Connect with us

មក​ដឹងពី​វិធី​លេង​ ​“​ល្បែង​ស្តេច​ចង់​”​ ​ទុក​លេងកម្សាន្ត​ពេល​ចូលឆ្នាំ​ថ្មីនេះ​

​ភ្នំពេញ​៖​ ​ប្រទេស​កម្ពុជា​មាន​ល្បែង​ប្រជាប្រិយ​ជាច្រើន​អនេក​ ​ដែល​ប្រជាពលរដ្ឋ​ទូទាំង​ប្រទេស​និយម​លេងកម្សាន្ត​ ​នៅពេល​ទំនេរ​ ​ពេល​បុណ្យទាន​ ​និង​ពេល​ធ្វើពិធី​តូច​ ​ធំ​ផ្សេង​ៗ​ដូចជា​៖​ ​ពិធី​ចូលឆ្នាំ​ជាដើម​ជាប់​ជា​ប្រពៃណី​តាំងពី​ព្រេងនាយ​មក​។​ ​យើង​សូម​ណែនាំ​ ​”​ល្បែង​ស្តេច​ចង់​”​ ​ជា​ល្បែង​ម៉្យាង​ដែល​ពួក​កុមារា​ ​កុមារី​ ​ឬ​ ​យុវវ័យ​គ្រប់​ភូមិ​ ​ស្រុក​ ​ទូទាំង​ប្រទេស​តែង​លេង​នៅពេល​ទំនេរ​ក្នុង​វេលា​យប់ខែភ្លឺ​។​ ​អ្នកលេង​ត្រូវ​ ​មាន​ប្រុស​ ​មាន​ស្រី​ច្រើន​នាក់​មិនកំណត់​ ​ពេល​លេង​គេ​ចែក​គ្នា​ជា​ ​២ពួក​ ​ប្រុស១ពួក​ ​ស្រី១ពួក​ ​ក្នុង​បណ្តា​អ្នក​ទាំងពីរ​ពួក​នេះ​គេ​តាំង​ប្រុស​ ​ឬ​ ​ស្រី​ម្នាក់​ឱ្យធ្វើ​ជា​ស្តេច​ឱ្យ​អង្គុយ​នៅ​ទីមួយ​ចំ​កណ្តាល​ទី​ ​លើ​កៅអី​ ​ឬ​ ​លើ​វត្ថុ​អ្វីមួយ​មាន​ត្បាល់​ជាដើម​។​ ​

កាល​អ្នកធ្វើ​ស្តេច​អង្គុយ​លើទឹក​ដី​ដ៏​សមគួរ​មួយ​ហើយ​ ​ខាង​ស្រី​គេ​ឱ្យ​ស្រី​ម្នាក់​ដើរចូល​ទៅ​ខ្សឹប​នឹង​ស្តេច​ថា​ខ្លួន​ស្រលាញ់​ឈ្មោះ​ណាមួយ​ ​ឧបមា​ថា​ ​ឈ្មោះ​ ​ក​ ​ឬ​ ​ខ​ ​ខ្សឹប​ហើយ​គេ​ថយ​មក​អង្គុយ​ ​ឬ​ ​ក៏​មក​ឈរ​នៅកន្លែង​ដើម​វិញ​ ​ខាង​ប្រុស​គេ​ឱ្យ​ប្រុស​ម្នាក់​ដើរចូល​ទៅ​រក​ស្តេច​ដែរ​ ​ប្រសិនជា​មិន​ចំ​ឈ្មោះ​ដែលគេ​ខ្សឹប​ទុក​ទេ​ក៏ហីទៅ​ ​តែបើ​ប្រុស​ដែល​មក​នោះ​ចំលើ​ឈ្មោះ​ដែល​ស្រី​គេ​បាន​ខ្សឹប​នោះ​មែន​ ​ស្តេច​ស្រែក​ថា​ ​”​អៀវ​ៗ​”​ ​ហើយ​គេ​បញ្ជិះ​ទៅចុះ​នៅកន្លែង​ខាង​ស្រី​។​ ​រួចហើយ​ខាង​ប្រុស​គេ​ឱ្យ​ប្រុស​ខាងគេ​ម្នាក់​ចូល​ទៅ​ខ្សឹប​ម្តង​ ​បើ​ប្រុស​នោះ​ចូល​ទៅ​ខ្សឹប​ថា​”​ខ្ញុំ​ស្រឡាញ់​នាង​ណាមួយ​ ​ឧបមា​ថា​ឈ្មោះ​ ​”​ខ​”​ ​ខ្សឹប​ហើយ​គេ​ថយ​ទៅវិញ​ ​បើ​ស្រី​ម្នាក់​ឈ្មោះ​”​ខ​”​ចូល​ទៅ​មែន​ស្តេច​ស្រែក​ថា​”​អៀវ​ៗ​”​ហើយ​ឱ្យ​ប្រុស​ជិះ​ខាង​ស្រី​វិញ​ហើយ​ស្រែក​ ​”​អៀវ​ៗ​”​ ​ដូច​ ​ ​គ្នា​។​ ​បាន​សេចក្តី​ថាបើ​ខាងណា​ចូល​ទៅ​ខ្សឹប​ថា​ខ្លួន​ស្រលាញ់​ឈ្មោះ​ ​”​ក​”​ ​ហើយ​បែរជា​ឈ្មោះ​ ​ ​”​ខ​”​ ​ចូល​មករ​ក​ស្តេច​វិញ​នោះ​ស្តេច​មិន​ឱ្យ​អ្នក​ខ្សឹប​ជិះ​ ​ឬ​ ​អៀវ​គេ​ទេ​ ​អ្នក​ខ្សឹប​នោះ​ត្រូវ​ថយ​ទៅវិញ​ ​ហើយ​គេ​ឱ្យ​ម្ខាង​ចូល​ទៅ​ខ្សឹប​ជាថ្មី​ទៀត​ចេះតែ​ផ្លាស់​គ្នា​របៀប​នេះ​រហូតដល់​ឈប់​។​ ​

