កំណើនទេសចរចិន ធ្វើអោយកម្ពុជា ទទួលភ្ញៀវទេសចរបរទេសបានជាង ៦,២លាននាក់ កាលពីឆ្នាំ២០១៨

ភ្នំពេញ ៖ ប្រទេសកម្ពុជា ទទួលបានភ្ញៀវទេសចរបរទេសប្រមាណ ៦,២លាននាក់ នៅឆ្នាំ ២០១៨ កើនឡើងប្រមាណ ១១ភាគរយ បើធៀបនឹងឆ្នាំ២០១៧ ។ កំណើននេះ ត្រូវបានរុញច្រានដោយកំណើនភ្ញៀវទេសចរចិន ដែលមានប្រមាណ ១,៩លាននាក់ កើនឡើង ៧០ភាគរយ ។
ក្រៅពីនេះ កម្ពុជា ក៏ទាក់ទាញភ្ញៀវទេសចរវៀតណាម ថៃ កូរ៉េ ជប៉ុន អាមេរិក និងអឺរ៉ុប ជាច្រើនទៀតផងដែរ។

តាមការលើកឡើងរបស់លោក ថោង ខុន រដ្ឋមន្ត្រីក្រសួងទេសចរណ៍ បានឲ្យដឹងនាពេលកន្លងថា ការកើនឡើងនៃចំនួនភ្ញៀវទេសចរអន្តរជាតិ មកទស្សនាប្រទេសកម្ពុជា ដោយសារកម្ពុជា មានសុខសន្តិភាព ស្ថិរភាព និងការអភិវឌ្ឍន៍ ព្រមទាំងការតភ្ជាប់ជើងហោះហើរត្រង់ជាមួយបណ្តាប្រទេសជាដៃគូ និង ការខិតខំរបស់រាជរដ្ឋាភិបាលក្នុងការផ្សព្វផ្សាយ ក៏ដូចជាបង្តើតតំបន់ទេសចរណ៍ថ្មីៗ បន្ថែមអ្វីដែលមានស្រាប់ ។
លោក រដ្ឋមន្រ្តី បញ្ជាក់ទៀតថា កម្ពុជា មានសក្តានុពលទេសចរណ៍ដ៏សម្បូរបែប ទាំងតំបន់ទេសចរណ៍វប្បធម៌ប្រវត្តិសាស្ត្រ អេកូរទេសចរណ៍ និងធម្មជាតិ ជាពិសេសនោះ គឺ ប្រាសាទអង្គរវត្ត ដែលមានភាពទាក់ទាញខ្លាំងបំផុត សម្រាប់ភ្ញៀវទេសចរ មកពីគ្រប់ទិសទីជុំវិញភពលោក។
លោកថ្លែងថា បច្ចុប្បន្នក្រសួងទេសចរណ៍ កំពុងរៀបចំបង្កើតតំបន់ទេសចរណ៍ពិសេស ក្នុងគោលបំណងបង្កើនការទាក់ទាញភ្ញៀវទេសចរបរទេស ឲ្យបានកាន់តែច្រើន ស្នាក់នៅបានយូរ និងមកម្តងហើយ មកម្តងទៀត ។

ជាមួយគ្នា រដ្ឋមន្ត្រីទេសចរណ៍ ក៏អំពាវនាវឲ្យប្រជាពលរដ្ឋខ្មែរទាំងអស់គ្នា ចូលរួមចលនាទីក្រុងស្អាត រមណីយដ្ឋានស្អាត និងបៃតង ។
ក្រសួងទេសចរណ៍ បានព្យាករថា ចំនួនភ្ញៀវទេសចរបរទេស មកទស្សនាកម្ពុជា នឹងកើនដល់ចំនួន១៥លាននាក់ នៅឆ្នាំ២០៣០ខាងមុខនេះ ដោយផ្តល់ប្រាក់ចំណូលដល់កម្ពុជាចំនួន ១ម៉ឺនលានដុល្លារ និង បង្កើតការងារបានរហូតដល់ទៅ ២លាននាក់ ៕