Connect with us

ពលករ​ខ្មែរ២នាក់​ ​បាន​ទទួល​វីហ្សា​ពិសេស​របស់​ជប៉ុន​ ​មុនគេ​បង្អស់​នៅក្នុង​ប្រទេស​

​ជប៉ុន​៖​ ​នាយកដ្ឋាន​អន្តោប្រវេសន៍​ប្រទេស​ជប៉ុន​ ​បាន​ចេញ​សេចក្ដីប្រកាស​ព័ត៌មាន​មួយ​ថា​ ​ជនបរទេស​ ​ដែល​ទទួល​បាន​ទិដ្ឋាការ​ ​(​វីហ្សា​)​ ​ពិសេស​របស់​ប្រទេស​ជប៉ុន​ ​២នាក់​ដំបូង​ ​គឺ​មាន​ប្រភព​ពី​ប្រទេស​កម្ពុជា​។​ ​នាយកដ្ឋាន​ដដែល​ឱ្យ​ដឹង​ថា​ ​ខ្លួន​បាន​ចេញទិដ្ឋាការ​ជំនាញ​ប្រភេទ១​ ​ផ្នែក​ជំនាញ​ពិសេស​ ​ឱ្យ​ស្ត្រី​ខ្មែរ​ ​២រូប​ ​កាលពី​ថ្ងៃទី២៦​ ​ខែមេសា​ ​ឆ្នាំ២០១៩​។​

​ប្រភព​ព័ត៌មាន​ ​មិនបាន​បញ្ជាក់​ឈ្មោះ​ ​ស្ត្រី​ខ្មែរ​ទាំង២រូប​ ​ឡើយ​ ​គ្រាន់តែ​ដឹង​ថា​ ​ពួកគេ​មាន​អាយុ​ខ្ទង់​ ​២០ឆ្នាំ​។​ ​ស្ត្រី​ខ្មែរ​ទាំង២រូប​ ​នឹង​បម្រើការ​ងារ​ក្នុង​វិស័យ​កសិកម្ម​ ​នៅក្នុង​ប្រទេស​ជប៉ុន​ ​បន្ទាប់ពី​ទទួលការ​បំពាក់បំប៉ន​ ​នៅ​ក្រុមហ៊ុន​កសិកម្ម​មួយ​ ​នៅ​ទីក្រុង​អូ​សា​កា​ ​បាន​រយៈពេល​ ​៣ឆ្នាំ​។​ ​ស្ត្រី​ខ្មែរ​ទាំង២រូប​ ​ជា​អ្នក​ដែល​មានសំណាង​ ​ក្នុងចំណោម​មនុស្ស​ ​៨នាក់​ ​ដែល​ជប៉ុន​ ​ព្រម​ចេញទិដ្ឋាការ​ប្រភេទ១​ ​ឱ្យ​។​ ​អ្នកដទៃ​ទៀត​ ​កំពុង​រង់ចាំ​ការសម្រេច​ចុងក្រោយ​ ​និង​សេចក្ដីប្រកាស​។​

នាយកដ្ឋាន​របស់​ជប៉ុន​ខាងលើ​ ​ឱ្យ​ដឹង​ថា​ ​គិត​ត្រឹម​ថ្ងៃទី១៩​ ​ខែមេសា​ ​ឆ្នាំ២០១៩​ ​ចំនួន​ជនបរទេស​ដែល​ស្នើសុំ​ទិដ្ឋាការ​ប្រភេទ១​ ​និង​ក្រុមហ៊ុន​ស្របច្បាប់​ ​ដែល​កំពុង​ស្នើសុំ​បុគ្គលិក​ដែល​កាន់​ទិដ្ឋាការ​ប្រភេទ១​ ​បាន​កើន​ដល់​ ​១១៧៦​ ​លើក​។​

​សូម​រំឭក​ថា​ ​ថ្មី​ៗ​នេះ​ ​ជប៉ុន​បាន​អនុវត្ត​ច្បាប់​អន្តោប្រវេសន៍​ថ្មី​ ​ដោយ​បាន​កំណត់​ចេញទិដ្ឋាការ​ចំនួន​ ​២ប្រភេទ​ ​សម្រាប់​ពលករ​បរទេស​ ​(​ប្រភេទ១​ ​និង​ប្រភេទ២​)​។​ ​ពលករ​ទាំងនោះ​ ​ត្រូវ​ឆ្លងកាត់​ការ​ប្រឡង​តេ​ស្ត​សាកល្បង​សមត្ថភាព​ ​ហើយ​បើ​ជាប់​ ​ពួកគេ​ ​នឹង​មានឱកាស​ធ្វើការ​ ​នៅក្នុង​វិស័យ​នានា​ ​នៅ​ជប៉ុន​។​ ​សម្រាប់​ទិដ្ឋាការ​ប្រភេទ១​ ​គេ​អាច​ស្នាក់នៅ​ប្រទេស​ជប៉ុន​ ​រយៈពេល​ ​៥ឆ្នាំ​ ​និង​អាច​ពន្យារពេល​បាន​ច្រើន​លើក​ ​ក៏ប៉ុន្តែ​ ​មិន​អាច​នាំ​សាច់ញាតិ​ ​មក​រស់នៅ​ជាមួយ​បានទេ​។​ ​ចំណែក​ ​ប្រភេទ២វិញ​ ​គេ​អាច​ស្នាក់នៅ​ក្នុងរយៈពេល​ដូចគ្នា​ ​តែ​អាច​នាំ​សាច់ញាតិ​ ​មក​រស់នៅ​ជាមួយ​បាន​។​

ទិដ្ឋាការ​ប្រភេទ១​ ​មាន​វិសាលភាព​លើ​វិស័យ​ ​១៤​ ​រួមមាន​៖​ ​ការថែទាំ​ ​សេវាកម្ម​ម្ហូបអាហារ​ ​សំណង់​ ​អនាម័យ​ ​រោងចក្រ​វេច​ខ្ចប់​ ​សណ្ឋាគារ​ ​កសិកម្ម​ ​សិប្បកម្ម​ ​សំណង់​នាវា​ ​នេសាទ​ ​ការ​ជួសជុល​យានយន្ត​ ​ឧស្សាហកម្ម​ម៉ាស៊ីន​ ​អេឡិចត្រូនិក​ ​និង​អាកាសចរណ៍​។​ ​ប្រភេទ២​ ​មាន​លក្ខណៈ​ពិសេស​ជាង​ ​ដោយ​អាច​បម្រើការ​តែ​ក្នុង​វិស័យ​សំណង់​ ​និង​ផលិត​នាវា​ ​ប៉ុណ្ណោះ​ ​ដោយ​គ្រោង​អនុវត្ត​នៅ​ឆ្នាំ២០២១​៕

​ប្រភព​៖​ ​Japan​ ​Info​

​ប្រែ​សម្រួល​៖​ ​ចាន់​ ​សោភ័ណ្ឌ​លាភ​

    Loading...

    ពេញនិយម