Connect with us

ក្រសួងធនធានទឹក​ ​កំពុង​សម្រុក​ជីក​អណ្តូង​ ​និង​ស្តារ​ប្រឡាយ​ទឹក​ ​ដើម្បី​ដោះស្រាយ​កង្វះ​ទឹក​នៅ​ខេត្ត​មួយចំនួន​

ភ្នំពេញ​ ​៖​ ​ក្រសួងធនធានទឹក​ ​កំពុងតែ​ដោះស្រាយ​បញ្ហា​កង្វះ​ទឹក​ប្រើប្រាស់​នៅ​តាម​បណ្តា​ខេត្ត​ជាច្រើន​ ​តាមរយៈ​ការ​ជីក​អណ្តូង​ ​ជីក​ស្រះ​ ​និង​ស្តារ​ប្រឡាយ​មេទឹក​មួយចំនួន​ ​។​ ​


​លោក​ ​ចាន់​ ​យុត្​ថា​ ​អ្នកនាំពាក្យ​ក្រសួងធនធានទឹក​ ​និងឧតុនិយម​ ​ថ្លែងប្រាប់​សារព័ត៌មាន​ក្នុង​ស្រុក​ ​អោយ​ដឹង​ថា​ ​ក្រុមការងារ​ក្រសួង​ ​រួម​ទាំង​អាជ្ញាធរ​ពាក់ព័ន្ធ​ទាំងអស់​ ​កំពុង​ប្រឹងប្រែង​តាម​គ្រប់​មធ្យោបាយ​ទាំងអស់​ ​ដើម្បី​ឆ្លើយតបទៅនឹង​បញ្ហា​កង្វះ​ទឹក​នេះ​ ​តាមរយៈ​ការ​ជីកអណ្ដូង​ ​ជីក​ស្រះ​ ​ស្ដារ​ប្រព័ន្ធ​ប្រឡាយ​មេទឹក​ ​ព្រែក​ ​ស្ទឹង​ ​មួយចំនួន​ ​ដើម្បី​នាំ​ទឹក​ទៅកាន់​តំបន់​ដែល​ខ្វះ​ទឹក​ ​។​ ​បើ​តាម​ក្រសួងធនធានទឹក​ ​បញ្ហា​កង្វះ​ទឹក​ស្អាត​ប្រើប្រាស់​នារ​ដូវ​ប្រាំង​ឆ្នាំនេះ​ ​បាន​កំពុង​កើតឡើង​ ​នៅ​ខេត្ត​ព្រះសីហនុ​ ​ខ្លាំង​ជាងគេ​ ​និង​បន្ទាប់មក​គឺ​ ​ខេត្តបាត់ដំបង​ ​បន្ទាយមានជ័យ​ ​ព្រះវិហារ​ ​ឧត្តរមានជ័យ​ ​កំពង់ធំ​ ​ព្រៃវែង​ ​កោះកុង​ ​កំពត​ ​និង​ខេត្ត​ស្ទឹងត្រែង​ ​ក៏​កំពុង​ប្រឈម​ចំពោះ​បញ្ហា​កង្វះ​ទឹក​ស្អាត​ប្រើប្រាស់​ផង​ដែរ​ ​។​ ​

​បើ​តាម​លោក​ ​ចាន់​ ​យុត្​ថា​ ​បាន​បញ្ជាក់​ថា​ ​ការ​ជីកអណ្ដូង​យក​ប្រភព​ទឹក​ពីក្រោម​ដី​ ​គឺជា​មធ្យោបាយ​មួយ​ ​ដែល​កំពុងតែ​អនុវត្ត​នៅ​តាម​តំបន់​មួយចំនួន​ ​។​ ​ប៉ុន្តែ​តំបន់​ខ្លះទៀត​ ​ក៏​មិន​អាច​ជីកអណ្ដូង​បានទេ​ ​ដូចជា​ ​នៅ​ស្រុក​មោងឫស្សី​ ​និង​ស្រុក​គាស់ក្រឡ​ ​ក្នុង​ខេត្តបាត់ដំបង​ ​ដែល​តម្រូវ​អោយ​ប្រើ​មធ្យោបាយ​ជីក​ប្រឡាយ​មេ​ ​ដើម្បី​នាំ​ទឹក​ពី​ស្រុក​រុក្ខគិរី​ ​ទៅ​ជួយ​ដល់​តំបន់​នោះ​វិញ​ ​។​ ​​កាលពី​ថ្ងៃម្សិលមិញ​ ​សម្តេច​តេជោ​ ​ហ៊ុន​ ​សែន​ ​នាយក​រដ្ឋមន្ត្រី​នៃ​កម្ពុជា​ ​បាន​អំពាវនាវ​ជាថ្មី​ម្ដងទៀត​ដល់​អាជ្ញាធរ​ពាក់ព័ន្ធ​ទាំងអស់​ ​ឲ្យ​យកចិត្ត​ទុកដាក់​ដោះស្រាយ​បញ្ហា​ខ្វះ​ទឹក​ស្អាត​ប្រើប្រាស់​ជូន​ប្រជាពលរដ្ឋ​ឲ្យបាន​ទាន់ពេល​វេលា​ ​ជាពិសេស​ ​ក្នុង​ខេត្ត​ព្រះសីហនុ​ ​ដែល​សូម្បីតែ​នៅ​មន្ទីរពេទ្យ​បង្អែក​ខេត្ត​ ​ក៏​គ្មាន​ទឹក​ស្អាត​ប្រើប្រាស់​គ្រប់គ្រាន់​ផង​ដែរ​ ​។​

