អីយ៉ាស់ អភិបាលខេត្តកំពត ដឹកនាំមន្រ្តីរាជការ ទៅបួងសួងសុំសេចក្តីសុខនៅព្រះវិហារចិន

ខេត្តកំពត ៖ រដ្ឋបាលខេត្តកំពត នៅថ្ងៃទី ៦ ខែកុម្ភៈនេះ បានរៀបចំពិធីសែនព្រេន ដើម្បីអបអរសាទរពិធីបុណ្យចូលឆ្នាំថ្មីប្រពៃណីចិន ដើម្បីបួងសួងសុំសេចក្តីសុខ ។ ពិធីសែនព្រេននេះ ក៏មានវត្តមាននៃការចូលរួមពីសំណាក់ លោក ជាវ តាយ អភិបាលនៃគណ:អភិបាលខេត្ត និងលោកជំទាវ ដោយបានធ្វើការបួងសួងសុំសេចក្តីសុខ នៅវិហារព្រះម៉ែ (ម៉ាចូវ) និងអ្នកតាសាលាដំបូងខេត្ត ស្ថិតនៅក្រុងកំពត ខេត្តកំពត ។

ក្រៅពីនេះ ក៏មានការចូលរួមពីអភិបាលរងខេត្ត នាយក នាយករងរដ្ឋបាលសាលាខេត្ត នាយកទីចាត់ការ ប្រធានអង្គភាពចំណុះសាលាខេត្ត ប្រធានមន្ទីរ អង្គភាពជុំវិញខេត្ត រួមនឹងអភិបាលក្រុង និង ស្រុក ទូទាំងខេត្តកំពតផងដែរ ។
មានការកត់សម្គាល់ថា ចាប់តាំងពីថ្ងៃសែនចិន គឺថ្ងៃទី ៤ កុម្ភៈ រហូតមកទល់នឹងថ្ងៃចូលឆ្នាំថ្មី ប្រពៃណីចិន ថ្ងៃទី២ ត្រូវនឹងថ្ងៃទី ៦ខែកុម្ភៈនេះ នៅតាមក្រសួងស្ថាប័ន និងមន្ទីររបស់រដ្ឋមួយចំនួន ហាក់មានភាពស្ងប់ស្ងាត់ជាងថ្ងៃធម្មតា ដោយពុំសូវឃើញមន្រ្តីរាជការ មកបំពេញការងារនោះទេ ដោយសារមន្រ្តីរាជការខ្លះ ជាប់សែស្រឡាយចិន ៕