Connect with us

ក្រុមការងារ​ ​នឹង​ចាប់ផ្តើម​ចុះ​រៀបចំ​ទីតាំង​គម្រោង​សាងសង់​អាកាសយាន​ដ្ឋាន​អន្តរជាតិ​ភ្នំពេញថ្មី​

ភ្នំពេញ​ ​៖​ ​ក្រុមការងារ​ ​នឹង​ចាប់ផ្តើម​ចុះ​រៀបចំ​ទីតាំង​គម្រោង​សាងសង់​ ​និង​ចុះ​កំណត់​និយាមកា​ទីតាំង​ ​គម្រោង​អាកាសយាន​ដ្ឋាន​អន្តរជាតិ​ភ្នំពេញថ្មី​ ​ដោយធ្វើ​ការ​បោះបង្គោល​ព្រំ​ ​កំណត់​តំបន់​លំនៅឋាន​ ​និង​កម្ពស់​អគារ​ ​ព្រមទាំង​ ​រៀបចំ​ប្លង់​លម្អិត​នគរូបនីយកម្ម​ ​និង​ប្លង់​ហេដ្ឋារចនាសម្ព័ន្ធ​ ​។​
​ការ​ចុះ​រៀបចំ​នេះ​ ​ត្រូវ​បានសម្រេច​ក្នុង​កិច្ចប្រជុំ​ ​នៅ​ថ្ងៃម្សិលមិញ​នេះ​ ​ដោយ​លោក​ ​ឧបនាយក​រដ្ឋមន្រ្តី​ ​ជា​ ​សុ​ផា​រ៉ា​ ​រដ្ឋមន្ត្រី​ក្រសួង​រៀបចំ​ដែនដី​ ​នគរូបនីយកម្ម​ ​និង​សំណង់​ ​និង​ជា​ប្រធាន​គណៈកម្មការ​រៀបចំ​ទីតាំង​គម្រោង​សាងសង់​អាកាសយាន​ដ្ឋាន​អន្តរជាតិ​ភ្នំពេញថ្មី​ ​។​ ​


​យោង​តាម​សេចក្តី​ប្រកាស​ព័ត៌មាន​ ​កិច្ចប្រជុំ​ ​បាន​ប្រគល់​ភារកិច្ច​ជូន​លោក​ ​ម៉ៅ​ ​ហា​វណ្ណា​ល់​ ​រដ្ឋមន្ត្រី​ទទួលបន្ទុក​រដ្ឋលេខាធិការ​ដ្ឋាន​អាកាសចរ​ស៊ីវិល​ ​រៀបចំ​កិច្ច​ព្រមព្រៀង​ ​ដាក់​ពិគ្រោះ​យោបល់​ជាមួយ​ស្ថាប័ន​ ​និង​អង្គភាព​ពាក់ព័ន្ធ​ ​និង​សុំ​ការសម្រេច​ពី​រាជរដ្ឋាភិបាល​ ​ដើម្បី​ចុះហត្ថលេខា​ជាមួយ​ក្រុមហ៊ុន​ខេម​បូ​ឌា​ ​អ៊ែរ​ផត​ ​អ៊ិ​នវេ​សមិន​ ​ឯ.ក​ ​និង​សិក្សា​កំណត់​តំបន់​សុវត្ថិភាព​នៃ​ការហោះហើរ​។​ ​ជាមួយ​នេះ​ ​ត្រូវ​អនុវត្ត​ឱ្យ​មានការ​ឯកភាព​គ្នា​នូវ​ប្រព័ន្ធ​និយាមកា​ ​Datum​ ​WGS​ ​84​ ​ក្នុង​ការវាស់វែង​ ​គូស​ទីតាំង​ក្បាលដី​ក្នុង​ផែនទី​តែមួយ​ ​។​
​កិច្ចប្រជុំ​ ​ក៏បាន​ប្រគល់​ភារកិច្ច​ជូន​រដ្ឋបាល​ខេត្តកណ្តាល​ ​រដ្ឋបាល​ខេត្តតាកែវ​ ​និង​អគ្គនាយក​ដ្ឋាន​សុរិយោដី​ ​និង​ភូមិសាស្ត្រ​ ​កំណត់​អត្តសញ្ញាណ​ប្រជាពលរដ្ឋ​ដែល​មាន​ដី​នៅក្នុង​ទីតាំង​គម្រោង​ឱ្យ​បាន​ច្បាស់លាស់​ ​ដោយ​ផ្អែក​ទៅតាម​ការ​កាន់កាប់​ជាក់ស្តែង​ ​និង​ឯកសារ​ពាក់ព័ន្ធ​ ​ដើម្បី​មាន​មូលដ្ឋាន​ក្នុង​ការ​ដោះស្រាយ​ផល​ប៉ះពាល់​ជូន​ប្រជាពលរដ្ឋ​ ​។​ ​ជំហាន​បន្ទាប់​ ​តាម​ការចាំបាច់​ ​ផ្អាក​ជា​បណ្តោះអាសន្ន​ការ​ធ្វើ​ចរន្ត​ការ​ដី​ស្ថិត​ក្នុង​ទីតាំង​ ​ដែល​បង្ក​ការ​លំបាក​ ​និង​រាំងស្ទះ​ដល់​ដំណើរការ​អនុវត្ត​គម្រោង​ ​។​


