Connect with us

ប្រទេស​ឆែក​ ​បាន​ជួយ​ដល់​ពលរដ្ឋ​កម្ពុជា​ ​ជាង​ ​១សែន​ ​២ម៉ឺន​នាក់​ ​ដើម្បី​ធន់​ទៅ​នឹង​គ្រោះមហន្តរាយ​ធម្មជាតិ​

ភ្នំពេញ​ ​៖​ ​នៅ​ឆ្នាំ​ ​២០១៨កន្លងទៅ​នេះ​ ​ក្រសួង​ការបរទេស​នៃ​សាធារណរដ្ឋ​ឆែក​ ​បាន​ផ្តល់​មូលនិធិ​ដល់​គម្រោង​ចំនួន​បី​ ​ដែល​ស្ថិត​ក្រោម​កម្មវិធី​ជំនួយ​មនុស្សធម៌​នៅ​កម្ពុជា​ ​។​ ​ចំណុច​សំខាន់​នៃ​គម្រោង​ដែល​បាន​គាំទ្រ​ ​គឺ​ដើម្បី​លើកកម្ពស់​ឲ្យ​ប្រជាពលរដ្ឋ​កម្ពុជា​ ​មានការ​ត្រៀមខ្លួន​ទុកមុន​ចំពោះ​គ្រោះមហន្តរាយ​ធម្មជាតិ​ ​និង​ ​ដើម្បី​ពង្រឹង​ប្រព័ន្ធ​ប្រកាស​ឲ្យដឹង​ជាមុន​ ​នៅក្នុង​ប្រទេស​។​
​សាធារណរដ្ឋ​ឆែក​ ​គឺជា​ដៃគូ​អភិវឌ្ឍន៍​ដ៏​យូរអង្វែង​មួយ​សម្រាប់​ប្រទេស​កម្ពុជា​ ​។​ ​ទោះជាយ៉ាងណា​ក៏ដោយ​ ​ពេលខ្លះ​សមិទ្ធិ​ផល​នៃ​ការអភិវឌ្ឍន៍​គម្រោង​ ​ត្រូវ​បាន​គំរាមកំហែង​ដោយ​គ្រោះមហន្តរាយ​ធម្មជាតិ​ ​ដូចជា​ ​ទឹកជំនន់​ ​ឬ​ ​គ្រោះ​រាំងស្ងួត​ ​ក្នុង​ប្រទេស​កម្ពុជា​ ​នៅ​ប៉ុន្មាន​ឆ្នាំ​ចុងក្រោយ​នេះ​ ​ដោយមាន​អាំងតង់ស៊ីតេ​ ​មិនធ្លាប់​មាន​ពីមុន​មក​ ​។​


​ផ្អែកលើ​បញ្ហា​នេះ​ ​ក្រសួង​ការបរទេស​ឆែក​ ​បាន​បង្កើត​កម្មវិធី​មនុស្សធម៌​ថ្មី​មួយ​ឡើង​ ​ក្នុង​គោលបំណង​គាំទ្រ​លើ​ភាព​ធន់​ទៅ​នឹង​គ្រោះមហន្តរាយ​នៅក្នុង​ប្រទេស​អាទិភាព​នៃ​កិច្ច​សហប្រតិបត្តិ​ការអភិវឌ្ឍន៍​របស់​សាធារណរដ្ឋ​ឆែក​ ​ហើយ​ប្រទេស​កម្ពុជា​ ​គឺជា​ប្រទេស​មួយ​ក្នុងចំណោម​ប្រទេស​អាទិភាព​ទាំងនោះ​។​
​ក្នុង​ឆ្នាំ២០១៨​ ​កម្មវិធី​ថ្មីនេះ​ ​បាន​ជួយ​បង្កើន​សុវត្ថិភាព​ ​និង​កាត់បន្ថយ​ហានិភ័យ​នៃ​គ្រោះថ្នាក់​ដោយ​គ្រោះមហន្តរាយ​ធម្មជាតិ​ដល់​ប្រជាពលរដ្ឋ​កម្ពុជា​ប្រមាណ​ ​១២២,០០០​ ​នាក់​ ​។​ ​គម្រោង​ចំនួន​បី​ ​ត្រូវ​បាន​អនុវត្ត​នៅក្នុង​ប្រទេស​កម្ពុជា​ដោយ​អង្គការ​ក្រៅ​រដ្ឋាភិបាល​ឆែក​ ​ដូចជា​ ​អង្គ​ការ​ភីន​,​ ​អង្គការ​ការី​តា​សនៃ​សាធារណៈ​រដ្ឋ​ឆែក​,​ ​និង​អង្គការ​ ​Diaconia​ ​(​មជ្ឈមណ្ឌល​សង្គ្រោះ​ ​និង​អភិវឌ្ឍន៍​)​ ​។​
​គម្រោង​នី​មួយ​ៗ​ ​ត្រូវ​បាន​ផ្តោត​លើ​ការកាត់បន្ថយ​ហា​និ​ភ័យ​ផ្សេង​ៗ​នៃ​គ្រោះមហន្តរាយ​ធម្មជាតិ​តាមរយៈ​វិធី​សាស្រ្ត​ច្នៃប្រឌិត​ ​រួមមាន​ក្រុម​គោលដៅ​ ​និង​ដំណោះស្រាយ​បច្ចេក​ទេស​ផ្សេង​ៗ​។​


