ចិន​ ​បង្កើត​ការិយាល័យ​មួយ​ ​នៅក្នុង​ក្រសួង​ពាណិជ្ជកម្ម​កម្ពុជា​

ភ្នំពេញ​ ​៖​ ​ក្រសួង​ពាណិជ្ជកម្ម​ ​នឹង​បើក​ការិយាល័យ​ចិន​មួយ​ ​(​Chinese​ ​Desk​)​ ​ដើម្បី​សម្រួល​ដល់​ធុរជន​ចិន​ ​ក្នុង​ការ​ធ្វើ​ប្រតិបត្តិ​ការ​ពាណិជ្ជកម្ម​នៅ​កម្ពុជា​។​ ​
​ការសម្រេច​បង្កើត​ការិយាល័យ​ចិន​នេះ​ ​បានឱ្យ​ដឹង​ក្នុង​ជំនួប​រវាង​លោក​ ​ប៉ាន​ ​សូរ​ស័ក្តិ​ ​រដ្ឋមន្រ្តី​ក្រសួង​ពាណិជ្ជកម្ម​ ​ជាមួយ​ប្រតិភូ​ចិន​ ​ដឹកនាំ​ដោយ​ ​លោក​ ​វ៉ាង​ ​ប៊ី​ង​ ​(​WANG​ ​Bing​)​ ​នាយក​ប្រតិបត្តិ​រង​នៃ​ធានា​គារ​ចិន​ ​ប្រចាំ​ទីក្រុង​ហុងកុង​ ​នៅ​ថ្ងៃទី២​ ​ខែមេសា​ ​ឆ្នាំ២០១៩នេះ​ ​ដើម្បី​ពង្រឹង​ ​និង​ពង្រីក​កិច្ច​សហប្រតិបត្តិ​ការ​រវាង​ក្រសួង​ពាណិជ្ជកម្ម​កម្ពុជា​ ​និង​គ្រឹះស្ថាន​ហិរញ្ញវត្ថុ​រដ្ឋ​របស់​ចិន​ដ៏​ធំ​មួយ​នេះ​ ​។​

​
​នៅក្នុង​ឱកាស​នោះ​ដែរ​ ​លោក​ ​វ៉ាង​ ​ប៊ី​ង​ ​បាន​ជម្រាប​ជូន​លោក​រដ្ឋមន្ត្រី​ ​អំពី​ការរៀបចំ​យុទ្ធសាស្ត្រ​មួយចំនួន​ ​ដើម្បី​ទាក់ទាញ​ការ​វិនិយោគ​បន្ថែម​ពី​ប្រទេស​ចិន​ ​មកកាន់​ប្រទេស​កម្ពុជា​ ​ស្របតាម​គំនិត​ផ្តួចផ្តើម​ ​«​ផ្លូវ​ ​និង​ខ្សែ​ក្រ​វ៉ាត់​»​ ​របស់​លោក​ ​ស៊ី​ ​ជិន​ពីង​ ​ប្រធានាធិបតី​ចិន​ ​។​
​ក្នុង​ជំនួប​នេះ​ដែរ​ ​រដ្ឋមន្ត្រី​ក្រសួង​ពាណិជ្ជកម្ម​ ​លោក​ ​ប៉ាន​ ​សូរ​ស័ក្តិ​ ​បាន​ស្នើ​តំណាង​ធនាគារ​ចិន​ ​ប្រចាំ​នៅ​កម្ពុជា​ ​គាំទ្រ​ការប្រើ​ប្រាស់​ ​និង​ទូទាត់​រូបិយប័ណ្ណ​ខ្មែរ​ ​(​ប្រាក់​រៀល​)​ ​តាមរយៈ​ប្រព័ន្ធ​អេឡិចត្រូនិក​ ​(​E​-​Payment​)​ ​ជាពិសេស​ ​QR​ ​Code​ ​ដែល​ជា​មធ្យោបាយ​ទូទាត់​សាច់ប្រាក់​ដ៏​ពេញនិយម​នៅក្នុង​ប្រទេស​ចិន​ ​ដើម្បី​ជំរុញ​កិច្ច​សម្រួល​ពាណិជ្ជកម្ម​ ​និង​ពង្រឹង​ទំនាក់ទំនង​សេដ្ឋកិច្ច​ ​និង​វិនិយោគ​នៃ​ប្រទេស​ទាំងពីរ​។​

​លោក​រដ្ឋមន្ត្រី​ ​ប៉ាន​ ​សូរ​ស័ក្តិ​ ​បាន​ជំរុញ​តំណាង​ធនាគារ​ចិន​ ​ទទួលយក​ការ​ទូទាត់ប្រាក់​រៀល​ ​ឱ្យ​បាន​កាន់តែ​ទូលំទូលាយ​ ​សម្រាប់​សកម្មភាព​ធុរកិច្ច​ ​និង​វិនិយោគ​ទ្វេភាគី​ ​ជាពិសេស​ការដោះដូរ​ពាណិជ្ជកម្ម​តាម​ប្រព័ន្ធ​អេឡិចត្រូនិក​ ​ឬហៅ​ថា​ ​E​-​Commerce​ ​ដោយ​ប្រើប្រាស់​បច្ចេកវិទ្យា​ ​E​-​Payment​ ​និង​ ​QR​ ​Code​ ​ដូចគ្នា​ជាមួយ​កម្មវិធី​ទូរស័ព្ទ​ដៃ​ ​WeChat​ ​ឬ​ ​Alipay​ ​ជាដើម​។​
​សូមជម្រាប​ថា​ ​រដ្ឋាភិបាល​កម្ពុជា​ ​និង​រដ្ឋាភិបាល​ចិន​ ​បាន​ដាក់ចេញ​ផែនការ​ជំរុញ​ពាណិជ្ជកម្ម​រវាង​ប្រទេស​ទាំងពីរ​ ​សម្រាប់​ឆ្នាំ២០១៨​ ​ដល់​ឆ្នាំ២០២០​ ​ឲ្យបាន​ ​៦ពាន់​លាន​ដុល្លារ​អាមេរិក​៕​
​

​អត្ថបទ​៖​ ​ចាន់​ ​សោភ័ណ្ឌ​លាភ​