Connect with us

សហគមន៍​អ្នក​ផលិត​អំបិល​កំពត​-​កែប​ ​នឹង​ត្រូវ​រំលាយ​ ​នៅ​ដំណាច់ខែ​មីនា​នេះ​

ភ្នំពេញ​ ​៖​ ​នៅ​ថ្ងៃទី​ ​៣០​ ​មីនា​ ​ឆ្នាំ២០១៩ខាងមុខនេះ​ ​សហគមន៍​អ្នក​ផលិត​អំបិល​ខេត្តកំពត​កែប​ ​ដែល​ជា​អ្នក​ផលិត​ ​និង​ផ្គត់ផ្គង់​អំបិល​តែមួយគត់​នៅ​កម្ពុជា​ ​នឹង​ត្រូវ​រំលាយ​ហើយ​!​ ​ខណៈ​ដែល​សមាគមន៍​នេះ​ ​ក៏បាន​ធ្វើ​លិខិត​ជូនដំណឹង​រួចរាល់​អស់ហើយ​ ​ជូន​ទៅដល់​អាជ្ញាធរ​ខេត្ត​ ​និង​ក្រសួង​ពាក់ព័ន្ធ​។​ ​
​បើ​យោង​តាម​គេហទំព័រ​ខេម​បូ​ណូ​មីស​ ​បាន​សរសេរ​ថា​ ​ការ​ឈាន​ដល់​ការ​រំលាយ​សហគមន៍​នេះ​ ​ត្រូវ​បាន​លោក​ ​អ៊ុំ​ ​ឈុន​ ​ប្រធាន​រដ្ឋបាល​សហគមន៍​អ្នក​ផលិត​អំបិល​កំពត​-​កែប​ ​ឲ្យដឹង​ថា​ ​គឺ​ដោយសារតែ​ ​កសិករ​ផលិត​អំបិល​មួយចំនួន​ ​មិន​ចង់​បន្ត​ការផលិត​អំបិល​របស់​ខ្លួន​ជា​បន្ត​ទៅទៀត​ ​។​ ​


​លោក​ ​អ៊ុំ​ ​ឈុន​ ​ថា​ ​តាម​លក្ខខណ្ឌ​សហគមន៍​ ​១អាណត្តិ​ ​មាន​រយៈពេល៥ឆ្នាំ​ម្ដង​ ​ដើម្បី​ប្រជុំ​រើស​ប្រធាន​ក្រុមប្រឹក្សា​ភិបាល​ ​និង​ការ​ចុះ​កិច្ចសន្យា​ថ្មី​ជាមួយនឹង​អ្នក​ផលិត​អំបិល​។​ ​ប៉ុន្ដែ​ ​អ​ណ​ត្តិ​ទី៣នេះ​ ​គឺ​បាន​ផុត​តាំងពី​ ​ខែកញ្ញា​ ​ឆ្នាំ២០១៨មក​ម្លេះ​ ​ដោយ​កាលនោះ​ ​ខាង​សហគមន៍​ ​បាន​ធ្វើ​មហាសន្និបាត​ ​និង​រៀបចំ​កិច្ចសន្យា​ថ្មី​ ​ដើម្បី​បន្ដ​អ​ណ​ត្តិ​ ​តែ​មាន​កសិករ​ដែល​ជា​អ្នក​ផលិត​អំបិល​ប្រមាណ​តែ​ ​៧០​%​ប៉ុណ្ណោះ​បាន​ចូលរួម​ ​និង​មាន៣០​%​ ​ទៀត​ ​មិន​ចូលរួម​បន្ត​ការផលិត​ជាមួយ​សហគមន៍​ទៀត​នោះ​ទេ​។​ ​ដូច្នេះហើយ​ ​ទើប​ក្រុមប្រឹក្សា​ភិបាល​សហគមន៍​ ​សម្រេច​ថា​ ​នឹង​រំលាយ​សហគមន៍​អ្នក​ផលិត​អំបិល​ខេត្ត​ ​កំពត​ ​កែប​នេះ​ ​នៅ​ត្រឹម​ដំណាច់ខែ​មីនា​ ​ឆ្នាំនេះ​តែម្ដង​។​ ​


