កុំភ្លេចទៅលេងកម្សាន្តបុណ្យទន្លេ នាខេត្តកំពង់ឆ្នាំង ចាប់ពីថ្ងៃទី ១៥ ដល់ថ្ងៃទី ១៧ ខែមីនា

កំពង់ឆ្នាំង៖ ពិធីបុណ្យទន្លេលើកទី៥ នៅខេត្តកំពង់ឆ្នាំង នាពេលខាងមុខនេះ ត្រូវបានរៀបចំស្ទើររួច​រាល់ ១០០ ភាគរយហើយ ខណៈដែលបន្ទប់ស្នាក់នៅ ត្រូវបានកក់អស់ភាគច្រើន បើគិតដល់ថ្ងៃម្សិលមិញនេះ ។

ពិធីបុណ្យទន្លេក្នុងឆ្នាំនេះ នឹងប្រព្រឹត្តទៅចាប់ពីថ្ងៃទី ១៥ ដល់ទី ១៧ ខែមីនា ឆ្នាំ ២០១៩ ក្រោមប្រធានបទ «ទន្លេ៖ ផ្សារភ្ជាប់សន្តិភាពប្រជាជន និងទេសចរណ៍» ។

បើតាមអ្នកនាំពាក្យ​ក្រសួង​ទេសចរណ៍​ បានថ្លែងប្រាប់សារព័ត៌មានក្នុងស្រុក​ឲ្យ​ដឹង​ថា ​ពិធី​បុណ្យ​ទន្លេ​លើក​ទី​៥ ​ដែល​រៀបចំនៅ​ខេត្ត​កំពង់ឆ្នាំង​នៅ​ឆ្នាំ​នេះ​ នឹង​ទាក់ទាញ​ទេសចរ​ មិន​តិច​ជាង ​៥០ ​​​ម៉ឺន​នាក់ នោះទេ ។

ដោយឡែក បើតាមមន្ទីរទេសចរណ៍ខេត្ត បានអោយដឹងថា ក្នុងទីរួមខេត្តកំពង់ឆ្នាំង បច្ចុប្បន្នមានផ្ទះសំណាក់ និងសណ្ឋាគារ សរុបជាង ៦០០ បន្ទប់ ដែលចំនួននេះ ត្រូវបានរំពឹងថា នឹងមិនអាចឆ្លើយតបទៅនឹងចំនួននៃអ្នកទេសចរ ដែលមកចូលរួមក្នុងពិធីបុណ្យទន្លេ បាននោះទេ។

គួរកត់សម្គាល់ថា តំបន់ទេសចរណ៍សំខាន់ៗនៅក្នុងខេត្តកំពង់ឆ្នាំ រួមមាន រមណីយដ្ឋានភ្នំនាងកង្រី វត្តត្រឡែងកែង សហគមន៍ទេសចរណ៍អណ្តូងឫស្សី និងកន្លែងទឹកធ្លាក់ក្នុងស្រុកទឹកផុស ។

សូមរម្លឹកថា ពិធីបុណ្យទន្លេនៅកម្ពុជា ត្រូវបានរៀបចំដំបូងក្នុងឆ្នាំ ២០១៥ ក្នុងខេត្តក្រចេះ ដោយមានភ្ញៀវចូលរួមប្រមាណ ១០ ម៉ឺននាក់, ឆ្នាំ ២០១៦ ធ្វើនៅខេត្តកំពង់ចាម មានអ្នកចូលរួមប្រមាណ ៥០ ម៉ឺននាក់, ឆ្នាំ ២០១៧ នៅខេត្តស្ទឹងត្រែង មានប្រហែល ១៤ ម៉ឺននាក់, និងកាលពីឆ្នាំ ២០១៨ រៀបចំនៅក្រុងតាខ្មៅ ខេត្តកណ្តាល ដោយមានភ្ញៀវចូលរួមប្រមាណជាង ១,៥ លាននាក់ ៕