រដ្ឋមន្រ្តីការបរទេសសហរដ្ឋអាមេរិក បានមកដល់តំបន់អាស៊ីអាគ្នេយ៍

រដ្ឋមន្រ្តីការបរទេសសហរដ្ឋអាមេរិក លោក Mike Pompeo នៅថ្ងៃសុក្រនេះ បានមកដល់ ប្រទេសម៉ាឡេស៊ីហើយ មុននឹងទៅចូលរួមកិច្ចប្រជុំនៅប្រទេសសឹង្ហបុរី ។
នៅក្នុងប្រទេសម៉ាឡេស៊ី រដ្ឋមន្រ្តីការបរទេសសហរដ្ឋអាមេរិក ក៏បានជួបជាមួយនឹងនាយករដ្ឋមន្រ្តីម៉ាឡេស៊ី លោក Mahathir Mohammed មុនពេលលោកចាកចេញ ដើម្បីចូលរួមវេទិកាសន្តិសុខតំបន់ ដែលរៀបចំឡើងនៅប្រទេសសឹង្ហបុរី ជាទីកន្លែងដែល រដ្ឋមន្រ្តីការបរទេសកូរ៉េខាងជើង ក៏នឹងចូលរួមផងដែរ ។
មន្រ្តីសហរដ្ឋអាមេរិក បាននិយាយអោយដឹងថា សម្រាប់វេទិកា នៅប្រទេសសឹង្ហបុរី លោក Mike Pompeo នឹងផ្តោតការយកចិត្តទុកដាក់លើការបន្តដាក់សម្ពាធអោយរដ្ឋាភិបាលក្រុង ព្យុងយ៉ាង ក្នុងការអនុវត្តតាមឆន្ទះដែលធ្វើឡើងដោយលោក គីម ជុងអ៊ុន ក្នុងការរំសាយចោលនូវកម្មវិធីអាវុធនុយក្លេអ៊ែរ ៕