Connect with us

ដឹងទេ ហេតុអ្វី បានជាមានការប្រារព្ធពិធីបុណ្យចូលឆ្នាំថ្មី ប្រពៃណីជាតិចិន ?

ភ្នំពេញ ៖ នៅថ្ងៃទី ៤ ខែកុម្ភៈនេះ ពិធីសែនព្រេន សម្រាប់ពិធីបុណ្យចូលឆ្នាំថ្មីប្រពៃណីចិន បានកំពុងប្រារព្ធធ្វើឡើងដោយ ពលរដ្ឋចិន រួមនឹងពលរដ្ឋដែលជាប់សែស្រឡាយចិន នៅទូទាំងពិភពលោក ក្នុងនោះរួមមានទាំង នៅក្នុងប្រទេសកម្ពុជាផងដែរ ។


ពិធីបុណ្យចូលឆ្នាំថ្មី ប្រពៃណីចិន គឺជាពិធីបុណ្យមួយ ដែលប្រារព្ធឡើង នៅដើមឆ្នាំថ្មី នៃប្រតិទិនប្រពៃណីចិន។ ពិធីបុណ្យនេះ មានឈ្មោះមួយទៀតហៅថា ពិធីបុណ្យនិទាឃរដូវ នៅក្នុងសម័យទំនើបរបស់ចិន ហើយវាក៏ជាពិធីបុណ្យមួយ ក្នុងចំណោម ពិធីបុណ្យជាច្រើនទៀត នៃឆ្នាំច័ន្ទគតិ នៅទ្វីបអាស៊ីផងដែរ។
ថ្ងៃដំបូងនៃពិធីបុណ្យចូលឆ្នាំថ្មីចិន ចាប់ផ្តើមនៅពេលដែលព្រះច័ន្ទថ្មី បានរះឡើងនៅចម្លោះថ្ងៃទី២១ ខែមករា ដល់ថ្ងៃទី២០ ខែកុម្ភៈ នៃឆ្នាំនីមួយៗ ។ នៅឆ្នាំ២០១៩នេះ ថ្ងៃដំបូងនៃពិធីបុណ្យចូលឆ្នាំចិន នឹងធ្វើឡើង នៅថ្ងៃអង្គារ ទី៥ ខែកុម្ភៈ ជាថ្ងៃចាប់ផ្តើមចូលឆ្នាំជ្រូក។
យោងទៅតាមរឿងនិទាន និងរឿងព្រេងខ្លះទៀត បានឲ្យដឹងថា ការចាប់ផ្ដើមនៃពិធីបុណ្យចូលឆ្នាំចិន បានផ្ដើមឡើងជាមួយការវាយប្រយុទ្ធប្រឆាំងជាមួយសត្វក្នុងទេវកថា មានឈ្មោះថា «នៀន» មានន័យថា ឆ្នាំជាភាសាចិន។


នៅថ្ងៃទីមួយ ក្នុងឆ្នាំថ្មី «នៀន» បានមកខាំស៊ីពួកបសុសត្វ សូម្បីតែអ្នកភូមិក៏ដោយ ជាពិសេសគឺពួកក្មេងៗ។ ដើម្បីការពារខ្លួន ពួកអ្នកភូមិ បានដាក់ចំណីអាហារ នៅមុខផ្ទះរបស់ពួកគេជា រៀងរាល់ដើមឆ្នាំ។ គេមានជំនឿថា បន្ទាប់ពី «នៀន» បានស៊ីចំណីអាហារ ដែលពួកគេដាក់ឲ្យរួចហើយ វានឹងមិនធ្វើបាប ខាំស៊ីប្រជាជនទៀតទេ។
គ្រាមួយអ្នកភូមិបានឃើញ «នៀន» មានភាពភ័យខ្លាច ជាមួយនឹងក្មេងៗ ដែលស្លៀកពាក់ពណ៌ក្រហម រួចហើយ អ្នកភូមិក៏នាំគ្នាយល់ថា «នៀន» ខ្លាចពណ៌ក្រហម។ ហេតុនេះហើយ នៅពេលដែលឆ្នាំថ្មីមកដល់ អ្នកភូមិនាំគ្នា បំពាក់គោមពណ៌ក្រហម និងបិទក្រដាសពណ៌ក្រហម នៅតាមទ្វារ និងបង្អួចផ្ទះរៀងៗខ្លួន។ អ្នកភូមិ ក៏បានប្រើផាវ ដើម្បីបណ្ដេញ «នៀន» ឲ្យទៅឆ្ងាយផងដែរ។ បន្ទាប់ពីពេលនោះមក «នៀន» ពុំបានមកក្នុងភូមិម្ដងទៀតឡើយ។ នៅចុងក្រោយ ហុងជុនឡាវស៊ូ ជាព្រះសង្ឃសាសនាតាវបុរាណម្នាក់ បានចាប់សត្វ «នៀន» នោះ សត្វ «នៀន» ក៏ខ្លាចទៅជាយានជំនិះរបស់ព្រះសង្ឃហុងជុនឡាវស៊ូទៅ។


