យានអវកាសចាស់ៗ ពេលអស់សាំង ធ្លាក់មកលើផែនដីវិញនៅតំបន់ណា?

អាមេរិក៖ នៅពេលយានអវកាសអស់សាំង ពួកវានឹងត្រូវធ្លាក់ទៅតំបន់មួយដែលទីភ្នាក់ងារអវកាស NASA ឱ្យឈ្មោះថា ទីកប់ខ្មោចរបស់យានអវកាស ។ វាស្ថិតនៅមហាសមុទ្រប៉ាស៊ីហ្វិក ចម្ងាយប្រហែល ៥០០០គីឡូម៉ែត្រ ពីឆ្នេរភាគខាងកើត ប្រទេសនូវែលហ្សេឡង់ និងមានជម្រៅចុះទៅបាតសមុទ្រជាង ៣គីឡូម៉ែត្រ។ វាជាទីតាំងឆ្ងាយបំផុតពីដីទ្វីប។

យានអវកាស ត្រូវបានធ្លាក់មកលើផែនដីវិញ ក្នុងល្បឿនជិត ៣០០គីឡូម៉ែត្រក្នុងមួយម៉ោង។ NASAបានព្យាករថា ភាគរយដែលបំណែកយានអវកាស អាចធ្លាក់ចំមនុស្ស គឺ ១ លើ ១០០០០។

ចាប់តាំងពីឆ្នាំ១៩៧១មក យានអវកាសជាង ២៦៣គ្រឿង បានធ្លាក់នៅទីនោះ។ យានអវកាសដែលអាចធ្លាក់មកដល់ផែនដី គឺជាយានខ្នាតធំ ចំណែក យានខ្នាតតូច ឬផ្កាយរណបតូចៗ ត្រូវបានឆេះទាំងស្រុង មុននឹងធ្លាក់ដល់ផែនដី។

សំណួរសួរថា តើស្ថានីយអវកាសអន្តរជាតិ ISS នឹងអស់សាំងនៅពេលណា? បើតាម NASA វានឹងត្រូវគេបោះបង់ចោលនៅក្នុងរយៈពេល ១២ឆ្នាំទៀត៕

ប្រភព៖ Business Insider

ប្រែសម្រួល៖ ចាន់ សោភ័ណ្ឌលាភ