និស្សិតក្រីក្រម្នាក់ជិះកង់កញ្ចាស់៤ឆ្នាំរហូតដល់ថ្ងៃទទួលសញ្ញាបត្រ

២ ឆ្នាំមុន

ខែមិថុនា ៤, ២០១៩ សង្គម

ភ្នំពេញ៖ ដូចដឹងស្រាប់ហើយថា សម័យនេះយុវជនជាច្រើននិយមសម្ភារៈនិយមហើយភាគច្រើនតែងតែអួតបង្ហាញគ្នា រហូតដល់អ្នកខ្លះទៀតសុខចិត្តខ្ចីលុយគេ ឬ ក៏ធ្វើការបង់រំលោះដើម្បីបានរបស់មកហ៊ឺហា។ ប៉ុន្តែងាកមកមើលពីនិស្សិតម្នាក់ដែលទើបតែបានបញ្ចប់ការសិក្សានៅសកលវិទ្យាល័យភូមិន្ទភ្នំពេញម្នាក់ដែលមានឈ្មោះ ហម ហៀប វិញសុខចិត្តតស៊ូជិះកង់រយៈពេល៤ឆ្នាំនៅក្នុងជីវិតជានិស្សិត។

ចេញពីប្រវត្តិគ្រួសារដែលក្រខ្សត់ ហម ហៀប បានធ្វើការអរគុណទៅអង្គការកុមារមេគង្គ ប៉ាម៉ាក់ធម៌នៅប្រទេសបារាំង លោកគ្រូអ្នកគ្រូ ឪពុកម្តាយ នារីម្នាក់ប្រហែលជាមនុស្សសំខាន់របស់គាត់ដែលតែងតែផ្តល់កំលាំងចិត្តដល់លោកគ្រប់ពេល និង កង់តែមួយដែលបានកំសត់កម្រជាមួយលោក ជូនលោកទៅសិក្សា និង គ្រប់ទីកន្លែងដែលលោកចង់ទៅ ប្រសិនបើគ្មានកង់មួយនេះទេ លោកប្រាកដជាកាន់តែពិបាកជាមិនខាន។

ភាពតស៊ូរបស់លោកបានឱ្យលោកសម្រេចគោលដៅដោយទទួលបានសញ្ញាបត្រផ្នែកអក្សរសាស្រ្តខ្មែរនៅសកលវិទ្យាល័យភូមិន្ទភ្នំពេញដោយជោគជ័យប៉ុន្តែលោកប្រហែលជាមានគម្រោងនឹងបន្តថ្នាក់បរិញ្ញាបត្រជាន់ខ្ពស់បន្ថែមទៀតដោយសារតែលោកគិតថារយៈពេល៤ឆ្នាំនៃថ្នាក់មហាវិទ្យាល័យមិនទាន់គ្រប់គ្រាន់ឡើយសម្រាប់លោក សង្ឃឹមថាបន្ទាប់ពីនេះទៅលោកនឹងទទួលបានការងារល្អមួយដែលអាចជួយសម្រួលដល់ជីវភាព និង អនាគតរបស់លោកឱ្យត្រចះត្រចង់៕