តើអ្នកដឹងទេ ទំនិញសំខាន់អ្វីខ្លះ ដែលកម្ពុជា បានធ្វើការនាំចេញទៅកាន់ទីផ្សារអន្តរជាតិ និង ទទួលបានទឹកប្រាក់ប្រមាណជាង ១ម៉ឺន លានដុល្លាអាមេរិក ក្នុងមួយឆ្នាំ?

ភ្នំពេញ ៖ បើទោះបីជាឆ្នាំ២០១៨នេះ កម្ពុជា បានរៀបចំការបោះឆ្នោតជាតិក៏ដោយ ក៏ការនាំចេញទំនិញពីកម្ពុជា ទៅកាន់ទីផ្សារអន្តរជាតិ មិនមានការថយចុះនោះទេ ។

តាមរបាយការណ៍ពីក្រសួងពាណិជ្ជកម្ម បានអោយដឹងថា ទំនិញនាំចេញសំខាន់ៗរបស់កម្ពុជា មានដូចជា ផលិតផលវាយនភ័ណ្ឌ កាត់ដេរ តំណាងដល់ទៅរង្វង់៧០% នៃទំនិញនាំចេញសរុបរបស់កម្ពុជា ។ ក្រៅពីនេះ នៅមានទំនិញ ដូចជា អង្ករ កៅស៊ូ គ្រឿងបន្គុំអេឡិចត្រូនិក និង កសិផលមួយចំនួនទៀត ក៏ត្រូវបានធ្វើការនាំចេញ ។

តាមការរំពឹងទុករបស់មន្ត្រីជាន់ខ្ពស់ក្រសួងពាណិជ្ជកម្ម បានបង្ហាញថា រយៈពេល១ឆ្នាំពេញ ឆ្នាំ២០១៨នេះ ការនាំចេញសរុបរបស់កម្ពុជាទៅកាន់ទីផ្សារអន្តរជាតិ គិតជាទឹកប្រាក់ នឹងសម្រេចបានក្នុងអត្រាកំណើនដល់ទៅ ១៥% បើធៀបនឹងឆ្នាំមុន ។

ឯកឧត្តម ឱក ប៊ុង រដ្ឋលេខាធិការក្រសួងពាណិជ្ជកម្មកម្ពុជា បានថ្លែងបញ្ជាក់កាលពីពេលថ្មីៗនេះថា ការនាំចេញរបស់កម្ពុជាក្នុងឆ្នាំ២០១៨នេះ នឹងសម្រេចបានក្នុងទឹកប្រាក់ ១ម៉ឺន ២ពាន់លាន ដុល្លារអាមេរិក ជាមួយនឹងអត្រាកំណើន១៥% ធៀបនឹងការនាំចេញ កាលពីឆ្នាំ២០១៧កន្លងទៅ ដែលសម្រេចបានក្នុងទឹកប្រាក់ជាង១ម៉ឺន១ពាន់លានដុល្លារ ។

ការរំពឹងពីកំណើននៃការនាំចេញឆ្នាំនេះ ដោយយោងទៅលើស្ថានភាពល្អប្រសើរនៃទីផ្សារនាំចេញសំខាន់របស់កម្ពុជា ដូចជាទីផ្សារសហគមន៏អឺរ៉ុប និងសហរដ្ឋអាមេរិក ជប៉ុន និងទីផ្សារប្រទេសកាណាដាជាដើម៕