ខ្សែភាពយន្ត«អន្ទងវិញ្ញាណ» ដាក់សម្ពោធយប់មិញធ្វើឲ្យទស្សនិកជនអង្គុយមិនជាប់កៅអីរោងភាពយន្ត(មានវីដេអូ)

បន្ទាប់ពីចំណាយពេលវេលាថតអស់ពេលជាច្រើនខែ ទីបំផុតរឿង « អន្ទងវិញ្ញាណ» បានដាក់បញ្ចាំងជាផ្លូវការនៅថ្ងៃទី ២៤ ខែមករានេះតែម្តង ដោយភាពយន្តខ្នាតធំមួយនេះដាក់សម្ពោធនៅរោងភាពយន្ត Major Cineplex Aeon 2 ក្រោមការចូលរួមពីអ្នកតំណាងរោងភាពយន្ត សមាគមភាពយន្ត ក៏ដូចជាសិល្បករ សិល្បការិនីជាច្រើន។

រឿងនេះផងដែរបានបង្កប់ទៅដោយការតស៊ូរបស់ស្រ្តីម្នាក់ដើម្បីស្វែងរកគ្រូអន្ទងវិញ្ញាណ និងឈុតឆាកភ័យរន្ធត់ប្រទាក់ក្រឡាគ្នា ធ្វើឱ្យអ្នកទស្សនាភ័យជំនួសព្រមទាំងមិនមានពេលណាដែលធ្វើឲ្យទស្សនិកជនអាចស្រាកស្រាន្តបាននៅនឹងកៅអីរោងកុនឡើយ ។
ពីឈុតឆាកមួយទៅមួយសុទ្ធសឹងតែបង្ហាញពីទិដ្ឋភាពប្លែកៗ ជាពិសេសប្រទេសថៃ និងទស្សនីយភាពតាមខេត្តមួយចំនួនដែលធ្វើឲ្យទស្សនិកជនប្លែកភ្នែកចម្លែកអារម្មណ៍។
រឿង « អន្ទងវិញ្ញាណ» នេះបានធ្វើឲ្យទស្សនិកជនពិបាកនឹងអង្គុយជាប់ហើយស្រែកផ្អើលរោងកុនដោយសារតែ ឈុតឆាកស្រាវសាច់ទាំងខ្មោច បិសាច និងអាគមគាថាប្លែកៗដែលតំរូវឱ្យតួអង្គស្រីក្នុងរឿងធ្វើតាមពិតជាធ្វើឱ្យទស្សនិកជនតាមដានគ្រប់ឈុត។

រឿង « អន្ទងវិញ្ញាណ» គឺជាស្នាដៃថ្មីទី៤ របស់ផលិតកម្ម Wonderfilm Entertainment ដែលបានដាក់សម្ពោធកាលពីថ្ងៃទី ២២ ខែ មករា ឆ្នាំ ២០១៩ នេះនៅផ្សារទំនើប AEON 2 ដោយមានវត្តមានផលិតករ និងសិល្បករសិល្បការីនីល្បីៗជាច្រើន។ ស្នាដៃថ្មីរបស់ផលិតកម្មនេះនឹងដាក់បញ្ចាំងជាផ្លូវការនៅថ្ងៃទី ២៤ ខែ មករា ឆ្នាំ ២០១៩ តទៅនៅគ្រប់រោងភាពយន្ត ។
លោក សែម វិសាល ដែលជាផលិតករនៅក្នុងរឿង « អន្ទងវិញ្ញាណ» បានឱ្យដឹងថា រឿងនេះគឺចំណាយដើមទុនច្រើនហួសពីការរំពឹងទុក ដោយសារតែលោកចង់ឱ្យរឿងមួយនេះមានគុណភាពល្អបំផុត ដើម្បីប្រកួតប្រជែងទីផ្សារ លោកថែមទាំងសង្ឃឹមថា រឿងថ្មីនេះបានទទួលការគាំទ្រដូចរឿង «ស្នូរជើងអ្នកណា» និង មិនចាញ់រឿង «ផ្ទះចិញ្ចឹមខ្មោច » ឡើយ៕

សូមទស្សនាវីដេអូ៖