បច្ចេកវិទ្យាទំនើបរបស់យន្តហោះ F-35 ដែលជប៉ុនគ្រោងទិញពីអាមេរិក ១០៥គ្រឿង

២ ឆ្នាំមុន

ខែឧសភា ២៨, ២០១៩ សង្គម

បរទេស៖ រដ្ឋាភិបាលជប៉ុន គ្រោងនឹងទិញយន្តហោះចម្បាំង F-35 ចំនួន ១០៥ គ្រឿង ពីក្រុមហ៊ុនអាមេរិក Lockheed Martin ដើម្បីពង្រឹងកងទ័ពអាកាសរបស់ខ្លួន។ លោក ប្រធានាធិបតីអាមេរិក ដូណាល់ ត្រាំ បានអះអាងថា ជប៉ុនជាសម្ព័ន្ធមិត្តរបស់អាមេរិក តែមួយគត់ ដែលនឹងមានយន្តហោះ F-35 ច្រើនជាងគេនៅលើពិភពលោក។ ខាងក្រោមនេះ ជាលក្ខណៈពិសេសរបស់យន្តហោះ F-35 ដែលអ្នកគួរដឹង៖

ពីឡុត អាចចល័ត និងចាប់បានទិន្នន័យរបស់កងទ័ពសត្រូវ ប្រឆាំងប្រព័ន្ធរ៉ាដា និងការវាយប្រហារនានា។
ទិន្នន័យដែលចាប់បានដោយសិនស័រ របស់យន្តហោះនេះ អាចបញ្ជូនទៅឱ្យទីបញ្ជាការលើសមុទ្រ អាកាស ឬ ផ្ទៃដី បានយ៉ាងឆាប់រហ័ស។
យន្តហោះ F-35 អាចការពារខ្លួនបានយ៉ាងមានប្រសិទ្ធភាព និងធ្វើឱ្យរ៉ាដាសត្រូវ មិនអាចចាប់សញ្ញាណរបស់វាបានឡើយ។
សមត្ថភាពហោះហើរទាបបំផុត ជួយឱ្យ F-35 អាចគេចពីប្រព័ន្ធរ៉ាដា និងចូលទៅក្នុងតំបន់ការពារដែនអាកាសរបស់សត្រូវ ដោយសុវត្ថិភាព ព្រមទាំងអាចបង្កភាពងាយស្រួលក្នុងការវាយប្រហារ។
F-35 មានប្រព័ន្ធសព្វាវុធ ព័ត៌មាន និងសិនស័ររួមគ្នា ដែលធ្វើឱ្យពីឡុត មានប្រៀបលើសត្រូវ ក្នុងការប្រឈមមុខដាក់គ្នា ក្នុងសមរភូមិ។
ពីឡុតដែលបញ្ជាយន្តហោះចម្បាំងជំនាន់ទី៥នេះ អាចទទួលបានសញ្ញាណយន្តហោះចម្បាំងសត្រូវបានមុន និងអាចសម្រេចចិត្តដើម្បីវាយប្រហារពីចម្ងាយបាន។
ប្រព័ន្ធសិនស័រទំនើប និងប្រព័ន្ធទិន្នន័យរួមបញ្ចូលគ្នា បានធ្វើឱ្យពីឡុតបញ្ជាយន្តហោះចម្បាំង F-35 អាចហោះហើរ ក្នុងបេសកកម្មដែលប្រឈមដោយគ្រោះថ្នាក់នានា ជាមួយទិន្នន័យដែលចាប់បានភ្លាមៗ។
ក្នុងអន្តរប្រតិបត្តិការវាយប្រហារ យន្ដហោះចម្បាំង F-35 គឺមានតួនាទីដឹកនាំយន្តហោះចម្បាំងដទៃទៀត។
យន្ដហោះ F-35 ត្រូវរចនាឡើង ដើម្បីចែករំលែក និងគាំទ្រអ្វីៗគ្រប់យ៉ាងជាមួយយន្តហោះចម្បាំង និងមជ្ឈមណ្ឌលប្រតិបត្តិការដទៃទៀត ដើម្បីពង្រីកការយល់ដឹងច្បាស់ពីស្ថានភាពសមរភូមិ។
មួករបស់ពីឡុត មានតម្លៃ ៤០ម៉ឺនដុល្លារ ដែលមានបំពាក់កាមេរ៉ា និងសិនស័រ ដោយអាចកំណត់គោលដៅវាយប្រហារទៅលើសត្រូវបាន៕