ប្រធានក្លិប Real Madrid អះអាង Benzema ជាខ្សែប្រយុទ្ធល្អបំផុតនៅលើពិភពលោក

២ ឆ្នាំមុន

ខែកុម្ភៈ ១២, ២០១៩ កីឡា

អេស៉្បាញ៖ ប្រធានក្លិប Real Madrid លោក Florentino Perez បានអះអាងថា ក្លិបមិនចាំបាច់ចំណាយលុយចុះហត្ថលេខាលើខ្សែប្រយុទ្ធថ្មីឡើយ ខណៈដែល Karim Benzema គឺជាខ្សែប្រយុទ្ធល្អបំផុតនៅលើពិភពលោក ។ អ្នកជំនួញវ័យ ៧១ឆ្នាំរូបនេះ ក៏បានបញ្ជាក់ផងដែរថា គោលនយោបាយផ្ទេរកីឡាករបច្ចុប្បន្នរបស់ក្រុមយក្សអេស៉្បាញ គឺទិញកីឡាករវ័យក្មេង ដែលអាចអភិវឌ្ឍខ្លួនបានខ្ពស់នាពេលអនាគត និង មិនចាំបាច់ខ្ជះខ្ជាយលុយនាំយកកីឡាករចាស់ៗមកទេ។

គាត់ បានប្រាប់ទៅកាសែតបាល់ទាត់បារាំងថា ៖ ”ខ្ញុំបានអាន និងបានឮតាមប្រព័ន្ធផ្សព្វផ្សាយមួយចំនួន អស់រយៈពេលជាច្រើនឆ្នាំ ដែលពួកគេចុះផ្សាយថា Madrid ត្រូវការចុះហត្ថលេខាលើខ្សែប្រយុទ្ធម្នាក់ ខណៈដែលការពិត បង្ហាញយ៉ាងច្បាស់ថា Benzema គឺជាខ្សែប្រយុទ្ធដ៏ល្អបំផុតនៅក្នុងពិភពលោក” ។
លោកបានបន្ថែមថា «យើងមានក្រុមដ៏ល្អបំផុតនៅក្នុងពិភពលោក និងឈ្នះពានរង្វាន់ទាំងឡាយដែលយើងធ្លាប់បានលេង ។ អ្វីដែលយើងធ្វើ គឺនាំយកកីឡាករវ័យក្មេងដែលនឹងក្លាយជាកីឡាករ លំដាប់ពិភពលោក នាពេលអនាគត ដូចជា Vinicius Jr ឬ Rodrygo ដែលជាបេក្ខជនសម្រាប់ពានរង្វាន់ Kopa Trophy »៕