គណៈកម្មការទន្លេមេគង្គ ផ្ដល់រង្វាន់ដល់ជ័យលាភីនៃការប្រកួតនិពន្ធរឿងខ្លី ដើម្បីអបអរសាទរគុណតម្លៃរួមរបស់ទន្លេមេគង្គ, លើកកម្ពស់ផែនការ និងការគ្រប់គ្រងប្រកបដោយបរិយាបន្ន

ទីក្រុងវៀងចន្ទ ប្រទេសឡាវ ៖ គណៈកម្មការទន្លេមេគង្គ បាន​ផ្ដល់​រង្វាន់ដល់​ជ័យលាភីក្នុង​ការប្រកួត និពន្ធរឿងខ្លី ដើម្បីអបអរសាទរគុណតម្លៃ និង​ធនធាន​រួម​របស់ទន្លេមេគង្គ និងបង្កើនការយល់ដឹង​អំពីសារៈសំខាន់​នៃ​ការសម្របសម្រួលការរៀបចំផែនការ និងការគ្រប់គ្រង​តំបន់អាងទន្លេ​នេះ។

ជ័យលាភី រួមមានពលរដ្ឋ​មកពី​ប្រទេស​ជាប់ទន្លេ​មេគង្គចំនួន ៥ រូប ដែលត្រូវ​បាន​ជ្រើសរើស​ពី​បេក្ខជនមួយក្រុម​មានគ្នាជាង ៣០០ នាក់ ដែលបានចូលរួម​ក្នុង​ការប្រកួត​ប្រជែង​សំណេរនេះ ជាមួយនឹងសំណួរ​ “តើ​ទន្លេមេគង្គមានន័យយ៉ាងដូចម្តេចចំពោះ​អ្នក?”។ ពលរដ្ឋខ្មែរទទួលបាន​ចំណាត់ថ្នាក់លេខ ១ និងលេខ ៤ ជាមួយនឹងរង្វាន់ ៣០០ ដុល្លារ សម្រាប់ជ័យលាភីលេខ ១ និង​ ៥០ ដុល្លារ សម្រាប់ជ័យលាភីលេខ ៤។ ពលរដ្ឋមកពី​ប្រទេសថៃ ទទួលបានជ័យលាភីលេខ ២, វៀតណាមទទួល​បាន​ជ័យលាភីលេខ ៣ និង​ពីប្រទេសឡាវទទួលបាន​ជ័យលាភីលេខ​ ៥ ដោយពួកគេម្នាក់ៗ​ទទួលបាន​ប្រាក់ ៥០ ដុល្លារ។ ជ័យលាភី ៧ នាក់ផ្សេងទៀត ទទួល​រង្វាន់​ជាជ័យលាភីបម្រុង និង​បានទទួល​ប័ណ្ណ​សរសើរ។

ជ័យលាភីទាំងនេះ  បានលើកឡើង​ពី​គុណតម្លៃ​រួមនៃទន្លេមេគង្គ  និងតួនាទីដ៏សំខាន់របស់​គណៈ​កម្មការទន្លេមេគង្គ ខណៈពេលពេលពួកគេមកទទួល​រង្វាន់នៅលេខាធិការដ្ឋានគណៈកម្មការទន្លេមេគង្គ ក្នុងទីក្រុងវៀងចន្ទ។

កញ្ញា អ៊ឹង អ៊ុយលីម និស្សិតមកពី​វិទ្យាស្ថាន​ភាសាបរទេស​នៃប្រទេស​កម្ពុជា ដែលឈ្នះ​រង្វាន់លេខ ១ បាននិយាយថា “ទន្លេមេគង្គ គឺជា​ប្រភពនៃជីវិត ដែលប្រៀបបានទៅនឹងទឹកអម្រិត។ ទន្លេនេះ​ផ្ដល់​អាហារដល់​មនុស្សរាប់លាននាក់ និង​អាច​ដំណើរការទៅបានប្រកបដោយនិរន្តរភាព​ តែតាម​រយៈ​ការបំពេញតួនាទីរបស់ស្ថាប័ន ដូចជា MRC ប៉ុណ្ណោះ”។

