Connect with us

ភ្ញៀវ​ទេសចរ​បរទេស​ ​នាំគ្នា​ទៅ​មើល​កញ្ចុំ​ផ្កាយ​កាឡាក់ស៊ី​ ​មីល​គី​វ៉េ​ ​នៅ​លើ​ភ្នំបូកគោ​

​កំពត​៖​ ​រឿង​ដ៏​អស្ចារ្យ​មួយ​ដែល​កើតមាន​នៅ​កម្ពុជា​ ​យូរណាស់​មក​ហើយ​ ​ប៉ុន្តែ​ហាក់​មិនទាន់​មាន​ភាព​ល្បី​សុះសាយ​នៅឡើយ​ ​នោះ​គឺ​ការ​មើលឃើញ​កាឡាក់ស៊ី​ ​ឬ​ ​កញ្ចុំ​ ​ផ្កាយ​រាប់ពាន់​លាន​ដួង​(​galaxy​ ​Milky​ ​Way​)​ ​ដែល​រះ​នៅ​អវកាស​ ​ពីលើ​កំពូលភ្នំ​បូកគោ​ ​និង​លើកំពូល​ភ្នំ​ឱរ៉ាល់​ ​។​

​លោក​ ​ថោង​ ​ខុន​ ​រដ្ឋមន្ត្រី​ក្រសួងទេសចរណ៍​ ​បានឱ្យ​ដឹង​ថា​ ​លោក​ ​បាន​ជួប​ជជែក​សំណេះសំណាល​ការងារ​ជាមួយ​លោក​ ​ស្រ៊ុ​ន​ ​សុភា​ ​ជា​មគ្គុទ្ទេសក៍​ទេសចរណ៍​ប្រចាំ​តំបន់​សៀមរាប​-​អង្គរ​ ​មួយ​រូប​ ​ដែល​ជា​មគ្គុ​ទ្ទ​សក៍​យ៉ាង​ស្ទាត់ជំនាញ​ក្នុង​ការ​ដើរ​ជាមួយ​ភ្ញៀវ​ទេស​ចរ​ធំៗ​ ​នៅ​លើ​នាវា​ទេសចរណ៍​ ​តាម​ដងទន្លេ​មេគង្គ​ ​ហើយ​លោក​ ​សុភា​ ​បាន​នាំ​ដំណឹង​អំពី​ការចាប់អារម្មណ៍​របស់​ភ្ញៀវ​ទេសចរ​បរទេស​ ​ទៅលើ​ការ​ទស្សនា​កញ្ចុំ​ផ្កាយ​កាឡាក់ស៊ី​ ​ពីលើ​ភ្នំបូកគោ​ ​នៅ​ខេត្តកំពត​ ​និង​នៅ​លើកំពូល​ភ្នំ​ឱរ៉ាល់​ ​ខេត្ត​កំពង់ស្ពឺ​ ​។​

​បើ​តាម​លោក​ ​សុភា​ ​រឿង​ដ៏​អស្ចារ្យ​មួយ​នេះ​ ​បាន​កើតមាន​នៅ​កម្ពុជា​ជា​យូរណាស់​មក​ហើយ​ ​ដែល​អ្នកស្រាវជ្រាវ​វិទ្យាសាស្ត្រ​ខ្លះ​ ​បានដឹង​ ​តែ​ហាក់​មិនទាន់​មាន​ភាព​ល្បី​សុះសាយ​នៅឡើយ​។​ ​លោក​ថា​ ​ការ​មើលឃើញ​កញ្ចុំ​ផ្កាយ​កាឡាក់ស៊ី​ ​រាប់ពាន់​លាន​ដួង​ ​ដែល​រះ​នៅ​អវកាស​ ​គេ​អាច​មើលឃើញ​តែ​ពីរ​កន្លែង​ប៉ុណ្ណោះ​ ​គឺ​លើកំពូល​ភ្នំបូកគោ​ ​ម្តុំ​វាលស្រែ​មួយ​រយ​ ​និង​លើកំពូល​ភ្នំ​ឱរ៉ាល់​ ​។​

​លោក​ ​ស្រ៊ុ​ន​ ​សុភា​ ​បានឱ្យ​ដឹង​ទៀត​ថា​ ​ភ្ញៀវ​ទេសចរ​ ​បាន​ប្រាប់​លោក​ថា​ ​កាឡាក់ស៊ី​នោះ​ ​វា​ជា​ផ្កាយ​បញ្ចេញ​ពណ៌​ចម្រុះ​ ​នា​ពេល​រាត្រី​ ​ស្ថិតនៅ​ផ្តុំគ្នា​រហូតដល់​រាប់ពាន់​លាន​ផ្កាយ​ ​។​ ​ជាទូទៅ​ ​មានតែ​តំបន់​ប៉ូល​ទេ​ទើប​គេ​អាច​មើល​ផ្កាយ​ចម្លែក​នេះ​ដោយ​កាមេរ៉ា​ពិសេស​ ​។​ ​ប៉ុន្តែ​បែរជា​នៅ​កម្ពុជា​ ​មានវាសនា​អាច​មើលឃើញ​ ​និង​អាច​ថតរូប​បាន​ដូច​នៅ​តំបន់​ប៉ូល​ដែរ​ ​។​

