តម្លៃ​ជ័រកៅស៊ូ​ ​ហក់​ឡើង​នៅ​លើ​ទីផ្សារ​អន្តរជាតិ​ ​ខណៈ​នៅ​កម្ពុជា​ ​មិនសូវ​មាន​កៅស៊ូ​សម្រាប់​ចៀរ​ជ័រ​លក់​

ភ្នំពេញ​៖​ ​ឧកញ៉ា​ ​លឹម​ ​ហេង​ ​អនុប្រធាន​សភា​ពាណិជ្ជកម្ម​កម្ពុជា​ ​និង​ជា​អ្នក​វិនិយោគ​លើ​ដំណាំ​កៅស៊ូ​ ​នៅ​កម្ពុជា​ ​បាន​អោយ​ដឹង​ថា​ ​តម្លៃ​ជ័រកៅស៊ូ​ ​បាន​ហក់​ឡើង​បន្ថិច​ហើយ​នៅ​លើ​ទីផ្សារ​អន្តរជាតិ​ ​ប៉ុន្តែ​សម្រាប់​ ​កម្ពុជា​ ​រដូវ​នេះ​ ​មិនសូវ​មាន​កៅស៊ូ​សម្រាប់​ចៀរ​ជ័រ​លក់​នោះ​ទេ​ ​។​
​
​បើ​តាម​ឧកញ៉ា​ ​លឹម​ ​ហេង​ ​នៅ​ទីផ្សារ​ប្រទេស​ម៉ាឡេស៊ី​ ​តម្លៃ​ជ័រកៅស៊ូ​ ​បាន​ឡើង​ដល់​ប្រមាណ​ជាង​ ​១៦០០ដុល្លា​ ​ក្នុង​មួយ​តោន​ ​ខណៈ​នៅ​កម្ពុជា​ ​លក់​បាន​ត្រឹម​ ​តែ​តម្លៃ​ជាង​ ​១៤០០​ ​ដុល្លា​ ​ក្នុង​មួយ​តោន​ ​។​

​
​ឧកញ៉ា​ ​លឹម​ ​ហេង​ ​ក៏​រំពឹង​ផង​ដែរ​ថា​ ​តម្លៃ​កៅស៊ូ​ ​អាច​នឹង​បន្ត​ឡើង​ថែមទៀត​ ​នា​ពេល​ខាងមុខ​ ​ប៉ុន្តែ​ ​វា​ក៏អាច​ប្រែប្រួល​ទៅតាម​តម្លៃ​ប្រេង​ ​នៅ​លើ​ទីផ្សារ​អន្តរជាតិ​ផង​ដែរ​ ​។​
​
​បើ​តាម​សារព័ត៌មាន​ ​Vietnam​ ​News​ ​បាន​ឲ្យដឹង​ថា​ ​តម្លៃ​ជ័រកៅស៊ូ​ពិភពលោក​ ​បាន​កើនឡើង​យ៉ាង​ខ្លាំង​ក្នុងរយៈពេល​ប៉ុន្មាន​សប្តាហ៍​កន្លងមក​ ​។​ ​ស្រដៀងគ្នា​នេះ​ដែរ​ ​សារព័ត៌មាន​ ​Bloomberg​ ​ក៏បាន​បង្ហាញថា​ ​តម្លៃ​ជ័រកៅស៊ូ​ ​បាន​កើនឡើង​ ​៩.៤​%​ ​តាំងពី​ចុងឆ្នាំ២០១៨​ ​មក​ ​។​
​
​អង្គការ​ជាច្រើន​ ​ក៏បាន​ឲ្យដឹង​ដែរ​ថា​ ​កំណើន​តម្រូវការ​ក្នុង​ឆ្នាំ២០១៩​ ​នេះ​នឹង​បង្កើន​តម្លៃ​កៅស៊ូ​កាន់តែ​ខ្លាំង​ឡើង​ទៀត​ ​។​ ​ជាមួយគ្នា​នេះ​ផង​ដែរ​ ​សមាគមន៍​ប្រទេស​ផលិត​ជ័រកៅស៊ូ​ធម្មជាតិ​ ​(​ANRPC​)​ ​បាន​ឲ្យដឹង​មក​ថា​ ​ទិន្នផល​ជ័រកៅស៊ូ​ធម្មជាតិ​ជុំវិញ​ពិភពលោក​ ​នឹង​កើនឡើង​ ​៥.៨​%​ ​បើ​ធៀប​ឆ្នាំមុន​ ​មក​ស្មើ​ ​១៤.៦៩​ ​លាន​តោន​ក្នុង​ឆ្នាំ២០១៩​ ​ខណៈ​ដែល​តម្រូវការ​ ​នឹង​កើនឡើង​ ​៣.៦​%​ ​មក​ស្មើ​ ​១៤.៧៣​ ​លាន​តោន​ផង​ដែរ​ ​។​
​
​ ​តាម​របាយការណ៍​អគ្គនាយក​ដ្ឋាន​កៅស៊ូ​កម្ពុជា​ ​បាន​អោយ​ដឹង​ថា​ ​រយៈពេល​ពេញ​មួយឆ្នាំ២០១៨​ ​កម្ពុជា​បាន​នាំចេញ​ជ័រកៅស៊ូ​ ​ជាង២១ម៉ឺន​តោន​ ​ទទួល​បាន​ចំណូល​ជិត​ ​៣០០លាន​ដុល្លារ​អាមេរិក​ ​។​

​
​របាយការណ៍​ ​បាន​បញ្ជាក់​ថា​ ​បរិមាណ​បញ្ចេញ​លក់​ជ័រកៅស៊ូ​ ​សរុប​ចំនួន​ ​២១៧,៥០០តោន​ ​បាន​កើនឡើង​ចំនួន២៨,៦៦៧តោន​ ​ស្មើនឹង១៥ភាគរយ​ ​បើ​ធៀប​នឹង​រយៈពេល​ដូចគ្នា​ ​ឆ្នាំ២០១៧​ ​។​ ​សម្រាប់​តម្លៃ​ជ័រកៅស៊ូ​ ​ជាមធ្យម​ ​ក្នុងរយៈពេល​ពេញ​មួយឆ្នាំ២០១៨កន្លងទៅ​នេះ​ ​មានតម្លៃ១,៣១៩ដុល្លារ​ក្នុង១តោន​ ​តម្លៃ​នេះ​ ​បាន​ធ្លាក់ចុះ២៦២ដុល្លារ​ក្នុង១តោន​ ​ស្មើនឹង១៧ភាគរយ​។​
​
​សូមជម្រាប​ថា​ ​កម្ពុជា​មានផ្ទៃ​ដី​កៅស៊ូ​ ​សរុប​ចំនួន៤៣៦,៦៨២ហិ​ក​តា​ ​ដែល​ក្នុង​នោះ​ ​មានផ្ទៃ​ដី​ចៀរ​ជ័រ​មាន​ចំនួន​ជាង២០ម៉ឺន​ហិ​ក​តា​ ​បាន​កើនឡើង​ចំនួន៤,៨១២ហិ​ក​តា​ ​។​ ​ជ័រកៅស៊ូ​កម្ពុជា​ ​បាន​នាំចេញ​ទៅកាន់​ប្រទេស​ចិន​ ​វៀតណាម​ ​សង្ហឹ​បុរី​ ​និង​ម៉ាឡេស៊ី​ ​៕​