នគរបាល​បច្ចេកវិទ្យា​កម្ពុជា​ព្រមាន​អ្នកប្រើ​ប្រាស់​ ​WhatsApp​ ​អាច​ប្រឈម​នឹង​ការ​លួច​ព័ត៌មាន​សំខាន់​

​រាជធានី​ភ្នំពេញ​៖​ ​យោង​តាម​អត្ថបទ​ព័ត៌មាន​របស់​នាយកដ្ឋាន​ប្រឆាំង​បទល្មើស​បច្ចេកវិទ្យា​ ​នៃ​ក្រសួងមហាផ្ទៃ​ ​បានឱ្យ​ដឹង​ថា​ ​ក្រុម​អ្នកស្រាវជ្រាវ​ផ្នែក​បច្ចេកវិទ្យា​ ​បាន​រក​ឃើញ​កំហុស​បច្ចេកទេស​ ​នៅក្នុង​កម្មវិធី​ ​WhatsApp​ ​ដែល​អាច​ឱ្យ​ជនអនាមិក​ ​លួច​យក​ទិន្នន័យ​របស់​អ្នកប្រើ​ប្រាស់​។​

​ប្រភព​បន្ត​ថា​ ​ជនអនាមិក​ ​បាន​ប្រើប្រាស់​វិធី​ហៅ​ទូរសព្ទ​ចូល​ ​តាមកម្ម​វិធី​ ​WhatsApp​ ​របស់​អ្នកប្រើ​ទូទៅ​ ​រួច​ក៏​បញ្ចូល​កម្មវិធី​សម្រាប់​លួច​យក​ទិន្នន័យ​នោះ​ ​ដែលគេ​ជឿ​ថា​ ​ជា​កម្មវិធី​មក​ពី​ក្រុមហ៊ុន​ ​NSO​ ​Group​ ​។​

នាយកដ្ឋាន​ប្រឆាំង​បទល្មើស​បច្ចេកវិទ្យា​ ​បាន​បន្ថែម​ថា​ ​ដើម្បី​ទប់ស្កាត់​ពី​ការ​លួច​យក​ទិន្នន័យ​នេះ​ ​អ្នកប្រើ​ប្រាស់​ ​ត្រូវតែ​ធ្វើ​បច្ចុប្បន្នភាព​ ​(​Update​)​ ​កម្មវិធី​ ​WhatsApp​ ​ទៅ​ជំនាន់​ ​(​Version​)​ ​ចុងក្រោយ​បង្អស់​ ​(​v2.19.51​ ​សម្រាប់​ ​iPhone​ ​និង​ ​v2.19.134​ ​សម្រាប់​ ​Android​)​ ​ដែល​បាន​ដាក់​ឱ្យ​ប្រើប្រាស់​កាលពី​សប្តាហ៍​មុន​នេះ​៕​ ​

អត្ថបទ​៖​ ​ចាន់​ ​សោភ័ណ្ឌ​លាភ​