ២៩ និងថ្ងៃចន្ទ ទី៣០ ខែកក្កដា ដើម្បីមានពេលគ្រប់គ្រាន់ធ្វើដំណើរទៅបោះឆ្នោតនៅស្រុកកំណើត។

បន្ថែមលើនេះ ក្រសួងការងារនិងបណ្តុះបណ្តាលវិជា្ជជីវៈ បញ្ជាក់ថា ក្នុងករណីម្ចាស់រោងចក្រ និងនាយកសហគ្រាស គ្រឹះស្ថាន ពុំមានលទ្ធភាពបើកប្រាក់ឈ្នួលទាន់ពេលក្នុងឱកាសដែលអនុញ្ញាត ឲ្យកម្មករនិយោជិត ឈប់សម្រាកទៅ ចូលរួមបោះឆ្នោត ជ្រើសតាំង តំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨នោះ គឺ ក្រសួងសូមស្នើឱ្យស់រោងចក្រ និងនាយក សហគ្រាស គ្រឹះស្ថានទាំងអស់ត្រូវបើកប្រាក់បុរេប្រទានយ៉ាងតិច ៥០% ដល់កម្មករនិយោជិត ឱ្យបាន មុនថ្ងៃទី២៧ ខែកក្កដា ឆ្នាំ២០១៨៕