កម្ពុជា នឹងស្នើអោយសាធារណរដ្ឋកូរ៉េ ជួយទិញផលិតផលពីកម្ពុជា បន្ថែមទៀត
ភ្នំពេញ ៖ ប្រមុខនៃរាជរដ្ឋាភិបាលកម្ពុជា សម្តេចតេជោ ហ៊ុន សែន គ្រោងនឹងស្នើប្រធានាធិបតី កូរ៉េខាងត្បូង អោយជួយទិញផលិតផលពីប្រទេសកម្ពុជា បន្ថែមទៀត ។
ការបង្ហាញពីសំណើ បានធ្វើឡើងនៅថ្ងៃទី ១៤ ខែមីនានេះ ក្នុងពិធីបិទសន្និបាតបូកសរុបការងារឆ្នាំ២០១៨ និងលើកទិសដៅការងារឆ្នាំ២០១៩ របស់ក្រសួងកសិកម្ម រុក្ខាប្រមាញ់ និងនេសាទ ហើយជាការបង្ហាញ មុនការមកដល់របស់លោក មូន ចេអ៊ីន ប្រធានាធិបតីកូរ៉េខាងត្បូង និង ភរិយា ។
សម្តេចតេជោ ហ៊ុន សែន បានអោយដឹងថា នៅល្ងាចនេះ សម្តេចនឹងជួបជាមួយប្រធានាធិបតី កូរ៉េខាងត្បូង ដើម្បីទទួលទានបាយជាមួយគ្នា ហើយ សម្តេច នឹងខិតខំបើកទីផ្សារបន្ថែមទៀត សម្រាប់ផលិតផលកម្ពុជា ។
សម្តេចតេជោ បានបញ្ជាក់ថា សម្តេច នឹងជជែកពិភាក្សាជាមួយប្រធានាធិបតីកូរ៉េខាងត្បូង លោក មូន ចេអ៊ីន ដើម្បីស្នើឱ្យកូរ៉េខាងត្បូង ជួយទិញផលិតផលរបស់កម្ពុជាបន្ថែមទៀត ។
ជាមួយគ្នានេះដែរ សម្តេចតេជោ ក៏បានលើកឡើងផងដែរថា ទីផ្សារផលិតផលរបស់កម្ពុជា ពិតជាមិនអាចទៅចំណុះលើទីផ្សារណាមួយ ដោយអ្នកទាំងនោះ មកខ្ទប់ច្រមុះឱ្យស្លាប់នោះទេ ។ ជាមួយគ្នានេះ នៅក្នុងឆ្នាំ២០១៩នេះ សម្តេច នឹងធ្វើដំណើរទៅកាន់ប្រទេសអាស៊ី និងអឺរ៉ុបមួយចំនួនទៀត ដើម្បីទាញយកផលិតផលទៅកាន់ទីផ្សារ នៅក្នុងប្រទេសទាំងនោះផងដែរ ហើយ កម្ពុជា ក៏នឹងតម្រង់ផលិតផលរបស់ខ្លួនបន្ថែមទៀត ទៅកាន់តំបន់មជ្ឃឹមបូព៌ា ព្រមទាំង បើកទីផ្សារឱ្យកាន់តែធំជាងមុន ។
សូមបញ្ជាក់ថា លោកប្រធានាធិបតីកូរ៉េខាងត្បូង នឹងមកបំពេញទស្សនកិច្ចនៅប្រទេសកម្ពុជា ពីថ្ងៃទី១៤ ដល់ទី១៦ ខែមីនា ដែលលោក គ្រោងចូលក្រាបបង្គំគាល់ព្រះមហាក្សត្រនៃព្រះរាជាណាចក្រកម្ពុជា ព្រះករុណា ព្រះបាទសម្តេចព្រះបរមនាថ នរោត្តម សីហមុនី និង ជួបពិភាក្សាការជាមួយនាយករដ្ឋមន្ត្រីកម្ពុជា សម្ដេចតេជោ ហ៊ុន សែន ដើម្បីផ្លាស់ប្តូរយោបល់ថា តើត្រូវធ្វើយ៉ាងដូចម្ដេចក្នុងការពង្រីកកិច្ចសហប្រតិបត្តិការ ដើម្បីភាពរុងរឿងទៅវិញទៅមកនៃប្រទេសទាំងពីរ ។
បើតាមសេចក្តីថ្លែងការណ៍ ពីវិមានប្រធានាធិបតីកូរ៉េខាងត្បូង បានបញ្ជាក់ថា ប្រទេសប្រ៊ុយណេ ម៉ាឡេស៊ី និងកម្ពុជា គឺជាដៃគូសហការដ៏សំខាន់នៃគោលនយោបាយភាគខាងត្បូងថ្មី (New Southern Policy) ដែលជាអាទិភាពមួយក្នុងចំណោមអាទិភាពកំពូលៗ នៃរដ្ឋាភិបាលកូរ៉េខាងត្បូង ។ ដំណើរទស្សនកិច្ចរបស់លោកប្រធានាធិបតី មូន ត្រូវបានរំពឹងថា នឹងពង្រឹងចំណងមិត្តភាព និងទំនាក់ទំនងនៃកិច្ចសហប្រតិបត្តិការ ក្នុងកម្រិតទេ្វភាគីជាមួយនឹងបណ្ដាប្រទេសទាំងនេះ៕
កម្សាន្ត៣ ឆ្នាំមុនសាក្សីថា តារាម៉ូដែលថៃដែលស្លាប់ ត្រូវបានគេព្រួតវាយធ្វើបាបក្នុងពីធីជប់លៀងផឹកស៊ី
សំខាន់ៗ៣ ឆ្នាំមុនវៀតណាម ប្រហារជីវិតបុរសដែលសម្លាប់សង្សារដោយកាត់សពជាបំណែកដាក់ក្នុងទូទឹកកក
សង្គម៤ ឆ្នាំមុនដំណឹងល្អសម្រាប់អ្នកជំងឺគ-ថ្លង់នៅកម្ពុជា ដោយអាចធ្វើការវះកាត់ព្យាបាលបាន ១០០ភាគរយ នៅមន្ទីរពេទ្យព្រះអង្គឌួង ក្នុងតម្លៃទាបជាងនៅក្រៅប្រទេសបីដង
សង្គម៤ ឆ្នាំមុនអាណិតណាស់ ក្រុមគ្រួសារលោក ពៅ គីសាន់ ហៅនាយ ឆើត កំពុងដង្ហោយហៅការជួយពីសាធារណៈជន ក្រោយពេលដែលគាត់បានជួបគ្រោះថ្នាក់ចរាចរណ៍