សម្តេច​តេជោ​ ​ហ៊ុន​ ​សែន​ ​បាន​ណែនាំ​ឲ្យ​អាជ្ញាធរ​នៅ​គ្រប់​ទីកន្លែង​ទាំងអស់​ ​ត្រូវ​យកចិត្ត​ទុកដាក់​ជីកអណ្ដូង​ ​ប្រសើរ​ជាង​ដឹក​ទឹក​ពី​ចម្ងាយ​ ​ដោយ​ ​សម្តេច​ ​បាន​បញ្ជាក់​ថា​ ​បើ​ទោះបី​ ​ជីកអណ្ដូង​ជ្រៅ​បន្តិច​ ​តែ​ការប្រើ​ប្រាស់​ការ​ជីកអណ្ដូង​ ​គឺជា​មធ្យោបាយ​ដែល​ល្អ​ ​។​ ​


​គួរ​រម្លឹក​ថា​ ​ប្រមុខ​នៃ​រាជរដ្ឋាភិបាល​កម្ពុជា​ ​សម្តេច​តេជោ​ ​ហ៊ុន​ ​សែន​ ​បាន​ចេញ​សារាចរណែនាំ​ស្តី​ពី​ការ​ចាត់វិធានការ​ថែរក្សា​ទឹក​ ​កាលពី​ថ្ងៃទី​ ​១៧​ ​ខែមករា​ ​ដោយ​បាន​ធ្វើការ​ណែនាំ​ ​ថា​ ​ការងារ​បង្កបង្កើនផល​ស្រូវប្រាំង​នៅក្នុង​ឆ្នាំ​ ​២០១៩​ ​នេះ​ ​គឺ​អាច​ធ្វើ​បានតែ​មួយដង​ប៉ុណ្ណោះ​ ​ដោយ​មិន​អាច​ធ្វើ​ស្រូវប្រាំង​លើក​ទី២​ ​បានទេ​ ​បើ​ទោះបីជា​ ​ទឹក​នៅ​តាម​បណ្ដា​អាង​ដែល​បាន​រក្សាទុក​ ​និង​កន្លែង​មួយចំនួន​ដែល​មាន​ទឹកជា​ធម្មជាតិ​ក៏ដោយ​ ​គួរគប្បី​រក្សា​ទឹក​ទាំងនោះ​ ​សម្រាប់​ប្រើប្រាស់​ប្រចាំថ្ងៃ​ ​និង​ការ​ដាំដំណាំ​រួមផ្សំ​ផ្សេងទៀត​ក្រៅពី​ស្រូវ​ ​។​ ​

សម្តេច​តេជោ​ ​ក៏បាន​ណែនាំ​ ​ក្រសួង​ស្ថាប័ន​ពាក់ព័ន្ធ​ ​អាជ្ញាធរ​ដែនដី​គ្រប់​លំដាប់ថ្នាក់​ ​ត្រូវ​ចូលរួម​ចាត់វិធានការ​ថែរក្សា​ទឹក​ទុកឲ្យ​បាន​ល្អ​ ​ដើម្បី​ផ្គត់ផ្គង់​សម្រាប់​តែ​ការប្រើ​ប្រាស់​ប្រចាំថ្ងៃ​តែប៉ុណ្ណោះ​រហូតដល់​ពេល​មាន​ភ្លៀង​ធ្លាក់​ជា​ធម្មតា​ឡើងវិញ​ ​៕​

  • អត្ថបទទាក់ទង :
  • Featured
Loading...

ពេញនិយម