តើ ទេព បូព្រឹក្ស និយាយអ្វីខ្លះ នៅពេលគេព្រួតគ្នារិះគន់រឿងធ្វើបទបែកស្លុយ?

២ ឆ្នាំមុន

ខែមីនា ៦, ២០១៩ កម្សាន្ត

ភ្នំពេញ៖ កញ្ញា ទេព បូព្រឹក្ស គឺជាតារាចម្រៀងស្រីម្នាក់ដែលមានស្ទាយតុបតែងខ្លួនប្លែកពីគេ ដែលគ្រាន់តែឮឈ្មោះ ទេព បូព្រឹក្ស អ្នកណាៗក៏និយាយពីការតុបតែងខ្លួនប្លែកៗរបស់គាត់ដែរ។

ជារឿយៗ កញ្ញា ទេព បូព្រឹក្ស តែងតែបង្កការភ្ញាក់ផ្អើលតាមរយៈបទចម្រៀង រួមជាមួយនឹងស្ទាយរាំថ្មីៗរបស់គាត់ផងដែរ។ យ៉ាងណាមិញ កាលពីពេលថ្មីៗនេះ ទេព បូព្រឹក្ស ត្រូវបានគេរិះគន់យ៉ាងចាស់ដៃ ដោយបានលើកឡើងថា កញ្ញា ទេព បូព្រឹក្ស កំពុងតែបំពុលសង្គមតាមរយៈការចេញបទបែកស្លុយ ឬ ចម្លងបទពីប្រទេសជិតខាង ។

តបទៅនឹងការរិះគន់ទាំងនោះ កញ្ញា ទេព បូព្រឹក្ស ក៏បានបង្ហោះសាររៀបរាប់តបទៅវិញដោយបាននិយាយថា តាមពិតក្តីស្រម៉ៃរបស់ខ្លួន គឺគាត់ចង់គំរូតាមតារាចម្រៀងកូរ៉េខាងត្បូង CL ដែល CL គឺជានិមិត្តរូបនៅក្នុងចិត្តរបស់គាត់ផ្ទាល់ ។

កញ្ញា ខំប្រឹងព្យាយាមណាស់ តែអ្វីដែលគាត់ទទួលបាន គឺជាការជេរប្រមាថ និងស្តីបន្ទោសពីបងប្អូនជនរួមជាតិឯងទៅវិញ ។ កញ្ញា ក៏បានបន្តទៀតថា គាត់គោរពស្រឡាញ់វប្បធម៌របស់ប្រទេសណាស់ គឺរាល់ពេលមានកម្មវិធីបុណ្យជាតិម្តងៗ គាត់ចូលរួមមិនដែលខាននោះទេ។

ទន្ទឹមគ្នានេះ កញ្ញា ទេព បូព្រឹក្ស ក៏បានលើកឡើងដោយអាក់អន់ចិត្តថា ពេលពិធីបុណ្យចូលឆ្នាំ កញ្ញា ក៏ចេញបទប្រពៃណី តែគេធ្វើជាមើលមិនឃើញ ដល់ពេលចេញបទចម្រៀងរាំញាក់សប្បាយ បែរជាលើកឡើងថា ជាបទបែកស្លុយ ធ្វើឱ្យខូចវប្បធម៌ទៅវិញ ។

ជាចុងក្រោយ កញ្ញា ទេព បូព្រឹក្ស បានអះអាងថា នៅតែបន្តដំណើរទៅមុខ ទោះបីជាខ្លួនកំពុងជួបឧបសគ្គក៏ដោយ ៕