ខ្សែបម្រើ Axel Witsel វិចបង្វិចពីក្លឹបចិន Tianjin Quanjian មកកាន់ Borussia Dortmund នៅអាល្លឺម៉ង់

កាលពីម្សិលមិញ ខ្សែបម្រើ Axel Witsel បានសម្រេចចាកចេញពីក្លឹបចិន Tianjin Quanjian មកចូលរួមក្លឹបអាល្លឺម៉ង់ Borussia Dortmund។ ក្នុងឱកាសនេះ កីឡាករសញ្ញាតិបែលហ្ស៊ិកបាននិយាយ៖ “ក្រោយព្រឹត្តិការណ៍ World Cup គោលដៅរបស់ខ្ញុំគឺផ្ទេរពីចិនមកលេងនៅអឺរ៉ុប។ ខ្ញុំសប្បាយចិត្តខ្លាំងណាស់ និងមានមោទនភាពដែលបានចូលលេងឲ្យ Dortmund”។ Axel Witsel បានចាប់អាជីពនៅក្លឹបបែលហ្សិក Standard Liege និងលេងនៅទីនោះ ពីឆ្នាំ ២០០៦ ដល់ ២០១១ មុនចាកចេញទៅលេងឲ្យ Benfica រួចក៏បន្តទៅក្លឹបរុស្ស៊ី Zenit Saint Petersburg។ គួររំលឹកថា ខ្សែបម្រើរូបនេះបានសម្រេចចេញទៅចូលរួមជាមួយក្លឹប Tianjin Quanjian កាលពីខែមករា ឆ្នាំ២០១៧ ដោយលេងបានសរុប ៤៧ ប្រកួតនិងស៊ុតចូលទី ៦ គ្រាប់។