Connect with us

ភ្ញៀវ​ទេសចរ​តាម​នាវា​ ​រអ៊ូ​ថា​ ​ចង់ទៅ​លេង​អង្គរវត្ត​ ​តែ​គ្មាន​ជើងហោះហើរ​វិលមកវិញ​ទាន់​

​ភ្នំពេញ​៖​ ​ក្រសួងទេសចរណ៍​បានឱ្យ​ដឹង​ថា​ ​ភ្ញៀវ​ទេសចរ​អន្តរជាតិ​ដែល​មកដល់​ប្រទេស​កម្ពុជា​ ​តាមរយៈ​នាវា​ទេសចរណ៍​ខ្នាត​យក្ស​ធំៗ​ ​នៅ​កំពង់ផែ​ខេត្ត​ព្រះសីហនុ​ ​កន្លងមក​ ​ក៏​ចង់​នាំគ្នា​ទៅ​ទស្សនា​កម្សាន្ត​នៅ​រមណីយដ្ឋាន​អង្គរ​ ​ក្នុងរយៈពេល​ខ្លី​ណាមួយ​ផង​ដែរ​ ​ក៏ប៉ុន្តែ​ ​មិនទាន់​មាន​សេវា​ដឹកជញ្ជូន​តាមផ្លូវអាកាស​ ​ដែល​អាច​វិលមកវិញ​ទាន់​ការ​ចាកចេញ​របស់​នាវា​។​

​ត្រង់​ចំណុច​នេះ​ ​លោក​ ​ហោ​ ​សា​រុន​ ​អនុរដ្ឋ​លេខាធិការ​ក្រសួងទេសចរណ៍​ ​បាន​លើកឡើង​ក្នុង​កិច្ចប្រជុំ​ពេញអង្គ​លើក​ទី១​ ​អាណត្តិ​ទី៦​ ​របស់​គណៈកម្មការ​អន្តរក្រសួង​ ​ដើម្បី​សម្របសម្រួល​ការ​ធ្វើដំណើរ​ ​និង​ដឹកជញ្ជូន​ភ្ញៀវ​ទេសចរ​ ​និង​អ្នកដំណើរ​ ​នៅ​តំបន់​ច្រក​ទ្វារ​ព្រំដែន​អន្តរជាតិ​ ​និង​ច្រក​ទ្វារ​អន្តរជាតិ​ទូទាំង​ប្រទេស​ ​នា​ថ្ងៃទី៨​ ​ខែឧសភា​ ​ឆ្នាំ២០១៩​ ​នៅ​ទីស្ដីការ​ក្រសួងទេសចរណ៍​។​

​លោក​អនុរដ្ឋ​លេខាធិការ​បានឱ្យ​ដឹង​ថា​៖​ ​”​ភ្ញៀវ​ទេសចរ​ភាគច្រើន​ ​ពួកគាត់​មានបំណង​ចង់ទៅ​ទស្សនា​តាម​កោះ​នានា​ ​និង​ចង់​ជិះ​យន្តហោះ​ទៅ​ទស្សនា​កម្សាន្ត​ ​នៅ​ប្រាសាទអង្គរវត្ត​ ​ដោយ​វិល​ល្ងាច​ឱ្យ​ទាន់​ជើង​នាវា​ចេញទៅ​វិញ​ ​ប៉ុន្តែ​ការ​លំបាក​លើ​ទូក​ទេសចរណ៍​ ​មិន​មាន​ម៉ោង​កំណត់​ជាក់លាក់​ ​ហើយ​ជើងហោះហើរ​មិន​ទៀងទាត់​ទៀត​”​។​

​ក្រសួងទេសចរណ៍​បន្ត​ថា​ ​ចំណុច​នេះ​ ​គឺ​បាន​បញ្ជាក់​ពី​ការខាតបង់​កំណើន​ភ្ញៀវ​ទេសចរ​ ​ដែល​ទៅ​ទស្សនា​រមណីយដ្ឋាន​អង្គរ​ ​ដោយសារ​បញ្ហា​ការ​ដឹកជញ្ជូន​តាមផ្លូវអាកាស​នេះ​ ​ក៏ដូចជា​ ​ភាព​មិន​ទៀងទាត់​នៃ​ការ​ចេញ​ចាក​របស់​នាវា​ទេសចរណ៍​អន្តរជាតិ​ទាំងនោះ​។​ ​នៅ​រយៈពេល៤ខែ​ ​ដើមឆ្នាំ២០១៩នេះ​ ​កំពង់ផែ​ស្វយ័ត​ខេត្ត​ព្រះសីហនុ​ ​បាន​កត់ត្រា​ទុក​ចំនួន​នាវា​ទេសចរណ៍​បាន​ ​៣០គ្រឿង​ ​កើនឡើង​ ​៥៧,៨៩​%​ ​ដោយ​ផ្ទុក​ភ្ញៀវ​ទេសចរ​អន្តរជាតិ​ចំនួន​ ​២៩១១១នាក់​ ​កើនឡើង​ ​៧៨,២៥​%​។​

​អគ្គនាយក​នៃ​កំពង់ផែ​ស្វយ័ត​ខេត្ត​ព្រះសីហនុ​ ​បាន​បញ្ជាក់​ទៀត​ថា​ ​ការ​ចូល​ចត​របស់​នាវា​ទេសចរណ៍​ទាំងនោះ​ ​មាន​រយៈពេល​ជាមធ្យម​ប្រមាណ​ត្រឹមតែ​ ​១៥ម៉ោង​ ​ប៉ុណ្ណោះ​។​ ​ចំពោះ​កត្តា​នេះ​ ​លោក​ ​ថោង​ ​ខុន​ ​រដ្ឋមន្ត្រី​ក្រសួងទេសចរណ៍​ ​បាន​លើកឡើង​ថា​ ​គេ​ចាំបាច់​ត្រូវ​ដោះស្រាយ​ជា​កញ្ចប់​ ​ហើយ​តម្រូវ​ឱ្យ​មានការ​ចូលរួម​ពី​គ្រប់​ភាគី​ពាក់ព័ន្ធ​ ​និង​ផ្នែកឯកជន​៕​

​អត្ថបទ​៖​ ​ចាន់​ ​សោភ័ណ្ឌ​លាភ​

  • អត្ថបទទាក់ទង :
  • Featured
Loading...

ពេញនិយម