នៅក្នុងប្រទេសចិន ទំនៀមទម្លាប់និងប្រពៃណីក្នុងតំបន់ ស្តីពីការប្រារព្ធពិធីបុណ្យចូលឆ្នាំថ្មី គឺមានភាពផ្សេងៗពីគ្នា ហើយនៅពេលល្ងាចនៃថ្ងៃចូលឆ្នាំថ្មី ជាទូទៅគឺជាឱកាសមួយសម្រាប់ក្រុមគ្រួសារចិន ជួបជុំគ្នាទទួលទានអាហារពេលល្ងាចជាប្រចាំឆ្នាំ។ វាជាប្រពៃណីផងដែរ សម្រាប់គ្រប់ក្រុមគ្រួសារទាំងអស់ ធ្វើការសម្អាតផ្ទះរបស់ពួកគេ ដើម្បីបណ្តេញចេញរឿងមិនល្អ ហើយបើកផ្លូវទទួលយកនូវរឿងល្អៗវិញ។
ទំនៀមទម្លាប់មួយទៀត គឺការតុបតែងបង្អួចនិងទ្វារ ជាមួយនឹងក្រដាសកាត់ពណ៌ក្រហម និងមានសរសេឃ្លាជូនពរ ដូចជា ៖ ពាក្យសំណាងល្អ ឬ ក៏ពាក្យមានសុភមង្គល និងអាយុវែងជាដើម។ សកម្មភាពផ្សេងទៀត នៅក្នុងឱកាសបុណ្យចូលឆ្នាំថ្មីរបស់ជនជាតិចិននេះ រួមមានដូចជា ៖ ការដុតផាវ និងជូនលុយដាក់ក្នុងស្រោមសំបុត្រក្រដាស ពណ៌ក្រហម ដែលគេហៅថា អាំងប៉ាវ។


សូមបញ្ជក់ថា ពិធីបុណ្យចូលឆ្នាំចិន គឺជាពិធីមួយ ក្នុងចំណោមពិធីបុណ្យដ៏ធំ និងល្បីល្បាញបំផុត នៅលើពិភពលោក ហើយជាមូលហេតុ បណ្តាលឲ្យមាន ការធ្វើដំណើររបស់មនុស្ស ឆ្លងពីប្រទេសមួយ ទៅកាន់ប្រទេសមួយទៀត ដ៏ច្រើនជាងគេបំផុត ជាប្រចាំឆ្នាំនៅលើពិភពលោក។
ពិធីបុណ្យនេះ ជាឱកាសនៃថ្ងៃឈប់សម្រាកដ៏ធំមួយ នៅក្នុងតំបន់មហាយក្សចិន ហើយក៏បានមានឥទ្ធិពលយ៉ាងខ្លាំង ទៅដល់ការប្រារព្ធពិធីបុណ្យចូលឆ្នាំថ្មី ឆ្នាំចន្ទគតិ នៃវប្បធម៌ប្រទេសជិតខាងរបស់ចិន ក្នុងនោះរួមមាន ពិធីបុណ្យចូលឆ្នាំថ្មីកូរ៉េខាងត្បូង, ពិធីបុណ្យចូលឆ្មាំវៀតណាម និង ពិធីបុណ្យចូលឆ្នាំថ្មីតំបន់ទីបេ រួមនឹងប្រទេសម៉ុងហ្គោលីផងដែរ ៕

Loading...

ពេញនិយម