គម្រោង​បំពាក់​អ៊ីនធឺណិត​អត់​ខ្សែ​ ​និង​មិន​គិតថ្លៃ​ ​កំពុង​រង់ចាំ​ការសម្រេច​ពី​អាជ្ញាធរ​ជាតិ​អប្សរា​ ​

សៀមរាប​ ​៖​ ​រដ្ឋ​មន្ដ្​រី​ក្រសួង​ប្រៃសណីយ៍​ ​និង​ទូរគមនាគមន៍​ ​បាន​ដាក់​សំណើ​ទៅកាន់​អាជ្ញាធរ​ ​ជាតិ​អប្សរា​ ​ដើម្បី​សុំ​បំពាក់​អ៊ីនធឺណិត​អត់​ខ្សែ​ ​និង​មិន​គិតថ្លៃ​ ​សម្រាប់​ឲ្យ​ភ្ញៀវ​ទេសចរ​ប្រើប្រាស់​នៅ​តំបន់​អង្គរ​ ​ប៉ុន្តែ​មិនទាន់​មានការ​សម្រេច​នៅឡើយ​នោះ​ទេ​ ​។​ ​
​លោក​ ​ត្រាំ​ ​អ៊ី​វតឹ​ក​ ​រដ្ឋ​មន្ដ្​រី​ក្រសួង​ប្រៃសណីយ៍​ ​និង​ទូរគមនាគមន៍​ ​កាលពី​ខែមករា​ ​ឆ្នាំ២០១៩​ ​បាន​ចូលរួម​ក្នុង​កិច្ចប្រជុំ​នៅ​រមណីយដ្ឋាន​អង្គរ​ ​ខេត្តសៀមរាប​ ​ដើម្បី​ពិភាក្សា​អំពី​គម្រោង​បំពាក់​ប្រព័ន្ធ​អ៊ីនធឺណិត​គ​ឥត​ខ្សែ​ ​បច្ចេកវិទ្យា​ជំនាន់​ទី​ ​៥​ ​(​5G​ ​WiFi​)​ ​ក្នុង​បំណង​បម្រើ​សេ​វា​អ៊ិ​ន​ធឺ​ណិ​ត​ល្បឿន​លឿន​ ​និង​សេវាកម្ម​ ​Online​ ​ផ្សេងទៀត​ ​ជូន​ភ្ញៀវ​ទេសចរ​ជាតិ​ ​និង​អន្តរជាតិ​ ​ក្នុង​តំបន់​រមណីយដ្ឋាន​អង្គរ​ ​។​

​តាម​គេហទំព័រ​ក្រ​សួង​ប្រៃ​ស​ណ៍យ៍​ ​និង​ទូរគមនាគមន៍​ ​លោក​ ​រដ្ឋ​មន្រ្ដី​ ​ត្រាំ​ ​អ៊ី​វតឹ​ក​ ​បាន​លើកឡើង​ថា​ ​គម្រោង​ប្រព័ន្ធ​អ៊ីនធឺណិត​ឥត​ខ្សែ​ ​បច្ចេកវិទ្យា​ជំនាន់​ទី​ ​៥​ ​(​5G​ ​WiFi​)​ ​នេះ​ ​គឺជា​ផ្នែក​មួយ​នៃ​ការ​ពង្រឹង​ ​និង​ពង្រីក​ហេដ្ឋារចនាសម្ព័ន្ធ​ជាតិ​ ​ដើម្បី​ជំរុញ​ការ​ផ្ដល់​សេវា​របស់​រាជរដ្ឋាភិបាល​កម្ពុជា​ ​តាម​ប្រព័ន្ធ​ឌីជីថល​ ​ពាណិជ្ជកម្ម​ឌីជីថល​ ​និង​សេដ្ឋកិច្ច​ឌីជីថល​ ​ដែល​នឹង​ចូលរួម​ចំណែក​លើកស្ទួយ​ជីវភាពរស់នៅ​របស់​ពលរដ្ឋ​ឲ្យ​កាន់តែ​ប្រសើរ​ឡើង​ ​។​
​ទាក់ទិន​នឹង​សំណើ​នេះ​ ​លោក​ ​ឡុង​ ​កុសល​ ​ប្រធាន​នាយកដ្ឋាន​ផ្សព្វផ្សាយ​នៃ​អាជ្ញាធរ​ជាតិ​អប្សរា​ ​បាន​ថ្លែងប្រាប់​សារព័ត៌មាន​ក្នុង​ស្រុក​ថា​ ​អាជ្ញាធរ​ជាតិ​ ​កំពុង​សិក្សា​ពីអ​ត្ថ​ប្រយោជន៍​ ​និង​ផល​ប៉ះពាល់​ជុំវិញ​សំណើ​របស់ក្រ​សួង​ប្រៃសណីយ៍​ ​និង​ទូរគមនាគមន៍​នេះ​ ​។​ ​
​ដោយឡែក​ ​លោក​ ​តុប​ ​សុ​ភ័ក​ ​អ្នកនាំពាក្យ​ក្រសួងទេសចរណ៍​ ​បាន​ចាត់ទុក​គម្រោង​នេះ​ ​ថា​ ​ជាការល្អ​ប្រសើរ​សម្រាប់​ភ្ញៀវ​ទេសចរ​ជាតិ​ ​និង​អន្ដរ​ជាតិ​ ​ដែល​ជាផ្នែក​មួយ​ដើម្បី​ចូលរួម​ផ្សព្វផ្សាយ​ពី​តំបន់​ទេសចរណ៍​នៅ​កម្ពុជា​ ​ឲ្យ​រឹតតែ​លឿន​ជាង​មុន​ ​៕​