តម្លៃ​គ្រាប់ស្វាយ​ចន្ទី​ ​បាន​ធ្លាក់ចុះ​ ​អំឡុង​ពេល​នៃ​ការ​ប្រមូល​ផល​ក្នុង​ឆ្នាំ២០១៩នេះ​ ​ធ្វើអោយ​អ្នក​ដាំដុះ​សម្តែង​ការ​ខកចិត្ត​

ភ្នំពេញ ៖ តម្លៃគ្រាប់ស្វាយចន្ទី មានការធ្លាក់ចុះអំឡុងពេលប្រមូលផលក្នុងឆ្នាំ២០១៩នេះ បើ​ធៀបទៅ​នឹងឆ្នាំ២០១៨ ធ្វើអោយម្ចាស់ចម្ការស្វាយចន្ទីជាច្រើន សម្តែងការខកចិត្ត ។

បើតាមលោក ស៊ុន ហេង ប្រធានមន្ទីរពាណិជ្ជកម្មខេត្តកំពង់ធំ ដែលបានថ្លែងប្រាប់សារព័ត៌មាន ក្នុងស្រុក បានអោយដឹងថា តម្លៃគ្រាប់ស្វាយចន្ទី នៅពេលចាប់ផ្តើមប្រមូលផលឆ្នាំនេះ មាន តម្លៃ ៥ ០០០ រៀលក្នុងមួយគីឡូក្រាម ធ្លាក់ចុះ បើធៀបនឹងឆ្នាំ២០១៨ គឺ មានតម្លៃពី ៦ ០០០ ទៅ ៧ ០០០ រៀល ។

លោក ស៊ុន ហេង ក៏បានឲ្យដឹងថា តម្លៃ បានប្រែប្រួលផ្អែកលើកំណើនទិន្នផល និងគុណភាពនៃគ្រាប់ស្វាយចន្ទី ។ លោកថា ខណៈកម្ពុជាមានសក្ដានុពលល្អសម្រាប់ផលិតផលស្វាយចន្ទី ដូច​នេះ គួរតែមានរោងចក្រកែច្នៃ ដែលនឹងធានាដល់ស្ថិរភាពសម្រាប់វិស័យនេះ ជាពិសេសតម្លៃ ។

បើតាមរបាយការណ៍ពីក្រសួងកសិកម្ម បានអោយដឹងថា ផ្ទៃដីដាំដុះស្វាយចន្ទីនៅក្នុងខេត្ត ២២ មានចំនួនសរុប ១៤៩ ៦៦០ ហិកតា ហើយជិត ៦០ ភាគរយជាផ្ទៃដីដែលអាចប្រមូលផលបាន ដោយមានបរិមាណផល ១១៦ ៣៤៣ តោនកាលពីឆ្នាំ ២០១៨ ។ ជាមួយគ្នានេះ កម្ពុជា បាននាំចេញគ្រាប់ស្វាយចន្ទី ៧៣ ០០០ តោនកាលពីឆ្នាំ ២០១៧។

គួររំលឹកថា ក្រសួងកសិកម្មកម្ពុជា និងសមាគមស្វាយចន្ទីរបស់វៀតណាម (Vinacas) បានចុះអនុស្សរណៈនៃការយោគយល់គ្នា កាលពីឆ្នាំមុន ដើម្បីបង្កើនការនាំចេញគ្រាប់ស្វាយចន្ទីរបស់កម្ពុជាដល់ ១ លានតោនត្រឹមឆ្នាំ ២០២៨ ។ ប៉ុន្តែ មកដល់ពេលនេះ មិនមានកិច្ចព្រមព្រៀងផ្លូវការណាមួយពីក្រុមហ៊ុនវៀតណាមនេះកើតឡើងទេ។

សូមបញ្ជាក់ថា កម្ពុជា អាចផលិតគ្រាប់ស្វាយចន្ទី មិនទាន់កែច្នៃ ១ តោនក្នុងមួយហិកតា នៃផ្ទៃដីដាំដុះ ខណៈវៀតណាមអាចទទួលបានទិន្នផលជាង ២ តោន៕