នាវាទេសចរណ៍ខ្នាតយក្សមួយគ្រឿង នាំភ្ញៀវទេសចរបរទេស ជិត២៨០០នាក់ មកលេងកម្សាន្តនៅក្រុងព្រះសីហនុ

ខេត្តព្រះសីហនុ៖ នាវាទេសចរណ៍ខ្នាតយក្សមួយគ្រឿង បានចូលចតនៅកំពង់ផែអន្តរជាតិក្រុងព្រះសីហនុ នៅថ្ងៃទី២៥ធ្នូឆ្នាំ២០១៨ ដោយនាំមកនូវភ្ញៀវទេសចរ ចំនួនជិត ២៨០០នាក់ ។
នាវាទេសចរណ៍នេះ មានឈ្មោះ COSTA FORTUNA ចុះបញ្ជីសញ្ជាតិនៅប្រទេសអ៊ីតាលី ដែលមានបណ្ដោយប្រវែង ២៧២,១៥ម៉ែត្រ ទទឹង ៣៥.៥០ម៉ែត្រ មានភ្ញៀវទេសចរ ចំនួន ២៧៩៥នាក់ ស្រី ១៤៩៩នាក់ មាន៥៨សញ្ជាតិ និង នាវឹកចំនួន៩៧៥នាក់ ស្រី១៥០នាក់ មាន៣៥សញ្ជាតិ ក្នុងនោះ ភ្ញៀវទេសចរ ច្រើនជាងគេ គឺ សញ្ជាតិអ៊ីតាលី ដែលមានចំនួន៧៤៥នាក់។
បើតាមមន្ត្រីច្រកទ្វារអន្តរជាតិកំពង់ផែក្រុងព្រះសីហនុ បានអោយដឹងថា នាវាទេសចរណ៍នេះបានចេញដំណើរពីប្រទេសសឹង្ហបុរី មកកាន់ប្រទេសកម្ពុជា ហើយនឹងបន្តដំណើរទៅប្រទេសថៃ នៅព្រលប់ថ្ងៃនេះ ។
វាជាមោនៈភាពសម្រាប់ប្រទេសកម្ពុជា ជាពិសេសខេត្តព្រះសីហនុ ដែលកំណើននាវាដឹកភ្ញៀវទេសចរធុនធំ បានមកចូលចត និងទស្សនាកម្សាន្តក្នុងក្រុងព្រះសីហនុ ធ្វើអោយជីវភាពប្រជាពល មានភាពល្អប្រសើឡើង តាមរយៈការដឹកភ្ញៀវទស្សនាទៅតាមតំបន់ទេសចរណ៍នានាក្នុងក្រុង និង តាមរយៈការលក់ដូរផ្សេងៗដល់ភ្ញៀវទេសចរជាដើម ៕