​លោក​ ​សុភា​ ​បាន​បញ្ជាក់​ថា​ ​នៅចន្លោះ​ខែមករា​ដល់​ខែឧសភា​ ​ផ្កាយ​នេះ​ រះ​ក្នុង​ចន្លោះ​ម៉ោង​ ​២ភ្លឺ​ដល់ម៉ោង​ ​៤ភ្លឺ​ ​។​ ​រីឯ​​ពី​ខែមិថុនា​​ដល់​ខែធ្នូ​ ​វា​រះ​ក្នុង​ចន្លោះ​ពី​ម៉ោង​ ​៩យប់​ ​ដល់ម៉ោង​ ​១២កណ្តាល​អាធ្រាត្រ​ ​និង​ ​រះ​នៅ​ទិសអាគ្នេយ៍​តែមួយគត់​។​

​លោក​ ​រដ្ឋមន្ត្រី​ ​ថោង​ ​ខុន​ ​បាន​បញ្ជាក់​ថា​ ​ចំណុច​នេះ​​គឺជា​រឿង​ដ៏​អស្ចារ្យ​ ​និង​អ​ច្ឆ​រិយៈ​ដ៏​ល្អ​មួយ​​សម្រាប់​កម្ពុជា​ ​ដែល​នេះ​គឺជា​ផលិតផល​ទេសចរណ៍​ថ្មី​មួយ​ដ៏​គួរ​ឱ្យ​ទាក់ទាញ​ ​។​

​លោក​រដ្ឋមន្ត្រី​ ​បាន​បន្ត​ថា​ ​ហ្វូង​ផ្កាយ​មីល​គី​វេ​ ​នេះ​ ​មាន​រូបរាង​ល្អ​ចម្លែក​ ​ខុសពី​ផ្កាយ​ធម្មតា​ ​ដែល​មនុស្ស​មិន​អាច​មើលឃើញ​ញឹកញាប់​ ​ក្នុង​ពេល​រាត្រី​ឡើយ​ ​មានតែ​ទីទួល​ខ្ពស់​ ​ដូចជា​ ​ភ្នំបូកគោ​ជាដើម​ ​ទើប​អាច​មានឱកាស​បាន​មើលឃើញ​ ​។​ ​

​បើ​តាម​ក្រុម​តារា​សាស្រ្ត​ ​បាន​ប៉ាន់ស្មាន​ថា​ ​បណ្ដុំ​ផ្កាយ​មីល​គី​វេ​នេះ​ ​មាន​អាយុកាល​ជាង​ ​១៣,២ពាន់​លាន​ឆ្នាំ​ ​កន្លងមក​ហើយ​ ​។​ ​លោក​រដ្ឋមន្ត្រី​ ​ថោង​ ​ខុន​ ​បាន​លើកឡើង​ថា​ ​នេះ​ជា​អច្ឆរិយភាព​មួយទៀត​របស់​ប្រទេស​កម្ពុជា​ ​ដែល​មាន​ទីតាំង​ដ៏​ល្អ​នេះ​ ​មិន​ងាយ​មាន​ប្រទេស​ណា​ផ្សេង​ ​ចេះតែ​មាន​នោះ​ទេ​ ​ប៉ុន្តែ​ប្រទេស​កម្ពុជា​ ​ពិតជា​ទីតាំង​ដ៏​ល្អ​សម្រាប់​ទស្សនា​កញ្ចុំ​ផ្កាយ​ ​ឬ​ ​កាឡាក់ស៊ី​នេះ​ ​។​

​លោក​រដ្ឋមន្ត្រី​ ​បាន​អំពាវនាវ​ដល់​ភ្ញៀវ​ទេសចរ​ជាតិ​-​អន្តរជាតិ​ ​សូម​សាកល្បង​ទៅ​ទស្សនា​នូវ​ទស្សនីយភាព​ដ៏​អ​ច្ឆ​រិយៈ​នេះ​ឱ្យ​បាន​ច្រើន​កុះករ​ ​ហើយក៏​អំពាវនាវ​ឱ្យ​ក្រុមហ៊ុន​សុខា​ ​បូកគោ​ ​រៀបចំ​ ​សម្បទា​ទេសចរ​ ​ឱ្យ​បាន​ល្អ​សមរម្យ​គ្រប​គ្រាន់​ ​នៅ​ចំណុច​គោលដៅ​ទេសចរណ៍​នោះ​ ​ដើម្បី​បម្រើ​ដល់​ភ្ញៀវ​ទេសចរ​ជាតិ​ ​និង​អន្តរជាតិ​ ​៕​

  • អត្ថបទទាក់ទង :
  • Featured
Loading...

ពេញនិយម