ប្រុងប្រយ័ត្នផង ខណៈដែលមនុស្សជាង ៥០០នាក់ បានស្លាប់ដោយសារគ្រោះថ្នាក់ចរាចរណ៍

៣ ឆ្នាំមុន

ខែមេសា ២, ២០១៩ សង្គម

ភ្នំពេញ ៖ ក្នុងរយៈពេល៣ខែ ដើមឆ្នាំ២០១៩ មានជនរងគ្រោះ បានស្លាប់ដោយសារគ្រោះថ្នាក់ចរាចរណ៍នៅទូទាំងប្រទេស ចំនួន ៥១៣នាក់ នេះបើតាមការឱ្យដឹងពីមន្រ្តីជាន់ខ្ពស់នៃអគ្គស្នងការដ្ឋាននគរបាលជាតិ ។

ក្នុងសន្និសីទសារព័ត៌មានមួយ នាថ្ងៃម្សិលមិញនេះ ឧត្តមសេនីយ៍ឯក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានឱ្យដឹងថា ឆ្នាំ២០១៩នេះ លោក មានក្តីព្រួយបារម្ភយ៉ាងខ្លាំង ដោយសារតែត្រឹមមួយត្រីមាស(៣ខែ) មានអ្នកស្លាប់ដោយសារគ្រោះថ្នាក់ចរាចរណ៍ជាង ៥០០នាក់ ។

ឧត្តមសេនីយ៍ឯក រុន រ័ត្នវាសនា បានឱ្យដឹងថា ថ្ងៃខ្លះ មានអ្នកស្លាប់រហូតទៅដល់៩នាក់ និងថ្ងៃខ្លះទៀត មានអ្នកស្លាប់ រហូតដល់១១នាក់ ក្នុងនោះ អ្នកស្លាប់ ដែលមិនពាក់មួកសុវត្ថិភាព មានជាង៧៨% ។ លោក បានបន្ថែមថា ក្នុង១ឆ្នាំៗ កម្ពុជា បានខាតបង់ប្រមាណ ៣៥០លានដុល្លារ ដោយសារតែគ្រោះថ្នាក់ចរាចរណ៍ ។

ឧត្តមសេនីយ៍ឯក រុន រ័ត្នវាសនា ក៏បានអំពាវនាវដល់គ្រប់ស្ថាប័នទាំងអស់ សូមចូលរួមអប់រំផ្សព្វផ្សាយច្បាប់ចរាចរណ៍ ជូនដល់បុគ្គលិក និងសារធារណជនទាំងអស់ តាមដែលអាចធ្វើទៅបាន ដើម្បីជាផ្នែកមួយ ជួយក្រើនរំលឹកដាស់ស្មារតីប្រជាពលរដ្ឋ ពីផលវិបាកដែលកើតឡើងដោយសារតែគ្រោះថ្នាក់ចរាចរណ៍នេះផងដែរ ។