Pep ប្រាប់ពីមូលហេតុដែលមិនដាក់ De Bruyne ជម្រើសដំបូងក្នុងការប្រកួតជាមួយ Spur

២ ឆ្នាំមុន

ខែមេសា ១០, ២០១៩ កីឡា

ប្រទេសអង់គ្លេស៖ លោក Pep Guardiola បានបញ្ជាក់ថា លោកមិនដាក់កីឡាករ Kevin De Bruyne ជម្រើសដំបូងក្នុងការប្រកួតចាញ់ក្រុម Tottenham Hotspur មកពីហេតុផលយុទ្ធសាស្ត្រ។De Bruyne បានត្រឹមតែលេងជាកីឡាករបម្រុងនៅនាទី៨៩ នៅឯកីឡដ្ឋានថ្មី Tottenham Hotspur ហើយមិនអាចរកគ្រាប់បាល់បានទេ នៅពេល ManCity បានទទួលបរាជ័យ ១-០ ក្នុងជើងទី១ នៃក្របខ័ណ្ឌ Champions League វគ្គ ១/៤ ផ្តាច់ព្រ័ត្រ។

អ្នកចាត់ការក្រុមមេឃខៀវបានដាក់កីឡាករ Ilkay Gundogan និង Fernandinho ដើម្បីជួយ David Silva នៅតំបន់កណ្ដាល។ គ្រូបង្វឹករូបនេះបានទទូចថា ក្រុមរបស់លោកលេងបានយ៉ាងល្អ ប៉ុន្តែលោកបានពន្យល់ថា ការមិនដាក់ De Bruyne គឺដើម្បីធ្វើឲ្យស្នូលនៃក្រុមកាន់តែមានភាពរឹងមាំជាងមុន។

លោកបានប្រាប់សន្និសីទសារព័ត៌មានថា៖ « ខ្ញុំបានសម្រេចចិត្តដាក់លេងជាមួយខ្សែបម្រើកណ្តាលពីររូបនៅក្នុងទីតាំងនោះគឺដើម្បីឱ្យក្រុមរឹងមាំជាងមុន។ ខ្ញុំបានសម្រេចចិត្តដាក់កីឡាករផ្សេងទៀត ខ្ញុំដឹងថា វាគឺជាការលំបាកសម្រាប់ Bruyne »៕