​គម្រោង​ ​”​ការ​កសាង​ភាព​ធន់​ ​និង​ការ​ត្រៀម​ខ្លូន​ទុកជាមុន​សម្រាប់​ទប់ទល់​ទៅ​នឹង​បញ្ហា​គ្រោះមហន្តរាយ​នៅក្នុង​សហគមន៍​នៅក្នុង​ខេត្ត​កំពង់ឆ្នាំង​”​ ​ត្រូវ​បាន​អនុវត្ត​ន៏​ដោយ​អង្គការ​កា​រី​តាស​ ​សាធារណៈ​រដ្ឋ​ឆែក​ ​ក្នុង​គោលបំណង​ពង្រឹង​ប្រព័ន្ធ​ប្រកាស​ឲ្យដឹង​មុន​ដែល​មានស្រាប់​នៅ​តាម​តំបន់ជនបទ​ ​ជាពិសេស​នៅ​សាលាបឋមសិក្សា​ ​និង​ភូមិ​ដែល​នៅ​ជាប់គ្នា​នៅក្នុង​ខេត្ត​កំពង់ឆ្នាំង​។​ ​សិស្សសាលា​,​ ​ឪពុក​ម្តាយ​ ​និង​គ្រូបង្រៀន​របស់​ពួកគេ​ ​ត្រូវ​បាន​ផ្តល់​នូវ​ការ​បណ្តុះបណ្តាល​ពិ​សេស​ៗ​ ​ដើម្បី​រៀន​ពីរ​បៀ​បរស់​នៅពេល​ទឹក​ជន់​ភ្លាម​ៗ​ ​និង​យល់ដឹង​ពីទី​កន្លែង​ដែល​មាន​សុវត្ថិភាព​នៅ​ជុំវិញ​សាលារៀន​ ​និង​ភូមិ​នានា​ ​។​ ​ទន្ទឹម​នឹង​នេះ​ ​កុមារ​បាន​រៀន​ពីរ​បៀ​បត្រៀ​មរៀប​ចំ​សម្រាប់​គ្រោះ​រាំងស្ងួត​ ​និង​វិធី​រក្សា​ទឹក​ទុក​។​ ​
​ទាំងនេះ​ ​ត្រូវ​បាន​អម​ដោយ​សកម្មភាព​នៃ​ការ​ដាំ​បន្លែ​ ​ឬ​ ​ការ​ដាំ​ដើមឈើ​នៅ​សាលារៀន​ដែល​បាន​ជួយ​ឲ្យ​កុមារ​មានការ​យល់ដឹង​កាន់តែ​ប្រសើរ​ឡើង​អំពី​បរិស្ថាន​,​ ​សារៈសំខាន់​នៃ​ការ​ដាំដុះ​និង​រក្សា​ទឹក​នៅ​ក្រោម​ដី​ ​។​ ​គម្រោង​នេះ​ ​ក៏​រួមបញ្ចូល​ផង​ដែរ​នូវ​សមាសភាគ​មួយ​ ​ដែល​គាំទ្រ​ដល់​បរិស្ថាន​ប្រកបដោយ​សុវត្ថិភាព​និង​អនាម័យ​នៅក្នុង​សាលារៀន​។​


