ប្រជាជន​បេឡារូស​ ​និង​រុស្សី​រាប់ពាន់​នាក់​ពេញចិត្ត​នឹង​ការ​សម្តែង​របាំ​ខ្មែរ​

រុស្សី៖ កាលពីពេលថ្មីៗនេះ គណៈប្រតិភូកម្ពុជា ដឹកនាំដោយលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និង វិចិត្រសិល្បៈ បានធ្វើដំណើរក្នុងបេសកកម្មវប្បធម៌ទៅកាន់សាធារណរដ្ឋបេឡារូស និងប្រទេសរុស្សីដើម្បីបើកនូវ ទិវាវប្បធម៌កម្ពុជា និងការសម្តែងពីរបាំខ្មែរ។

យោងតាមអ្នកនាំពាក្យ បានប្រាប់មកកាន់ MyTV PLUS ថា កម្ពុជា ទទួលបានលទ្ធផលជាវិជ្ជមានជាច្រើនក្នុងដំណើរលើកនេះ ពោលគឺប្រជាជនបេឡារូស និងប្រជាជនរុស្សីជាច្រើនបានសម្តែងការចាប់អារម្មណ៍ចំពោះវប្បធម៌ ព្រមទាំងកន្លែងទេសចរណ៍របស់កម្ពុជា។ ជាក់ស្តែងនៅពេលដែល កម្ពុជា បង្ហាញវីដេអូខ្លីប ៧ នាទី ដែលផ្សព្វផ្សាយពីសក្តានុពលទេសចរណ៍របស់កម្ពុជា ប្រជាជនបេឡារូស និងរុស្សីប្រមាណជាង ១,០០០ នាក់ដែលបានចូលរួម បានបង្ហាញពីការជក់ចិត្ត ដឹតអារម្មណ៍ និងផ្តល់ជាសម្លេងហ៊ោកញ្ជ្រៀវ លាយលំជាមួយស្នូរទះដៃ ថែមទាំងមិនចង់ចាកចេញពីកៅអីទៀតផង។

នេះគឺជាជោគជ័យមួយផងដែល កម្ពុជាទទួលបាននៅលើឆាកអន្តរជាតិ នៅក្នុងការបង្ហាញពីវប្បធម៌ដ៏ផូរផង់ និងតំបន់ទេសចរណ៍ដ៏ស្រស់ស្អាត ក្នុងគោលបំណងសំដៅធ្វើឱ្យវប្បធម៌ និងទេសចរណ៍របស់ កម្ពុជា កាន់តែមានភាពល្បីល្បាញ។ គួរបញ្ជាក់ផងដែរថា គណៈប្រតិភូកម្ពុជានឹងធ្វើដំណើរទៅកាន់ប្រទេស រុស្សី នៅក្នុងពេលឆាប់ៗខាងមុននេះ ក្នុងគោលបំណងផ្សព្វផ្សាយពីវប្បធម៌ និងទេសចរណ៍របស់ កម្ពុជា ដូចអ្វីដែលខ្លួនបានធ្វើនៅសាធារណរដ្ឋបេឡារូសផងដែរ៕

អត្ថបទ៖ ណារ៉ូត