វីវរ​ហើយ​!​ ​ក្រុមហ៊ុន​អាកាសចរណ៍​ឥណ្ឌា​ ​ចេញមុខ​មុនគេ​ ​ទាមទារ​សំណង​ពី​ក្រុមហ៊ុន​ផលិត​យន្តហោះ​ ​Boeing​

ឥណ្ឌា​ ​៖​ ​ទីបំផុត​ ​ក្រុមហ៊ុន​អាកាសចរណ៍​ឥណ្ឌា​ ​SpiceJet​ ​បាន​ចេញមុខ​មុនគេ​ ​នឹង​ទាមទារ​សំណង​ពី​ក្រុមហ៊ុន​ផលិត​យន្ដ​ហោះ​ដ៏​ធំ​របស់​សហរដ្ឋអាមេរិក​ ​គឺ​ក្រុមហ៊ុន​ ​Boeing​ ​។​ ​​បើ​តាម​ការ​ចេញផ្សាយ​ពី​សារព័ត៌មាន​ដ៏​ធំ​របស់​រុស្សី​ ​Sputnik​ ​បាន​អោយ​ដឹង​ថា​ ​ការប្រកាស​នេះ​ ​គឺ​ ​បន្ទាប់ពី​ក្រុមហ៊ុន​អាកាសចរណ៍​មួយ​នេះ​ ​ត្រូវ​បាន​អាជ្ញាធរ​អាកាសចរណ៍​ស៊ីវិល​ឥណ្ឌា​ ​បង្ខំ​ឱ្យ​ផ្អាក​ប្រតិបត្តិ​ការហោះហើរ​របស់​យន្ដ​ហោះ​ ​Boeing​ ​737​ ​Max​ ​ជា​បណ្ដោះអាសន្ន​ ​។​ ​

​គួរ​រំលឹក​ថា​ ​រដ្ឋាភិបាល​ឥណ្ឌា​ ​បានសម្រេច​ចិត្ត​ចូលរួម​ជាមួយ​ប្រទេស​ជាង​ ​៥០​ ​ក្នុង​ការ​បិទ​ដែនអាកាស​សម្រាប់​យន្ដ​ហោះ​ ​Boeing​ ​737​ ​Max​ ​នៅក្នុង​សប្តាហ៍​នេះ​ ​បន្ទាប់ពី​មាន​គ្រោះថ្នាក់​ធ្លាក់​យន្ដ​ហោះ​ប្រភេទ​នេះ​ ​ដែល​បាន​ផ្ដាច់ជីវិត​មនុស្ស​ ​១៥៧នាក់​ ​នៅ​ប្រទេស​អេត្យូពី​ ​។​ ​​ក្រុមហ៊ុន​អាកាសចរណ៍​ ​SpiceJet​ ​ក៏​ត្រូវ​បង្ខំចិត្ត​ធ្វើតាម​បទបញ្ជា​នេះ​ដែរ​ ​ប៉ុន្តែ​បាន​បញ្ជាក់​ជំហរ​ថា​ ​នឹង​ទាមទារ​សំណង​ពី​ក្រុមហ៊ុន​ ​Boeing​ ​តាមរយៈ​សំណើ​ឥណទាន​លើ​ការថែទាំ​ ​ការ​ជួសជុល​ ​និង​ផ្អាក​ការហោះហើរ​របស់​ ​Boeing​ ​737​ ​Max​ ​ចំនួន​ ​១២គ្រឿង​របស់​ខ្លួន​ ​។​

​រហូត​មកទល់​ពេលនេះ​ ​ប្រអប់​ខ្មៅ​ទាំងពីរ​នៃ​យន្ដ​ហោះ​ ​Boeing​ ​737​ ​MAX​ ​របស់​ក្រុមហ៊ុន​ ​Ethiopian​ ​Airlines​ ​ដែល​ធ្លាក់​នៅ​ឯ​ប្រទេស​អេត្យូពី​ ​ត្រូវ​បាន​បញ្ជូន​ទៅកាន់​ទីក្រុង​ប៉ារីស​ ​នៃ​ប្រទេស​បារាំង​ហើយ​ ​ដើម្បី​ធ្វើការវិភាគ​ ​និង​ស៊ើបអង្កេត​លើ​មូលហេតុ​ពិតប្រាកដ​ដែល​បាន​ធ្វើ​ឱ្យ​យន្ដ​ហោះ​ដ៏​ទំនើប​មួយ​នេះ​ធ្លាក់​ ​។​ ​​មានការ​សន្និដ្ឋាន​បឋម​ថា​ ​វា​អាច​មាន​មូលហេតុ​ដូចគ្នា​ទៅ​នឹង​ការ​ធ្លាក់​យន្តហោះ​នេះ​នៅក្នុង​ប្រទេស​ឥណ្ឌូណេស៊ី​ ​កាលពី​ខែតុលា​ ​ឆ្នាំ២០១៨​ ​ដែល​បាន​ផ្តាច់​ជីវិត​មនុស្ស​ ​១៨៩នាក់​ ​។​ ​