​ម៉្យាងវិញទៀត​ ​នៅក្នុង​គម្រោង​របស់​អង្គ​ការ​ភីន​ ​ដែល​ហៅថា​ ​”​ការកាត់បន្ថយ​គ្រោះមហន្តរាយ​និង​ការប្រកាស​ឲ្យដឹង​ជាមុន​”​ ​បាន​ជ្រើសរើស​វិធីសាស្ត្រ​បច្ចេកទេស​បន្ថែម​ទៀត​ស្របតាម​សកម្មភាព​រយៈពេល​វែង​របស់​ខ្លួន​ ​ក្នុង​ការ​ពង្រឹង​ប្រព័ន្ធ​ប្រកាស​ឲ្យដឹង​មុន​ក្នុងករណី​ទឹកជំនន់​ ​។​ ​ដំណោះស្រាយ​ ​បាន​រួមបញ្ចូល​ប្រព័ន្ធ​រង្វាស់​ទឹក​ពិសេស​ ​ដើម្បី​ផ្ញើ​សារ​ប្រកាស​ទៅកាន់​ប្រជាជន​ក្នុង​តំបន់​ ​។​ ​
​គម្រោង​នេះ​ ​មិន​ត្រឹមតែ​ផ្តោត​លើ​តំបន់​ទីប្រជុំជន​ប៉ុណ្ណោះទេ​ ​ប៉ុន្តែ​ក៏​ផ្តោត​លើ​សហគមន៍​ដែល​ប្រឈម​នឹង​គ្រោះ​ទឹក​ជំ​នន់​ភ្លាម​ៗ​នៅ​តាម​ជនបទ​ ​ជាពិសេស​នៅ​ខេត្តក្រចេះ​,​ ​ស្ទឹងត្រែង​,​ ​ព្រះវិហារ​ ​និង​ឧត្តរមានជ័យ​។​
​គម្រោង​របស់​អង្គការ​ ​Diaconia​ ​«​ការសម្រប​ខ្លួន​ទៅ​នឹង​ការប្រែប្រួល​អាកាសធាតុ​»​ ​បាន​ផ្តោត​ជាពិសេស​លើ​កសិករ​កម្ពុជា​ខ្នាត​តូច​ ​នៅ​ខេត្តពោធិ៍សាត់​ ​ដែល​ងាយ​រងគ្រោះ​ពី​គ្រោះ​ធម្មជាតិ​និង​ការប្រែប្រួល​អាកាសធាតុ​ ​។​ ​ចំពោះ​អ្នក​ដែល​រស់នៅ​ក្នុង​តុល្យភាព​ទន់ខ្សោយ​ជាមួយ​ធម្មជាតិ​ ​ភាព​ ​បម្រែបម្រួល​អាកាសធាតុ​ខ្លាំង​ ​អាច​បណ្តាល​ឱ្យ​បាត់បង់​ប្រាក់ចំណូល​ ​និង​ការ​ធ្លាក់​ចូលក្នុង​ភាព​ក្រីក្រ​។​ ​នៅក្នុង​ផ្នែក​សំខាន់​នៃ​គម្រោង​របស់​អង្គការ​ ​Diaconia​ ​នេះ​ ​ផ្តោត​លើ​ការ​បណ្តុះបណ្តាល​កសិករ​ក្នុង​ការ​ធ្វើ​កសិកម្ម​ប្រកបដោយ​និរន្តរភាព​ ​និង​គ្រោះមហន្តរាយ​ ​និង​ស្វែងរក​ដំណោះស្រាយ​បច្ចេកទេស​ដើម្បី​ប្រមូល​ ​និង​រក្សា​ទឹកភ្លៀង​ទុក​ក្នុង​គោលបំណង​កសិកម្ម​ ​និង​ប្រព័ន្ធ​ធារា​សាស្រ្ត​។​


​ការ​ពង្រឹង​ភាព​ធន់​ ​និង​ការ​ត្រៀម​រៀបចំ​ទុកមុន​សម្រាប់​គ្រោះមហន្តរាយ​ ​គឺ​មាន​សារៈសំខាន់​សម្រាប់​សុវត្ថិភាព​អ្នក​រស់នៅ​ក៏ដូចជា​ការអភិវឌ្ឍន៍​ក្នុង​ប្រទេស​នា​ពេល​អនាគត​ផង​ដែរ​ ​។​ ​ការ​ត្រៀមខ្លួន​ទុកមុន​ ​និង​ប្រព័ន្ធ​ប្រកាស​ឲ្យដឹង​មុន​ ​គឺជា​គោលដៅ​ចម្បង​នៃ​កម្មវិធី​ជំនួយ​មនុស្សធម៌​របស់​សាធារណរដ្ឋ​ឆែក​នៅ​កម្ពុជា​ ​ដែល​អាច​បង្ការ​ ​និង​ជួយ​ដល់​សង្គម​កាត់បន្ថយ​នូវ​ការខូចខាត​ ​និង​ឱ្យ​មានការ​ប្រើប្រាស់​ធនធាន​ហិរញ្ញវត្ថុ​ក្នុង​ការ​គាំទ្រ​ដល់​កិច្ចការ​អភិវឌ្ឍន៍​លើ​វិស័យ​ដទៃទៀត​ដែល​មាន​សារៈសំខាន់​សម្រាប់​ការ​រំពឹង​ទុក​នៃ​ប្រទេស​ ​៕​

 

  • អត្ថបទទាក់ទង :
  • Featured
Loading...

ពេញនិយម