គម្រោងអភិវឌ្ឍន៍ផ្លូវដែករាជធានីភ្នំពេញ ជិត២០គីឡូម៉ែត្រ ឆ្លងកាត់ផ្លូវសំខាន់ៗចំនួន៦

ភ្នំពេញ៖ គម្រោងអភិវឌ្ឍន៍ផ្លូវដែក ក្នុងរាជធានីភ្នំពេញ ត្រូវបានអន្តរក្រសួងធ្វើការប្រជុំ ពិនិត្យ កាលពីថ្ងៃទី២២ ខែកក្កដា ឆ្នាំ២០១៩ ដោយទទួលការគាំទ្រ និងសាទរចំពោះគម្រោងអភិវឌ្ឍន៍នេះ។

ក្រសួងបរិស្ថានឱ្យដឹងថា គម្រោងអភិវឌ្ឍន៍ផ្លូវដែកក្នុងរាជធានីភ្នំពេញ មានប្រវែង ១៨៩៨៥ ម៉ែត្រ ដែលមានទីតាំងស្ថិតនៅតាមបណ្តោយ មហាវិថីហ្សាដឺហ្គោល មហាវិថីសម្តេចមុនីរ៉េត កំណាត់មហាវិថីសហព័ន្ធរុស្សី ផ្លូវវេងស្រេង កំណាត់ផ្លូវជាតិលេខ៤ និងកំណាត់ផ្លូវទំនប់កប់ស្រូវ រាជធានីភ្នំពេញ របស់ក្រសួងសាធារណការ និងដឹកជញ្ជូន (ម្ចាស់គម្រោង) និងមានការសិក្សាគម្រោងដោយក្រុមហ៊ុន នីប៉ុង កូអេ ខូអិលធីឌី និងសិក្សាវាយតម្លៃដោយក្រុមហ៊ុនទីប្រឹក្សា PPIC Co., Ltd.។

គម្រោងអភិវឌ្ឍន៍ផ្លូវដែករាជធានីភ្នំពេញ នឹងរួមចំណែកអភិវឌ្ឍន៍ទំនើបកម្មទីក្រុង និងកាត់បន្ថយការកកស្ទះចរាចរណ៍ នៅក្នុងរាជធានីភ្នំពេញ។ យ៉ាងណាមិញ មិនទាន់មានការបញ្ជាក់កាលពីការបើកការដ្ឋាននៅឡើយទេ៕

អត្ថបទ៖ ចាន់ សោភ័ណ្ឌលាភ