ដឹង​ទេ​ ​ថា​ ​តើ​លី​គ​កំពូល​បាល់ទាត់​កម្ពុជា​រដូវ​កាល​ថ្មីនេះ​ ​មាន​ប៉ុន្មាន​ក្រុម​ចូលរួម​ប្រកួត​?​

ភ្នំពេញ​ ​៖​ ​បើ​តាម​គណៈកម្មការ​ប្រកួត​បាល់ទាត់​ជាតិ​កម្ពុជា​ ​បាន​ប្រកាស​ហើយ​ថា​ ​ឆ្នាំនេះ​ ​នឹង​មាន​ក្រុមបាល់ទាត់​ ​ចូលរួម​ប្រកួតប្រជែង​ឡើង​ដល់ទៅ​ ​១៤ក្រុម​ ​ដែល​មិនធ្លាប់​មាន​ក្នុង​ប្រវត្តិ​សាស្រ្ត​នៃ​លី​គ​កំពូល​បាល់ទាត់​របស់​កម្ពុជា​ ​។​
​ក្លិប​ចំនួន​ ​៣​ ​ដែល​នឹង​ឡើង​មក​ចូលរួម​ប្រកួត​ ​រួមមាន​ ​ដូចជា​ ​ក្លិប​គីរីវង់​សុខ​សែន​ជ័យ​,​ ​ក្លិប​បាល់ទាត់​ខេត្ត​កំពង់ចាម​ ​និង​ ​ក្លិប​សាលា​បាល់ទាត់​ជាតិ​បាទី​ ​អាយុ​ ​១៨ឆ្នាំ​ ​។​

​ការដំឡើង​នេះ​ ​បាន​ធ្វើឡើង​ ​បន្ទាប់ពី​កិច្ចប្រជុំ​ ​និង​ការសម្រេច​របស់​គណៈកម្មាធិការ​ប្រតិបត្តិ​ក្នុង​ការដំឡើង​ក្លិប​គីរីវង់​សុខ​សែន​ជ័យ​ ​និង​ក្លិប​បាល់ទាត់​ខេត្ត​កំពង់ចាម​ ​ដោយសារ​មិន​មានការ​ប្រកួត​លី​គ​ទី២នោះ​ទេ​ ​កាលពី​ឆ្នាំមុន​ ​។​ ​ជាមួយគ្នា​នេះ​ ​គណៈកម្មាធិការ​ប្រតិបត្តិ​ ​ក៏បាន​ពិនិត្យ​ ​ពិភាក្សា​ ​និង​យល់ឃើញ​ថា​ ​ទោះបីជា​ ​ក្រុម​ទាំងពីរ​ ​លេង​នៅ​លី​គ​ទី២​ ​តែ​ក៏អាច​មានលទ្ធភាព​អាច​ឡើង​មក​លី​គ​កំពូល​បាន​ដែរ​ ​។​ ​
​ចំណែក​ការ​ដាក់បញ្ចូល​ក្រុម​ ​U18​ ​សាលា​បាល់ទាត់​ជាតិ​ ​គឺ​ក្នុង​គោលបំណង​ឲ្យ​ពួកគេ​មានបទពិសោធន៍​ជាមួយនឹង​ការ​ប្រកួត​ធំៗ​ ​និង​បង្កើន​សមត្ថភាព​ឲ្យបាន​ខ្ពស់​បំផុត​ ​ដើម្បី​ត្រៀមខ្លួន​ឲ្យបាន​រួចរាល់​សម្រាប់​ព្រឹត្តិ​ការណ៍​ស៊ី​ហ្គេម​ ​ឆ្នាំ​ ​២០២៣​ ​ដែល​កម្ពុជា​ធ្វើជា​ម្ចាស់ផ្ទះ​ ​។​ ​

​គួរ​រំលឹក​ថា​ ​ក្រុម​ដែល​ធ្លាក់​នៅ​ឆ្នាំ​ ​២០១៨​ ​និង​ត្រូវ​បាន​កាត់ចេញ​ពី​លី​គ​កំពូល​ ​គឺ​ ​ក្លិប​បាល់ទាត់​ ​វេ​ស្ទើ​នភ្នំ​ពេញ​ ​។​ ​ក្រុម​តំណាង​ឲ្យ​សាកល​វិទ្យាល័យ​មួយ​នេះ​ ​ស្ថិតនៅ​លេខ១២​ ​បាត​តារាង​ ​ដែល​លេង​ ​២២ប្រកួត​ ​មាន​ត្រឹម​ ​១​ ​ពិន្ទុ​ប៉ុណ្ណោះ​ ​។​ ​ចំណែក​ ​ក្លិ​បណាហ្គាវើល​ ​ដែល​មាន​លោកគ្រូ​ ​មាស​ ​ចាន់​ណា​ ​ជា​គ្រូបង្វឹក​ ​គឺជា​ក្រុម​ជើងឯក​ ​លី​គ​កំពូល​បាត់​ទាត់​កម្ពុជា​ ​។​
​ក្លិប​ទាំង​ ​១៤​ ​ដែល​នឹង​ចូលរួម​ប្រកួត​នៅ​រដូវ​កាល​ថ្មីនេះ​ ​មាន​ ​៖​ ​គីរីវង់​សុខ​សែន​ជ័យ​,​ ​ខេត្ត​កំពង់ចាម​,​ ​យុវជន​សាលា​បាល់ទាត់​បាទី​អាយុ​ ​១៨ឆ្នាំ​,​ ​អាស៊ី​អឺរ៉ុប​,​ ​អង្គ​រថៃហ្គើរ​,​ ​ក្រសួងការពារជាតិ​,​ ​សូល​ទី​ឡូ​អង្គរ​,​ ​អគ្គិសនី​កម្ពុជា​,​ ​នគរបាល​ជាតិ​,​ ​បឹង​កេត​,​ ​ស្វាយរៀង​,​ ​វិសាខា​,​ ​ភ្នំ​ពេញ​ក្រោ​ន​ ​និង​ណា​ហ្គាវើល​ ​៕​

អត្ថបទ​ ​៖​ ​លីន​ ​រតនា​