Sarri ថា អ្នកចាំទី Kepa នៅតែជាជម្រើសដៃទី១ បើទោះជាមានរឿងយល់ច្រឡំក៏ដោយ

២ ឆ្នាំមុន

ខែកុម្ភៈ ២៨, ២០១៩ កីឡា

អង់គ្លេស៖ លោក Maurizio Sarri បាននិយាយថា អ្នកចាំទី Kepa Arrizabalaga នៅតែជាជម្រើសទីមួយ បន្ទាប់ពីឲ្យកីឡាកររូបនេះ សម្រាកនៅកៅអីបម្រុង ក្នុងការប្រកួតទទួលជ័យជម្នះ ២-០ លើក្រុមមាន់ខ្នាយមាស Tottenham ។
Sarri បានដាក់អ្នកចាំទីដៃទី២ Willy Caballero ជាជម្រើសដំបូងនៅកីឡដ្ឋាន Stamford Bridge ក្រោយ Kepa បានសាងកំហុស ដោយបដិសេធ មិនព្រមប្ដូរចេញក្នុងអំឡុងការប្រកួតផ្ដាច់ព្រ័ត្រEFL Cup ។

អ្នកចាំទីអន្តរជាតិអេស៉្បាញរូបនេះ ត្រូវបានក្លិបពិន័យប្រាក់នឿយហត់ ១សប្ដាហ៍ ទោះបីជារូបគេ និងគ្រូបង្វឹក លោក Sarri បានពន្យល់ថា ហេតុការណ៍នេះ ជាការយល់ច្រឡំ ក៏ដោយ ។
នៅពេលសួរថា តើ Kepa នៅតែជាជម្រើសដំបូង ឬទេ? គ្រូសញ្ជាតិអ៊ីតាលី បានប្រាប់សន្និសីទសារព័ត៌មានថា ៖ “ពិតណាស់! ខ្ញុំគិតថា វាជាការសម្រេចចិត្តដ៏ត្រឹមត្រូវដែលដាក់ឲ្យ Kepa បម្រុង ព្រោះគេបានធ្វើកំហុសដ៏ធំមួយ តែគាត់ក៏បានបង់ប្រាក់ពិន័យទៅក្លិបហើយ បន្ទាប់មកក៏បានទទួលកំហុសជាមួយនឹងក្រុមផងដែរ។ Kepa នឹងជាប់ជម្រើសដំបូង នៅការប្រកួតក្រោយ ឫ ២ ប្រកួតក្រោយ។ យើង មិនអាចដាក់ពិន័យខ្លាំងលើកីឡាករវ័យក្មេងបានទេ ពេលអ្នកនៅក្មេងក៏ធ្លាប់ធ្វើខុសដូចគ្នា” ៕