ជប៉ុន​ ​ប្រើ​ប្លាស្ទិក​ធ្វើ​គ្រឿងបរិក្ខារ​ ​ខណៈ​ទូរសព្ទ​ធ្វើមេ​ដាយ​ ​នៅ​អូឡាំពិក២០២០​

​ជប៉ុន​៖​ ​អ្នក​រៀបចំ​ព្រឹត្តិ​ការណ៍​កីឡា​អូឡាំពិក​ឆ្នាំ២០២០​ ​នៅ​ទីក្រុង​តូក្យូ​ ​ប្រទេស​ជប៉ុន​ ​នឹង​ប្រើប្រាស់​សំណល់​ប្លា​ស្ទីក​ពី​ការប្រើ​ប្រាស់​របស់​ប្រជាជន​ ​និង​ស្រង់​ពី​ទឹកសមុទ្រ​ ​ដើម្បី​ធ្វើ​គ្រឿងបរិក្ខារ​ ​ខណៈ​ទូរសព្ទ​ ​ដែល​ឈប់​ប្រើប្រាស់​ ​នឹង​ត្រូវ​ផលិត​ជា​មេដាយ​ ​សម្រាប់​ប្រគល់​ជូន​អត្តពលិក​នានា​ ​ក្នុង​ព្រឹត្តិ​ការណ៍​នេះ​។​

​អ្នក​រៀបចំ​អូឡាំពិក២០២០​ ​បាន​ប្រកាស​កាលពី​ថ្ងៃទី១១​ ​ខែមិថុនា​ ​ឆ្នាំ២០១៩​ ​ថា​ ​គេ​នឹង​ពង្រាយ​ធុង​ជាង​ ​២០០០​ ​នៅក្នុង​ផ្សារ​ទំនើប​ ​AEON​ ​សម្រាប់​ទទួលយក​សំណល់​ប្លា​ស្ទីក​ ​ពី​ប្រជាជន​ ​ចាប់ពី​ថ្ងៃទី១៣​ ​ខែមិថុនា​ ​ឆ្នាំ២០១៩​ ​តទៅ​។​ ​ទន្ទឹម​នេះ​ ​អ្នក​រៀបចំ​ដដែល​ ​គ្រោង​ប្រមូល​ឱ្យ​បាន​ ​៤៥តោន​។​

​កាលពី​ពេល​កន្លងទៅ​ ​អ្នក​រៀបចំ​ដដែល​ ​បាន​ប្រកាស​ថា​ ​ពួកគេ​ ​បាន​ប្រើប្រាស់​ទូរសព្ទ​ខូច​ ​និង​ឧបករណ៍​អេឡិចត្រូនិក​ដទៃទៀត​ ​ដើម្បី​កែច្នៃ​ជា​ ​មេដាយ​ ​ខណៈ​ឯកសណ្ឋាន​របស់​អត្តពលិក​ ​នឹង​ត្រូវ​ធ្វើ​ពី​ប្លា​ស្ទីក​ ​ចំពោះ​ផ្នែក​ខ្លះ​៕​

​ប្រភព​៖​ ​Reuters​

​ប្រែ​សម្រួល​៖​ ​ចាន់​ ​សោភ័ណ្ឌ​លាភ​