កម្ពុជា​-​ជប៉ុន​ ​រៀបចំ​ការប្រកួត​ជ្រើសរើស​ជើងឯក​ស៊ី​ប៊ូ​យ៉ា​ ​ការ៉ាតេដូ​ ​លើក​ទី១​ ​

ភ្នំពេញ​ ​៖​ ​កម្ពុជា​ ​និង​ជប៉ុន​ ​បាន​រៀបចំ​ការប្រកួត​ជ្រើសរើស​ជើងឯក​ស៊ី​ប៊ូ​យ៉ា​ ​ការ៉ាតេដូ​ ​លើក​ទី១​ ​ដើម្បី​ជា​ការ​រំលឹក​ដល់​វិញ្ញាណក្ខន្ធ​លោក​សាស្ត្រា​ចារ្យ​ ​ស៊ី​ប៊ូ​យ៉ា​ ​តា​កា​ស៊ី​ ​។​ ​

​

ថ្លែង​ក្នុង​ពិធី​បិទ​ការប្រកួត​ជ្រើសរើស​ជើងឯក​កម្ពុជា​-​ជប៉ុន​ ​ស៊ី​ប៊ូ​យ៉ា​ ​ការ៉ាតេដូ​ ​ឆ្នាំ២០១៩​ ​លោក​ ​អគ្គបណ្ឌិត​សភា​ចារ្យ​ ​អូន​ ​ព័ន្ធ​មុនី​រ័ត្ន​ ​ឧបនាយក​រដ្ឋមន្ត្រី​ ​រដ្ឋមន្ត្រី​ក្រសួងសេដ្ឋកិច្ច​ ​និង​ហិរញ្ញវត្ថុ​ ​បាន​គូសបញ្ជាក់​ថា​ ​លោក​សាស្ត្រា​ចារ្យ​ ​ស៊ី​ប៊ូ​យ៉ា​ ​តា​កា​ស៊ី​ ​គឺជា​បុគ្គល​ដែល​បាន​ខិតខំ​ប្រឹងប្រែង​ចំណាយពេល​វេលា​ ​និង​ថវិកា​ផ្ទាល់ខ្លួន​ ​ដើម្បី​ជួយ​ពង្រឹង​វិស័យ​ការ៉ាតេ​នៅ​កម្ពុជា​ ​តាំងពី​ឆ្នាំ២០០៩​ ​រហូតដល់​លោក​ព្រឹទ្ធា​ចារ្យ​ ​បាន​ទទួលមរណភាព​កាលពី​ឆ្នាំ២០១៧​ ​។​

​លោក​ ​ឧបនាយក​រដ្ឋមន្ត្រី​ ​អូន​ ​ព័ន្ធ​មុនី​រ័ត្ន​ ​បាន​បន្ថែម​ថា​ ​ការប្រកួត​នេះ​ ​ក៏​ជា​ការ​បង្ហាញ​ពី​ភាព​រីកចម្រើន​នៃ​កីឡា​ការ៉ាតេ​នៅ​កម្ពុជា​ ​ព្រមទាំង​ដើម្បី​ត្រៀមលក្ខណៈ​ចូលរួម​ប្រកួត​កីឡា​អាស៊ី​អាគ្នេយ៍​ ​(​SEAGAME​)​ ​លើក​ទី៣២​ ​នៅ​ឆ្នាំ២០២៣​ ​ដែល​កម្ពុជា​ ​នឹង​ទទួល​ធ្វើជា​ម្ចាស់ផ្ទះ​រៀបចំ​ ​។​

​ក្នុងនាម​ជា​ប្រធាន​សហព័ន្ធ​កីឡា​ការ៉ាតេ​កម្ពុជា​ ​លោក​ ​ឧបនាយក​រដ្ឋមន្រ្តី​ ​បាន​ថ្លែងអំណរគុណ​យ៉ាង​ជ្រាលជ្រៅ​បំផុត​ចំពោះ​លោក​ ​សាមឺ​ឌី​ ​ស៊ី​វឌ្ឍនា​ ​និង​លោក​ព្រឹទ្ធា​ចារ្យ​ ​យ៉ា​ម៉ា​កា​វ៉ា​ ​ដែល​បាន​សហការ​រៀបចំ​កម្មវិធី​ការប្រកួត​ជ្រើសរើស​ជើងឯក​កម្ពុជា​-​ជប៉ុន​ ​ស៊ី​ប៊ូ​យ៉ា​ ​ការ៉ាតេដូ​ ​ឆ្នាំ២០១៩​ ​លើក​ទី១​ ​នេះ​ឡើង​ ​៕​