“ទន្លេមេគង្គ​ជួយជំរុញសេដ្ឋកិច្ច​របស់តំបន់នេះ និង​ផ្ដល់ការទំនុកបម្រុង​ដល់ជីវិត។ ទន្លេនេះដូចជា​សរសៃឈាម ដែលពោរពេញដោយសារធាតុចិញ្ចឹម ​ជួយទ្រទ្រង់ជីវិតគ្រប់​សរីរាង្គទាំងអស់។ ខ្ញុំមិនអាចស្រមៃឃើញអំពី​អ្វីដែលនឹង​កើតមានឡើងនោះឡើយ ប្រសិនបើ​ពុំមានគណៈកម្មការទន្លេ​មេគង្គ​នោះ​ទេ” នេះបើតាម​សម្ដីរបស់​កញ្ញា Souliphone Dalavong ជ័យលាភីលេខ ៥ មកពីប្រទេស​ឡាវ ក្នុងពិធីនេះ ដែលមានការចូលរួម​ពី​មនុស្សជាង ៨០ នាក់ នៅក្នុងនោះមាននិស្សិត​ និងសាស្ត្រាចារ្យមកពីសាកលវិទ្យាល័យជាតិឡាវ និង​បុគ្គលិកលេខាធិការដ្ឋាន MRC ផងដែរ។

ពេល​ផ្ដល់រង្វាន់ដល់ជ័យលាភីក្នុងពិធីនេះ នាយកប្រតិបត្តិនៃលេខាធិការដ្ឋាន​ MRC លោក ផាំ ទាន់ ផាន (Pham Tuan Phan) បានមានប្រសាសន៍ថា លោកសូមវាយតម្លៃខ្ពស់​ចំពោះគុណតម្លៃ ដែល​បេក្ខជន​ចូលរួម​ក្នុងការ​ប្រកួតប្រជែង​នេះ ផ្ដល់ដល់ទន្លេ និង​ទំនាក់ទំនង​ដ៏ជិតស្និទ្ធដែលពួកគេមានជាមួយនឹងទន្លេនេះ។

លោក ផាំ បានមានប្រាសាសន៍ថា “តាមរយៈរឿងរ៉ាវរាប់រយនេះ ខ្ញុំបានឃើញពីសារៈសំខាន់នៃទន្លេមេគង្គ និងទំនាក់ទំនងដ៏ជិតស្និទ្ធ​ ដែល​ប្រជាជនទូទៅមានជាមួយទន្លេនេះ។ ប្រការ​នេះ ជំរុញលើកទឹក​ចិត្តដល់យើងទាំងអស់គ្នា និងប្រាប់យើង​ទាំងអស់គ្នាពីមូលហេតុដែលកិច្ចសហប្រតិបត្តិការ​របស់យើងមានសារៈសំខាន់​ ក្នុងការការពារ​ និងអភិវឌ្ឍន៍ទន្លេនេះ ប្រកបដោយ​ការទទួល​ខុសត្រូវ និងសំខាន់ជាងគេនោះ គឺមូលហេតុដែល​ MRC គឺជា​ស្ថាប័នដ៏សំខាន់”។

ដៃគូអភិវឌ្ឍន៍របស់ MRC ដែលបានចូលរួមក្នុងព្រឹត្តិការណ៍នេះផងដែរ បានចូលរួម​ជាមួយនឹងការវាយតម្លៃ​របស់​លោកនាយកប្រតិបត្តិ។ លោក អ៊ុនហឿន សៃយ៉ាសិទ្ធ (Ounheuan Saiyasith) មកពីស្ថានទូត​អូស្រ្តាលី ប្រចាំទីក្រុងវៀងចន្ទ បានមានប្រសាសន៍ថា លោកមានសេចក្ដីសោមនស្សរីករាយយ៉ាងខ្លាំង ដែល​បាន​ស្ដាប់ឮ​ពី​ការផ្ដល់សារៈសំខាន់ដល់ទន្លេនេះ ពីសំណាក់​ជ័យលាភី និងអ្នកចូលរួមប្រកួតប្រជែង​ដ៏ច្រើននាក់​បែបនេះ។