​ទាក់ទិន​នឹង​បញ្ហា​នេះ​ដែរ​ ​នៅ​ថ្ងៃម្សិលមិញ​នេះ​ ​លោក​ ​ដូ​ណាល់​ ​ត្រាំ​ ​ប្រធានាធិបតី​សហរដ្ឋអាមេរិក​ ​បាន​ធ្វើការ​ប្រកាស​ជាលើកដំបូង​ថា​ ​រដ្ឋបាល​សហព័ន្ធ​អាកាសចរណ៍​សហរដ្ឋអាមេរិក​ ​គួរតែ​ចេញ​បទបញ្ជា​បន្ទាន់​ ​ដើម្បី​ផ្អាក​ជា​បណ្តោះអាសន្ន​នូវ​ប្រតិបត្តិ​ការហោះហើរ​របស់​យន្តហោះ​ប្រភេទ​ ​Boeing​ ​737​ ​MAX​ ​។​ ​នេះ​មានន័យថា​ ​សូម្បីតែ​សហរដ្ឋអាមេរិក​ ​ដែល​ជា​ប្រទេស​ផលិត​យន្តហោះ​ប្រភេទ​នេះ​ផ្ទាល់​ ​ក៏បាន​សម្រេចចិត្ត​ផ្អាក​ប្រតិបត្តិ​ការ​សម្រាប់​យន្តហោះ​ប្រភេទ​នេះ​ផង​ដែរ​ ​។​ ​

​នៅក្នុង​សេចក្ដីថ្លែង​ការណ៍​របស់​ខ្លួន​ ​រដ្ឋបាល​សហព័ន្ធ​អាកាសចរណ៍​សហរដ្ឋអាមេរិក​ ​បាន​អះអាង​ថា​ ​ការសម្រេច​ចិត្ត​បញ្ឈរជើង​យន្ដ​ហោះ​ ​Boeing​ ​737​ ​MAX​ ​គឺ​មិន​មាន​មូលដ្ឋាន​ ​និង​មិន​សម​ហេតុផល​ទាល់តែសោះ​ ​។​ ​រដ្ឋបាល​អាកាសចរណ៍​អាមេរិក​ ​បាន​គូសបញ្ជាក់​ថា​ ​រហូត​មកទល់​នឹង​ពេលនេះ​ ​ការ​ត្រួតពិនិត្យ​បាន​បង្ហាញថា​ ​គ្មាន​បញ្ហា​ជា​លក្ខណៈ​ប្រព័ន្ធ​ ​ណាមួយ​កើតឡើង​ឡើយ​ ​ហើយក៏​ពុំ​មានការ​ផ្ដល់​មូលដ្ឋាន​សម​ហេតុផល​ណាមួយ​ ​ក្នុង​ការសម្រេច​ចិត្ត​ផ្អាក​ការហោះហើរ​យន្ដ​ហោះ​ ​737​ ​MAX​ ​នោះ​ដែរ​ ​។​ ​ជាង​នេះ​ទៅទៀត​ ​គ្មាន​អាជ្ញាធរ​អាកាសចរណ៍​ស៊ីវិល​ណាមួយ​ ​ផ្ដល់​ទិន្នន័យ​ ​ដើម្បី​បញ្ជាក់​ពី​ការសម្រេច​ចិត្ត​របស់​ពួកគេ​ដែរ​ ​៕​

​ប្រភព​ ​៖​ ​បរទេស​ ​និង​កែសម្រួល​បន្ថែម​ដោយ​ ​៖​ ​គង់​ ​ចាន់​ស្រី​នុច​