Connect with us

កំណើនចំនួនរោងចក្រនៅកម្ពុជាកើនដល់ជិត១៦០០រោងចក្រនៅពេលនេះ

ការវិនិយោគ​នៅកម្ពុជា​​នៅតែមានភាពវិជ្ជមាន​​ក្នុង​ឆ្នាំ​នេះ បើទោះបី​ជា​​កម្ពុជា​​​រៀបចំ​ការ​​បោះឆ្នោត​ ហើយ​​ រោងចក្រ​ខ្លះត្រូវ​បិទទ្វារ​ក៏ដោយ។

យោងតាមតួលេខក្រសួងឧស្សាហកម្ម និងសិប្បកម្ម បានបង្ហាញថា គិតត្រឹមពាក់ណ្តាលឆ្នាំ២០១៨នេះ ចំនួនរោងចក្រនៅកម្ពុជាសរុបបានកើនដល់ជិត១៦០០រោងចក្រហើយនៅពេលនេះ ដោយបានកើនឡើងពីចំនួនជាង១១០០រោងចក្រកាលពីឆ្នាំ២០១៣កន្លងទៅ។

កំណើនចំនួនរោងចក្រនៅកម្ពុជាសរុបជិត១៦០០រោងចក្រនៅពេលនេះ បានបង្កើតការងារជូនប្រជាពលរដ្ឋកម្ពុជាបានចំនួនដល់ទៅជាង១លាននាក់ឯណោះ។

សម្រាប់ឆមាសទី១ឆ្នាំ២០១៨នេះវិញ ចំនួនរោងចក្របើកថ្មីៗសម្រេចបានចំនួន៧៤រោងចក្រ និងបានបញ្ជាក់ថា កម្ពុជានៅតែមានសក្តានុពលខ្ពស់ក្នុងការទាក់ទាញអ្នកវិនិយោគទាំងក្នុង និងក្រៅប្រទេសអោយបង្កើតរោងចក្រអាជីវកម្មថ្មីៗជាបន្តបន្ទាប់នៅកម្ពុជា។

ប្រមុខ​រាជរដ្ឋាភិបាលកម្ពុជា​ បាន​អះអា​ងថា កន្លងទៅ​នេះ​ រាជរដ្ឋាភិបាល​កម្ពុជា​បាន​បញ្ចេញ​កញ្ចប់ថវិកា​រដ្ឋ​ប្រមាណ​ជាង​២២លានដុល្លារ​អាមេរិក ដើម្បី​​ដោះស្រាយ​សំណង​ជូន​កម្មករ​និយោជិត​ ​ដែលថៅកែរបស់​​ខ្លួន​​​បានរត់ចោល ហើយបន្សល់ទុក​នូវ​សម្ភារៈតិចតួច​មិនអាច​ដោះស្រាយ​គ្រប់​ដល់​កម្មករ​​និយោជិត។

សូមបញ្ជាក់ថា វិស័យឧស្សាហកម្មកម្ពុជាកាន់តែធ្វើពិពិធកម្មបានច្រើនជាងមុន ខណៈដែលការដាក់ចេញគោលនយោបាយអភិវឌ្ឍន៍វិស័យឧស្សាហកម្មរបស់កម្ពុជាឆ្នាំ២០១៥-២០២៥ ដើម្បីប្រែក្លាយកម្ពុជាជាប្រទេសឧស្សាហកម្ម អាចបង្កើតនិងទាញយកតម្លៃបន្ថែមបានកាន់តែច្រើន និងផ្លាស់ប្តូរទីផ្សារការងារពីអតិពលកម្ម ទៅជាការងារប្រើប្រាស់កម្លាំងជំនាញ ដោយផ្តល់នូវតម្លៃបន្ថែមកាន់តែខ្ពស់ជាងមុន៕

 

  • អត្ថបទទាក់ទង :
  • Featured
Loading...

ពេញនិយម