“សំណេររឿង​ដែលជ័យលាភីលើកឡើងទាំងនេះ ផ្ដល់នូវភាពកក់ក្ដៅ និងធ្វើ​ឱ្យការងាររួមរបស់​យើងកាន់តែមានភាពរស់រវើក។ ដើម្បី​ការពារ​គុណតម្លៃនេះ និងដើម្បី​ខិតខំធ្វើឱ្យមានតុល្យភាព​រវាងកំណើនសេដ្ឋកិច្ច​ និងនិរន្តរភាព​​បរិស្ថាន មិនមែនជា​ការ​ងារ​ងាយស្រួលនោះឡើយ។ MRC សមនឹងទទួល​បាន​ការគាំទ្រ​ឱ្យបានច្រើន​ តាម​ដែលអាចធ្វើបាន។”

ការប្រកួត​និពន្ធរឿងខ្លី ដែលដំណើរការ​កាលពីដើមឆ្នាំ​នេះ បើកចំហចំពោះ​ប្រជាពលរដ្ឋ និងអ្នក​ដែល​រស់នៅក្នុងប្រទេសកម្ពុជា ឡាវ ថៃ និង​វៀតណាម គ្រប់វ័យទាំងអស់។ ការប្រកួត​ប្រជែង​នេះមានគោលបំណងអបអរសាទរទិវាមេគង្គ ជាថ្ងៃដែលកិច្ចព្រមព្រៀងមេគង្គ ត្រូវ​បានចុះ​ហត្ថលេខា ​កាលពីឆ្នាំ ១៩៩៥ និងដើម្បីបង្កើនការយល់ដឹង​អំពីសារៈសំខាន់នៃការសម្របសម្រួល​រៀបចំផែនការ និងគ្រប់គ្រង​តំប​ន់អាង​ទន្លេមេគង្គ។ អ្នកចូលរួម​ក្នុងការ​ប្រកួត​ប្រជែង​ ត្រូវបានស្នើ​ឱ្យ​សរសេរជាសំណេរជាភាសាអង់គ្លេស ឬភាសា​ជាតិ​របស់ពួកគេ មិន​ឱ្យលើសពី ៦០ ពាក្យ។

សំណេរដែលទទួលបានជ័យលាភីទាំង​ ១២ ត្រូវ​បាន​ដាក់តាំង​បង្ហាញ​ក្នុងសន្និសីទ​អន្តរជាតិរបស់​ MRC ដែលរៀបចំឡើងកាលពីពេល​ថ្មីៗនេះ និងក្នុងអំឡុងទិវាមេគង្គ​ និងបានបង្ហាញ​ជូន​ថ្នាក់ដឹកនាំ​មកពី​ប្រទេសជាប់ទន្លេមេគង្គ ក្នុងកិច្ចប្រជុំកំពូល​លើកទី ៣ របស់ MRC។ អត្ថបទទាំងនេះ ក៏នឹងបង្ហាញ​ក្នុងផលិតផល​ផ្សេងទៀតរបស់​ MRC ផងដែរ។

នេះគឺជាការប្រកួតប្រជែង​សំណេរថ្នាក់តំបន់លើកទី ១ ដែលរៀបចំដោយ MRC បន្ទាប់ពីការរៀបចំពិពណ៌រូបថតលើកទី ១ របស់គណៈកម្មការ​នេះ កាលពីចុងឆ្នាំមុន និងមានរូបថតចូលរួម​ចំនួន ១៦៥ សន្លឹក ដោយអ្នក​ថតរូបមិនមែន​អាជីពចំនួន ៤២ នាក់៕