ក្រុមអភិរក្សបរិស្ថាន ចង់ឱ្យ កាណាដា បញ្ឈប់ការដឹកសំរាមនាំចេញ

កាណាដា៖ ក្រុមអភិរក្សបរិស្ថាន បានដាក់ញត្តិទៅកាន់ក្រសួងបរិស្ថានកាណាដា ដើម្បីស្នើឱ្យចុះហត្ថលេខាលើវិសោធនកម្មច្បាប់មួយ ដើម្បីហាមឃាត់ការនាំចេញសំរាមទៅកាន់ប្រទេសកំពុងអភិវឌ្ឍនានា រួមទាំងកម្ពុជា និងប្រទេសអាស៊ីអាគ្នេយ៍មួយចំនួន។

ការស្នើនេះ គឺបន្ទាប់ពីកម្ពុជា បានរកឃើញ សំរាមដែលបាននាំចូលចំនួន ៨៣កុងតឺន័រ ស្មើនឹង ១៤០០តោន ក្នុងនោះ នាំចូលពីកាណាដា ចំនួន ១៣កុងតឺន័រ នៅឯកំពង់ផែខេត្តព្រះសីហនុ។

ក្រុមអភិរក្សបរិស្ថាន រួមមាន Greenpeace និង សមាគមច្បាប់បរិស្ថានកាណាដា បានធ្វើញត្តិទៅឱ្យលោកស្រី Catherine McKenna រដ្ឋមន្ត្រីក្រសួងបរិស្ថានកាណាដា ដើម្បីស្នើចុះហត្ថលេខាលើវិសោធនកម្មច្បាប់ នៃអនុសញ្ញាទីក្រុងបាសែល។ របាយការណ៍មួយ បង្ហាញថា ប្រជាជនកាណាដា ៨០% ចង់ឱ្យរដ្ឋាភិបាលកាណាដា មានចំណាត់ការលើការគ្រប់គ្រងបញ្ហាសំរាម។

កាណាដា ជាប្រទេសហត្ថលេខីមួយ នៃអនុសញ្ញាទីក្រុងបាសែល ដើម ដែលបានដាក់កំហិតលើការនាំចេញសំរាម តែប្រទេសនេះ បានបន្តដឹកសំរាមប្លាស្ទិកទៅកាន់ប្រទេសកំពុងអភិវឌ្ឍ។

នាយកដ្ឋានបរិស្ថាន និងបម្រែបម្រួលអាកាសធាតុកាណាដា បានលើកឡើងថា ខ្លួនកំពុងពិនិត្យលើករណីនៅកម្ពុជា។ នេះបើយោងតាមការបញ្ជាក់ពីអ្នកនាំពាក្យ Bronwen Jervis ប្រាប់សារព័ត៌មាន CBC នៅកាណាដា កាលពីសប្ដាហ៍មុន៕

ប្រភព៖ CBC

ប្រែសម្រួល៖ ចាន់ សោភ័ណ្ឌលាភ