​កិច្ចប្រជុំ​ ​ស្នើ​ស្ថាប័ន​ពាក់ព័ន្ធ​ ​គិតគូរ​ជាមុន​អំពី​ហេដ្ឋារចនាសម្ព័ន្ធ​គាំទ្រ​ ​ជា​អា​ទី​ ​ការ​បង្កប់​បំពង់​ហ្គាស​ ​បណ្តាញ​ផ្គត់ផ្គង់​ទឹក​ស្អាត​ ​ប្រព័ន្ធ​អគ្គិសនី​ ​ប្រព័ន្ធ​លូ​ ​ខ្សែកាប​អុបទិក​ ​អាង​ប្រព្រឹត្ត​កម្ម​ទឹក​កខ្វក់​ឱ្យ​បាន​ត្រឹមត្រូវ​មុន​បង្ហូរ​ចូល​លូ​សាធារណៈ​ ​អង់តែន​ទូរសព្ទ​ ​និង​ហេដ្ឋារចនាសម្ព័ន្ធ​ក្រោម​ដី​ផ្សេងទៀត​ ​ចៀសវាង​រៀបចំ​តាម​ក្រោយដែល​បង្ក​ឱ្យ​ខូចខាត​ដល់​ផ្លូវថ្នល់​ ​ជាពិសេស​ ​ប្រព័ន្ធ​ការពារ​ ​និង​រំដោះ​ទឹកជំនន់​។​
​ជាមួយគ្នា​នេះ​ ​កិច្ចប្រជុំ​ ​ជំរុញ​ឲ្យ​ក្រុមហ៊ុន​បង្កើត​ទីស្នាក់ការ​បណ្តោះអាសន្ន​សម្រាប់​ធ្វើការ​នៅ​លើ​ទីតាំង​ ​ជ្រើសរើស​បុគ្គលិក​ចេញពី​មូលដ្ឋាន​ដែល​មាន​កាយសម្បទា​ ​និង​លក្ខណ​សម្បត្តិ​ ​តាម​ចំនួន​សមស្រប​ ​មក​បម្រើការ​ងារ​ចាំបាច់ក្នុង​ ​ការអនុវត្ត​គម្រោង​។​ ​ជំហាន​បន្ទាប់​ ​អាច​ជ្រើសរើស​បុគ្គលិក​បន្ថែម​ ​តាម​តម្រូវការ​ជាក់ស្តែង​ ​និង​ ​បាន​លើកទឹកចិត្ត​ប្រើប្រាស់​ធនធានមនុស្ស​ក្នុង​ស្រុក​ទាំង​អ្នកជំនាញ​ ​និង​អ្នក​គ្មាន​ជំនាញ​ឱ្យ​អស់​លទ្ធភាព​ ​ក្នុង​ការអនុវត្ត​គម្រោង​សាងសង់​អាកាសយាន​ដ្ឋាន​អន្តរជាតិ​ភ្នំពេញថ្មី​ ​។​


​សូម​បញ្ជាក់​ថា​ ​រាជរដ្ឋាភិបាល​ ​បានសម្រេច​ក្នុង​ការបង្កើត​អាកាសយាន​ដ្ឋាន​អន្តរជាតិ​ភ្នំពេញថ្មី​ខ្នាត​ ​4F​ ​លើ​ផ្ទៃដី​ទំហំ​ ​២៦០០​ ​ហិ​ក​តា​ ​ដែល​អាច​ទទួល​យន្តហោះ​ខ្នាត​ធំ​បាន​ ​ស្ថិតនៅ​ក្នុង​ភូមិសាស្ត្រ​ខេត្តកណ្តាល​ ​និង​ខេត្តតាកែវ​ ​។​
​កាលពី​ពេល​ថ្មី​ៗ​នេះ​ ​សម្តេច​តេជោ​ ​ហ៊ុន​ ​សែន​ ​នាយក​រដ្ឋមន្រ្តី​នៃ​កម្ពុជា​ ​ក៏បាន​ចេញ​សេចក្តី​សម្រេច​បង្កើត​គណៈកម្មការ​រៀបចំ​ទីតាំង​គម្រោង​សាងសង់​អាកាសយាន​ដ្ឋាន​អន្តរជាតិ​ភ្នំពេញថ្មី​ ​ដែល​ដឹកនាំ​ដោយ​ ​លោក​ ​ឧបនាយក​រដ្ឋមន្ត្រី​ ​ជា​ ​សុ​ផា​រ៉ា​ ​រដ្ឋមន្ត្រី​ក្រសួង​រៀបចំ​ដែនដី​ ​នគរូបនីយកម្ម​ ​និង​សំណង់​ ​។​
​គម្រោង​អាកាសយាន​ដ្ឋាន​អន្តរជាតិ​ភ្នំពេញថ្មី​ ​ត្រូវ​បាន​ប្រកាស​ឡើង​ក្នុង​ដំ​ណើរ​ទេស្​សន​កិច្ច​របស់​លោកនាយក​រដ្ឋមន្ត្រី​ចិន​ ​លី​ ​ខឺ​ឈាង​ ​មក​កម្ពុជា​ ​កាលពី​ខែមករា​ ​ឆ្នាំ២០១៨​។​ ​គម្រោង​នេះ​ ​វិនិយោគ​ដោយក្រុម​ហ៊ុន​ ​OCIC​ ​និង​ក្រុមហ៊ុន​ចិន​ ​លើ​ផ្ទៃដី​ទំហំ​ប្រមាណ​ ​២,៦០០ហិ​ក​តា​ ​ដែល​ជា​ដី​ស្ថិតនៅ​ក្នុង​ក្រុង​តាខ្មៅ​ ​និង​ស្រុក​កណ្តាល​ស្ទឹង​ ​ខេត្តកណ្តាល​ ​ហើយ​តំបន់​មួយចំនួន​ក្នុង​ស្រុក​បាទី​ ​ខេត្តតាកែវ​៕​

    Loading...

    ពេញនិយម