​ទោះ​យ៉ាងណា​ ​គេ​នៅ​រង់ចាំ​មើល​សេចក្ដីសម្រេច​ចុងក្រោយ​របស់ក្រ​សួង​ជា​អាណាព្យាបាល​ ​ពិសេស​ ​គឺ​ក្រសួង​ឧស្សាហកម្ម​ ​និង​សិប្បកម្ម​ ​។​ ​ប៉ុន្ដែ​ ​បើ​តាម​តំណាង​សហគមន៍​អ្នក​ផលិត​អំបិល​ខេត្តកំពត​-​កែប​ ​គឺ​ខាង​សហគមន៍​ ​បាន​ជូនដំណឹង​រួចអស់ហើយ​ ​អំពី​ការសម្រេច​រំលាយ​សហគមន៍​នេះ​ ​ទៅកាន់​អាជ្ញាធរ​ខេត្តកំពត​ ​និង​កែប​ ​ព្រមទាំង​ក្រសួង​ឧស្សាហកម្ម​ ​និង​សិប្បកម្ម​ ​រួម​ទាំង​ ​អគ្គនាយក​ដ្ឋាន​ពន្ធដារ​ ​និង​ក្រសួងមហាផ្ទៃ​ផង​ដែរ​ ​។​ តាម​ការ​បញ្ជាក់​ពី​លោក​ ​អ៊ុំ​ ​ឈុន​ ​ផ្ទៃដី​ផលិត​អំបិល​របស់​សហគមន៍​នេះ​ ​មាន​ទំហំ​ ​ជាង​ ​៤ពាន់​ ​៥០០​ ​ហិ​ក​តា​ ​ដែល​ជា​កម្មសិទ្ធិ​ឯកជន​ ​របស់​កសិករ​ផលិត​អំបិល​ ​ជាង២០០​ ​នាក់​ ​ហើយ​ក្រោយពី​ការ​រំលាយ​សហគមន៍​ទៅ​ ​កិច្ចការ​បន្ទាប់​ ​គឺជា​ភារកិច្ច​របស់​អាជ្ញាធរ​ខេត្ត​ ​ដើម្បី​គ្រប់គ្រង​ ​និង​ចាត់ចែង​បន្ត​។​ លោក​ ​បន្ថែម​ទៀត​ថា​ ​មាន​កសិករ​ផលិត​អំបិល​ខ្លះ​ ​បាន​លក់​ដី​របស់​ខ្លួន​ជា​បណ្ដើរ​ៗ​ហើយ​ ​តែ​អ្នកទិញ​ដី​នោះ​ ​ក៏​មិនទាន់​ឃើញ​ធ្វើ​អីដែរ​ ​នៅ​ទុក​ដី​ទំនេរ​ចោល​។​ ​រី​ឯ​អ្នក​បន្ត​ផលិត​អំបិល​ផ្សេងទៀត​ ​ក៏​ផលិត​មិនបាន​ច្រើន​នោះ​ដែរ​ ​ពោល​គឺ​បាន​ប្រហែល​តែ​ពាក់កណ្ដាល​ប៉ុណ្ណោះ​ ​ព្រោះ​មាន​បញ្ហា​កង្វះ​កម្លាំង​ពលកម្ម​។​ ​


​តាម​ការ​លើកឡើង​របស់​ប្រជាពលរដ្ឋ​ ​និង​អ្នក​តាមដាន​សង្គម​មួយចំនួន​ ​បាន​លើកឡើង​ថា​ ​ការជំរុញ​ឲ្យ​អ្នក​ផលិត​អំបិល​ជ្រួលច្របល់​លែង​ចង់​ផលិត​អំបិល​នេះ​ ​គឺ​ដោយសារតែ​ការផលិត​ជួប​បញ្ហា​ច្រើន​ ​ទាំង​អាកាសធាតុ​ ​និង​កម្លាំង​ពលកម្ម​។​ ​ពិសេស​ជាង​នេះ​ទៀត​ ​គឺ​និន្នាការ​តម្លៃ​ដីធ្លី​ ​កំពុង​ពុះកញ្ជ្រោល​ខ្លាំង​ ​ដែល​ធ្វើឲ្យ​ពួកគេ​កំពុង​សម្លឹងឃើញ​ឱកាស​នេះ​ ​ទាញ​យក​ដីស្រែ​អំបិល​ទៅលើ​ឲ្យ​ឈ្មួញ​ដី​ ​បាន​តម្លៃ​ខ្ពស់​ ​ជាង​ការផលិត​អំបិល​។​ ​ទោះ​យ៉ាងណា​ ​លោក​ ​អ៊ុំ​ ​ឈុន​ ​បាន​គូសបញ្ជាក់​ថា​ ​ដីស្រែ​អំបិល​នេះ​ ​គឺ​មានការ​ចុះ​កិច្ចសន្យា​ច្បាស់លាស់​រវាង​ម្ចាស់​ស្រែអំបិល​ ​និង​អាជ្ញាធរ​ ​គឺ​ទុក​តែ​សម្រាប់​ផលិត​អំបិល​ប៉ុណ្ណោះ​ ​មិន​អាចយ​ក​ទៅ​ធ្វើអ្វី​ផ្សេង​ក្រៅពី​ការផលិត​អំបិល​នោះ​ឡើយ​។​ ​បើ​ទោះបីជា​លក់​ឲ្យ​អ្នក​ផ្សេងទៀត​ ​ក៏​អ្នកទិញ​បន្ដ​នោះ​ ​ត្រូវតែ​យក​មក​ធ្វើការ​ផលិត​អំបិល​ដែរ​។​ ​


​លោក​ ​អ៊ុំ​ ​ឈុន​ ​ក៏បាន​សំណូមពរ​ ​ឲ្យ​ខាង​អាជ្ញាធរ​គួរតែ​បន្ត​គ្រប់គ្រង​ការផលិត​អំបិល​របស់​កសិករ​ផលិត​អំបិល​ ​ក្រោយពី​សហគមន៍​ត្រូវ​បាន​រំលាយ​ ​ដើម្បី​ធានា​បាន​នូវ​គុណភាព​អំបិល​ ​សម្រាប់​សុខភាព​ពលរដ្ឋ​ ​។​ ​គួរ​បញ្ជាក់​ថា​ ​កាលពី​ចុងឆ្នាំ​ ​២០១៨​ ​កន្លងទៅ​នេះ​ ​កម្ពុជា​ ​បាន​ចុះ​កិច្ច​ព្រមព្រៀង​នាំចូល​អំបិល​ពី​ចិន​ ​ប្រមាណ២ម៉ឺន​តោន​ ​ដើម្បី​ផ្គត់ផ្គង់​តម្រូវការ​ក្នុង​ស្រុក​ ​ដ្បិតថា​ ​ការផលិត​អំបិល​ជួប​បញ្ហា​ភ្លៀង​ធ្លាក់​ច្រើន​ ​៕​

  • អត្ថបទទាក់ទង :
  • Featured
Loading...

ពេញនិយម