អ្នក​ដែល​ធ្វើជា​ស្តេច​ត្រូវ​មើល​ការខុសត្រូវ​ក្នុ​ងរឿ​ងនេះ​ដោយ​សច្ចៈ​ ​និង​ ​យុត្តិធម៌​ ​ល្បែង​នេះ​ស្រេច​លើ​អ្នកធ្វើ​ស្តេច​ ​បើ​អ្នកធ្វើ​ស្តេច​ប្រកបដោយ​អគតិ​ ​ចង់ឱ្យ​អ្នកណា​ជិះ​អ្នកណា​ក្រៅពី​ឈ្មោះ​ដែលគេ​ខ្សឹប​ក៏បាន​គឺថា​បើ​ម្នាក់​ចូល​ទៅ​ខ្សឹប​ថា​ស្រលាញ់​ឈ្មោះ​ ​”​ក​”​ ​ហើយ​ទោះបី​ឈ្មោះ​”​ខ​”​ ​ចូល​មក​ស្តេច​ស្រែក​ថា​”​អៀវ​”​ទៅ​ក៏​ចេះតែ​បាន​ព្រោះ​អ្នក​ចូល​ទៅ​ក្រោយមក​បានឮ​អ្នក​មុនគេ​ខ្សឹប​ថា​ស្រលាញ់​ឈ្មោះ​ណាៗ​ទេ​។​ ​តែបើ​មាន​របៀប​លេង​លំអៀង​បែបនេះ​អ្នកលេង​ណា​ដែល​ចាប់ថ្នាក់​បាន​តវ៉ា​ឡើង​អាច​សុំ​គេ​ឱ្យ​ប្តូរ​អ្នកធ្វើ​ស្តេច​បាន​ ​ប្រសិនបើ​អ្នកធ្វើ​ស្តេច​ប្រកបដោយ​សច្ចៈ​ ​និង​ ​យុត្តិធម៌​នោះ​ការ​លេង​នេះ​ទៀងទាត់​ណាស់​។​ ​
​ល្បែង​នេះ​ជា​ល្បែង​កម្សាន្ត​មែន​តែ​វា​ជា​ល្បែង​ហាត់​ចិត្ត​មនុស្ស​ឱ្យ​ប្រកបដោយ​សច្ចៈ​ ​និង​ ​យុត្តិធម៌​មិន​ឱ្យ​ប្រកបដោយ​អគតិ​(​សេចក្តី​លំអៀង​)​ ៤ យ៉ាងគឺ​ឆន្ទាគតិ​​លំអៀង​ព្រោះ​ស្រឡាញ់ ​ទោសាគតិ​​លម្អៀង​ព្រោះ​ខឹង​ ​ភយាគតិ​លម្អៀង​ព្រោះ​ខ្លាច​ ​មោហាគតិ​ លម្អៀង​ព្រោះ​ភ័ន្តច្រឡំ​។​ ​ម៉្យាងទៀត​ជា​ការ​បង្ហាត់​ឱ្យ​មនុស្ស​ចេះ​ ​ជ្រើសតាំង​គ្នា​ឱ្យធ្វើ​ការ​ជា​តំណាង​ភ្នែក​ច្រមុះ​ខ្លួនឯង​គឺ​ត្រូវ​ចេះ​ជ្រើស​រក​នរណា​ដែលគេ​យល់ថា​ជា​មនុស្ស​ត្រឹមត្រូវ​បរិសុទ្ធ​ធ្វើការ​បាន​ល្អ​តាម​គន្លងធម៌​ពិ​តៗ​៕​

Photo: Chea Phal

 

​ដកស្រង់​ដោយ​ ​ក្រសួងអប់រំយុវជន​និងកីឡា​
​អត្ថបទ​៖​ ​គង់​ ​ចាន់​ស្រី​នុច​

Loading...

ពេញនិយម