សេវាកម្មប្រមូលសំរាមក្នុងក្រុងភ្នំពេញនឹងផ្អាករយៈពេល៣ថ្ងៃ

៤ ឆ្នាំមុន

ខែកក្កដា ២១, ២០១៨ សង្គម

(ភ្នំពេញ) ៖ រដ្ឋបាលសាលារាជធានីភ្នំពេញ បានជូនដំណឹង ស្ដីពីការទុកដាក់សំរាមនៅក្នុងឱកាសថ្ងៃឈប់សម្រាកបោះឆ្នោតជ្រើស តាំងតំណាងរាស្ត្រ ថ្ងៃទី២៩ ខែកក្កដា ឆ្នាំ២០១៨ ដោយបញ្ជាក់ថា ថ្ងៃបោះឆ្នោតកម្មករ-កម្មារិនីរបស់ក្រុមហ៊ុនស៊ិនទ្រីនឹងឈប់សម្រាក ពីការងារចំនួន៣ថ្ងៃដើម្បីទៅបោះឆ្នោត ដូចនេះកំលុងពេលនៃការបោះឆ្នោតនេះ សេវាកម្មសម្អាត ប្រមូលនិងដឹកជញ្ជូនសំរាមក្នុងរាជ ធានីភ្នំពេញនឹងមិនបានពេញលេញឡើយក្នុងរយៈពេល៣ថ្ងៃ ពោលគឺចាប់ពីថ្ងៃទី ២៨ ដល់ ៣០ ខែកក្កដា។

ជាមួយនឹងការជូនដំណឹងបែបនេះ រដ្ឋបាលសាលារាជធានីភ្នំពេញបានអំពាវនាវដល់ប្រជាពលរដ្ឋ ក៏ដូចជាម្ចាស់អាជីវកម្ម ក្នុងរាជធានីភ្នំពេញ ទាំងអស់សូមយោគយល់ អធ្យាស្រ័យ និងកុំបញ្ចេញសំរាមមកដាក់លើដងផ្លូវសាធារណៈក្នុងកំលុងពេលនេះ ដោយរក្សាទុកដាក់កាក សំណល់សំរាមទាំងនោះឱ្យបានត្រឹមត្រូវក្នុងទីតាំងរបស់ខ្លួនជាបណ្តោះអាសន្នសិន ដើម្បីចូលរួមថែរក្សាអនាម័យ បរិស្ថានក្នុងរាជធានីភ្នំពេញ ឱ្យបានល្អប្រសើរ៕